އަންނަ ހޮނިހިރު ދުވަހު ބާއްވާ ރިޔާސީ އިންތިހާބުގެ ދެވަނަ ބުރުގައި ވާދަކުރައްވާ ދެ ކެންޑިޑޭޓުން ވޯޓާސް ލިސްޓްގައި މާދަމާ ސޮއިކުރަން އިލެކްޝަން ކޮމިޝަން (އީސީ) އިން ހަމަޖައްސައިފި އެވެ.
އެތަނުން މިއަދު ބުނީ ދެ ކެންޑިޑޭޓުން ކަމަށްވާ އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒަށް ވޯޓާސް ލިސްޓްގައި ސޮއިކުރެއްވުމުގެ ފުރުސަތު އޮންނާނީ މާދަމާ ހެނދުނު 9:00 އިން ހަވީރު 4:00 އާ ހަމައަށެވެ. އެކަން ކުރިއަށް ދާނީ އީސީގެ އިންތިހާބާ ބެހޭ މަރުކަޒު، ދަރުބާރުގޭގަ އެވެ.
އީސީން ބުނީ ކެންޑިޑޭޓުގެ ބަދަލުގައި ކަނޑައަޅާ ފަރާތްތަކުން ސޮއިކުރަން ދާ ނަމަ، އެކަން ބަޔާންކޮށް ބަދަލުގައި ދާ މީހެއްގެ ފުރިހަމަ ނަމާއި ދާއިމީ އެޑްރެސް އަދި އައިޑީ ކާޑު ނަންބަރު ހިމެނޭ ގޮތަށް ކެންޑިޑޭޓު ސޮއިކޮށްފައިވާ ސިޓީއަކާ އެކީ ކެންޑިޑޭޓުގެ އައިޑީ ކާޑުގެ ކޮޕީއެއް ގެންނަން ޖެހޭނެ ކަމަށެވެ. އަދި ރަޖިސްޓަރީގައި ސޮއިކުރަން ދާ މީހެއްގެ އައިޑީ ކާޑުގެ އަސްލު ވެސް ގެންދަން ޖެހޭނެ އެވެ.
ދެވަނަ ބުރުގައި ވޯޓްލާ މީހުންގެ ދާއިމީ ލިސްޓް އީސީން އާންމުކޮށްފައިވާ އިރު، މި މަހުގެ 30 ގައި ބާއްވާ ދެވަނަ ބުރުގައި ވޯޓްލުމުގެ ހައްގު 282،395 މީހަކަށް ލިބިގެންވެ އެވެ.
މި މަހުގެ 9 ގައި ބޭއްވި ފުރަތަމަ ބުރުގައި ޖުމްލަ 8 ކެންޑިޑޭޓަކު ވާދަކުރެއްވި އެވެ.