ޗައިނާގެ މިސްރާބު އެއް ވަނަ މާކެޓާ ދިމާއަށް

މި އަހަރު ނިމުމުގެ ކުރިން ރާއްޖެ އަށް އެންމެ ގިނަ ޓޫރިސްޓުން އަންނަ ގައުމަކަށް ޗައިނާ ވާނެ ކަމަށް ޓޫރިޒަމް މިނިސްޓްރީން ބުނެފި އެވެ.

މިނިސްޓަރު ޑރ. އަބްދުﷲ މައުސޫމް ވިދާޅުވީ ޗައިނާ އިން އަންނަ ޓޫރިސްޓުންގެ އަދަދު ވަރަށް ބޮޑަށް އިތުރުވަމުން އަންނަ އިރު އަހަރު ނިމުމުގެ ކުރިން ޗައިނާ ރާއްޖޭގެ އެއް ވަނަ މާކެޓަށްވާނެކަމުގެ އުންމީދު ވަރަށް ބޮޑު ކަމަށެވެ. ކޮވިޑް ވަބާގެ ފަހުން ތިން އަހަރެއްހާ ދުވަހަށް ޗައިނާ ބޯޑަރު ބަންދުކޮށްފައި އޮތުމަށް ފަހު، އެ ގައުމުގެ ޓޫރިސްޓުން ރާއްޖެ އަންނަން ފެށީ މި އަހަރުގެ ޖެނުއަރީ މަހުގެ 18 އިން ފެށިގެންނެވެ.

އޭގެ ފަހުން ރާއްޖޭގެ ގަދަ 10 މާކެޓްގައި ހިމެނީ ޗައިނާ އަންނަނީ ލިސްޓްގެ ކުރިއަށް ޖެހެމުންނެވެ. އެ ގައުމަކީ މިހާރު ތިން ވަނަ އަށް އެންމެ ގިނަ ޓޫރިސްޓުން އަންނަ ގައުމެވެ. ޓޫރިޒަމް މިނިސްޓްރީން އެންމެ ފަހުން އާންމުކުރި ތަފާސްހިސާބުތައް ދައްކާ ގޮތުން މި މަހުގެ 20 އާ ހަމައަށް ޗައިނާ އިން ރާއްޖެ އަށް 133،962 ޓޫރިސްޓުން އައިސްފައިވެ އެވެ.

ގަދަ ތިނެކަށް ބަލާ އިރު ރަޝިއާ އެއް ވަނައިގައި އޮތީ 152،967 ޓޫރިސްޓުންނާ އެކީގަ އެވެ. ދެވަނައިގައި އިންޑިއާ އޮތީ 144،041 ޓޫރިސްޓުންނާ އެކީގަ އެވެ.

ރާއްޖޭގެ ޓޮޕް 10 މާކެޓަށް ބަލާ އިރު ލިސްޓްގައި ދެން ހިމެނެނީ އިނގިރޭސިވިލާތް، ޖަރުމަން، އިޓަލީ، އެމެރިކާ، ފްރާންސް، ސްޕެއިން އަދި ސްވިޓްޒަލޭންޑެވެ.

މި މަހުގެ 20 އާ ހަމައަށް ރާއްޖެ އަށް ޖުމްލަ 1،312،088 ޓޫރިސްޓުން އައިސްފައިވެ އެވެ. ލަފާކޮށްފައި ވަނީ އަހަރު ނިމުމުގެ ކުރިން މަދުވެގެން 1.8 ޓޫރިސްޓުން ރާއްޖެ އަންނާނެ ކަމަށެވެ.