ހިރާ ސްކޫލަށް އިތުރު ކުރެވުނު ބިން ހޯދާފައިވަނީ ރާއްޖޭގައި ހެދިފައިވާ ޤާނޫނުތަކާއި ޤަވާއިދުގެ ތެރެއިން ކަމަށް އެސްކޫލުން ހާމަކޮށްފިއެވެ.
އެސްކޫލުން މިހެން ބުނެފައިވަނީ، "ޙިރާ ސްކޫލް ކުރިމަތީ އޮތް މަގު އައްޑޫ ކައުންސިލުން ވިއްކާލައިފިކަމަށް ތުހުމަތުކުރެވޭ މައްސަލައެއް ފެންމަތިވެއްޖެ" މި ނަމުގައި އައްޑޫގައި ހިންގާ ނޫހަކުން އާންމުކޮށްފައިވާ ބުރާސްފަތި ދުވަހު ސޯޝަލް މީޑިއާގައި އާންމު ކުރި ރިޕޯޓަކާއި ގުޅިގެންނެވެ. މި ވީޑިއޯގައި ހިރާ ސްކޫލަށް އައްޑޫ ސިޓީ ކައުންސިލުން، ސްކޫލު ކުރިމަތީ އޮތް މަގު ވިއްކާލި ކަމަށް ވަނީ ތުހުމަތުކޮށްފައެވެ.
"ހިރާ ސްކޫލަށް ބިން ހޯދުމުގައި ޢަމަލުކޮށްފައިވާނީ ދިވެހިރާއްޖޭގެ ޤާނޫނުތަކާއި ޤަވާޢިދުތަކާ އެއްގޮތަށް ކަމުގައި ދަންނަވަމެވެ. އަދި އެކަމުގައި ޤާނޫނާއި ޤަވާޢިދުތަކާ ޚިލާފު އެއްވެސް ކަމެއް ކޮށްފައިނުވާނެ ކަމުގެ ޔަޤީންކަން ސްކޫލުގެ ފަރާތުން އަރުވަމެެވެ."
އަމިއްލަ ފަރާތެއްގެ ގޭގައި ފެށި މިސްކޫލުގެ އައު އިމާރާތް ހުޅުވީ 2019 ވަނަ އަހަރު ޖޫން މަހުއެވެ. ސްކޫލުގެ އިމާރާތް ބިނާ ކުރުމުގެ ކުރިން އަލިވާ މަގުން ޝަމްސުއްދީން ބޮޑުފަނޑިޔާރު ތަކުރުފާނު މަގު (ލިންކުރޯޑު) އާ ހަމައަށް އޮންނަ މަގަކީ ފުންވަޅުގަނޑުތަކެއް އޮންނަ، ބޯ ގަސްތަކެއް ހެދިފައި އޮތް ސަރަހައްދެއް ކަން ވަނީ ފާހަގަކޮށްފައެވެ. އަދި އެ ސަރަހައްދުގެ ބިން ސާފުކޮށް، ސްކޫލް އެޅުމަށް ޓަކައި، ސްކޫލުން ވެލި ގަނެ، ބިމަށް ވެލި އަޅައި ބިން އެއްވަރު ކުރިއިރު، އެ ސަރަހައްދު ސާފުވެގެން ދިޔުމުން އަލިވާ މަގުން ލިންކުރޯޑަށް ނިކުމެވޭ ވަރަށް ސާފުވުމުން، އެ މަގު އާންމު އުޅަނދުތަކާއި މީހުން ބޭނުން ކުރަން ފެށިއެވެ. މިކަން އެ ސަރަހައްދުގައި ދިރުއުޅޭ ބައެއް އާންމު ފަރާތްތަކުންވެސް ވަނީ ކަށަވަރުކޮށްދީފައެވެ.
ސްކޫލު ހުޅުވުމާއި ދިމާކޮށް 2019 ވަނަ އަހަރު ޖޫން މަހުގެ 25 ވަނަ ދުވަހު އައްޑޫސިޓީ ކައުންސިލުން ވަނީ މި ސަރަހައްދު ބޭނުން ކުރާ ދުއްވާ އުޅަނދުތަކަށް އަލިވާ މަގުން ހިރާ ސްކޫލުގެ ކުރިމަތިން ލިންކް ރޯޑަށް ނިކުންނަ މަގު އެއްކޮށް ބަންދުކޮށްފައިވާކަން އިއުލާންކޮށްފައެވެ. އަދި ސްކޫލަށް ދާ ފަރާތްތަކުން ބޭނުން ކުރަންވާނީ ހިރާ ސްކޫލުގެ މައި ގޭޓު ކުރިމަތިން އަމީނީ މަގާއި ގުޅޭ މަގު ކަމަށް ވަނީ ބަޔާންކޮށްފައެވެ. މި އިއުލާނަކީ 2019 ޖޫން 11 ވަނަ ދުވަހު ބޭއްވި ކައުންސިލުގެ އާންމު ޖަލްސާއަކުން ނިންމާފައި ނިންމުމެކެވެ. މި ނިންމުމާއި އަދި އިއުލާން ކައުންސިލް ވެބްސައިޓުން މިހާރުވެސް ބަލާލެވެއެވެ.
Hira School ge aa imaaraaiy 30 June 2019 vana dhuvahun feshigen beynun kurumah hamajehifaivaathy eschool himeney sarahahdhuge maguthah beynun kurahvaa faraaiythakuge samaalukamahtakai dhannavameve pic.twitter.com/V0sCdx3FML
— Addu City Council (@AdduCityCouncil) June 25, 2019
މި އިއުލާނާއެކު އެ ދިމާލަށް މަގު އެއްކޮށް ބަނދުކުރަން ބެރިކޭޑްވެސް ކައުންސިލުން ވަނީ ޖާހާފައެވެ. ނަމަވެސް ދުވަސްތަކެއް ފަހުން އާންމު ފަރާތްތަކުން ބެރިކޭޑް ދުރުކޮށް އެތަކެއްޗަށް ގެއްލުން ދީފައިވާތީ އެ ތަކެތި ވަނީ ނަގާފައެވެ. އޭގެ ފަހުން އެއީ ރަސްމީ މަގެއް ނުވިނަމަވެސް އާންމު އުޅަނދުތަކުން އެ ދިމާލުން ލިންކް ރޯޑަށް ނިކުތުމަށާއި، އެ ސަރަހައްދަށް ވަނުމަށް ބޭނުން ކުރެއެވެ. މިގޮތަށް ބޭނުން ކުރަމުންދާއިރު މިއީ ލިންކް ރޯޑުގެ ލެނބޭ ހިސާބެއް ކަމުން ކުދި އެކްސިޑެންޓުތައް ވެސް މި ހިސާބުގައި މީގެ ކުރިން ހިނގާފައި ވެއެވެ.
ހިރާގެ ދަރިވަރުންނަށް ޤައުމީ މަންހަޖުގައި ހިމެނޭ ފިޒިކަލް އެޑިޔުކޭޝަންގެ ބައިތައް ކުރިއަށް ގެންދިޔުމަށް އައު އިމާރާތާއި އެކުވެސް ޖާގައިގެ ދަތިކަމާއި ވަނީ ކުރިމަތިލާން ޖެހިފައެވެ.
ޙިރާ ސްކޫލްގެ އައު އިމާރަތަށް ބަދަލުވުމާއެކު، ދަރިވަރުން ކުޅިވަރު ކުޅުމަށް ސްކޫލުގެ ކައިރިން ބިމެއް ދެއްވުމަށް އެދި ސްކޫލްގެ ފަރާތުންނާއި ބެލެނިވެރިންގެ ފަރާތުން ތަކުރާރުކޮށް ކައުންސިލްގައި ވަނީ އެކި ފަހަރު މަތިން ދަންނަވާފައި ކަމަށް ސްކޫލުން ބުނެއެވެ. އަދި ސްކޫލުގެ އެދުމަށް އިޖާބަދީ، އައްޑޫސިޓީ ކައުންސިލްގެ 2022 ވަނަ އަހަރުގެ 7 ވަނަ ރަސްމީ ޖަލްސާގައި ވަނީ ޙިރާ ސްކޫލްގެ ކުރިމަތީގައި އޮތް ބިމުން 20،000 އަކަފޫޓު އެ ސްކޫލަށް ދިނުމަށް ނިންމިއެވެ.
Mayor Abdulla Sodiq aai Councillor Ali fahmy Ahmed miadhu Hira School ah ziyaaraiy kurahvai ethanuge masahkaiy hin'gamudhaa gothaai mivaguthu dhimaavefaivaa dhathithah olhun filuvvaifi pic.twitter.com/0TvemNS6pR
— Addu City Council (@AdduCityCouncil) July 17, 2019
ބިން ދިން އިރު ދަރިވަރުންގެ ސަލާމަތާ ރައްކާތެރިކަމަށް ރިއާޔަތްކޮށް، ބިމާއި ސްކޫލާ ދެމެދު އޮތް މަގު(2019 ވަނަ އަހަރު ބަނދު ކުރަން ނިންމާފައިވާ މަގު) ޑްރައިވިންގ ޓްރެކާއި އިސްކޫލްގެ ބިމާ ދެމެދަށް ވަނީ ބަދަލުކޮށްފައެވެ. އައްޑޫލައިވްއަށް އެނގިފައިވާ ގޮތުގައި މަގު ރީ ލޮކޭޓް ކުރިއިރު، ސްކޫލަށް ދޭން ކަނޑައެޅި ބިމުގެ ސައިޒަކަށް ބަދަލެއް ނާދެއެވެ. އަދި މަގު ރީލޮކޭޓްކޮށް ބިން ވަކި ކޮށްދީފައިވަނީ ކައުންސިލުންނެވެ.
ހިރާ ސްކޫލުން މަސައްކަތް ކުރަމުން ގެންދަނީ ސްކޫލުގެ ކަންކަމުގައި ސިޔާސީ ފިކުރުތަކުން ދުރުވެ ތިބެ ސްކޫލު ހިންގުމަށް ކަމަށްވަނީ ބަޔާނުގައި ވަނީ ބުނެފައެވެ. އަދި ސްކޫލްގެ އަގު ވެއްޓިގެންދާ ފަދަގޮތަކަށް ސިޔާސީ ކުލަޖައްސައިގެން މިފަދަ ހަބަރެއް ފެތުރިގެން ދިއުމަކީ ސްކޫލާ ގުޅުންހުރި އެންމެހައި ފަރާތްތަކުން ނުހަނު ކަންބޮޑުވާ ކަމެއް ކަމުގައި ސްކޫލުން ވަނީ ފާހަގަކޮށްފައެވެ.
މި ވީޑިއޯ އާ ގުޅިގެން ހިރާ ސްކޫލްގެ ބެލެނިވެރިންނާއި ސްކޫލާއި ގުޅުން ހުރި ފަރާތްތަކުން ދަނީ ކަންބޮޑުވުން ފާޅުކުރަމުންނެވެ. އަދި ބައެއް އާންމު ފަރާތްތަކުންވެސް ވަނީ ތަޢުލީމު ކުރިއެރުވުމަށް ކައުންސިލުގެ ނިންމުމަކުން ބިމެއް ދިނުމަކުން މައްސަލައެއް ނެތް ކަން ފާހަގަކޮށްފައެވެ.
ހިރާ ސްކޫލަކީ 21 ވަނަ ޤަރުނުގެ ގޮންޖެހުންތަކާ ކުރިމަތިލެވޭ ފަދަ ޤާބިލު ދަރިންތަކެއް، މުޖުތަމަޢަށް ނެރުމަށްޓަކައި ބޭނުންވާ ޒަމާނީ ތަޢުލީމު ރައްކާތެރި މާޙައުލެއްގައި ދިނުމަށްޓައި، 2010 ވަނަ އަހަރުން ފެށިގެން، ހިންގަމުން އަންނަ ނޮން-ޕްރޮފިޓް ސްކޫލެކެވެ. ހެޔޮއެދޭ އަމިއްލަ ފަރާތެއްގެ ގޭގައި ފެށި މި ސްކޫލަށް އައްޑޫސިޓީ ކައުންސިލްގެ ފަރާތުން ބިމެއް ދެއްވާފައިވަނީ 2011 ވަނަ އަހަރުގައެވެ. އެއަށްފަހު ގިނަ މަސައްކަތެއް ކުރެވި، 2019 ވަނަ އަހަރުގެ ޖޫން މަހުގެ 30 ވަނަ ދުވަހު ހިރާ ސްކޫލްގެ ދާއިމީ ޢިމާރާތަށް ސްކޫލު ހިންގުން ވަނީ ބަދަލުކޮށްފައެވެ.