ނޫހަކަށް ދެއްވި އިންޓަވިއުއަކާ ގުޅިގެން މަގުމަތިން ދިމާކޮށް އިންޒާރު ދީފައިވާ ކަމަށް ކުރީގެ އޮޑިޓަ ޖެނެރަލް ނިޔާޒް އިބްރާހީމް ވިދާޅުވެއްޖެ އެވެ.
މީޑިއާތަކެއްގައި މަސައްކަތްކުރާ ބައެއްގެ ފޮޓޯއަކާ އެކީ ނިޔާޒު މިއަދު ސޯޝަލް މީޑިއާ ޕޯސްޓެއްގައި ވިދާޅުވީ އޭނަ މިއަދު ހެނދުނު ބޭންކަށް ވަޑައިގެންނެވި މަގުމަތީގައި ދިމާކޮށް ފުރައްސާރަކޮށް އިންޒާރު ދީފައި ވަނީ ފޮޓޯގައި ތިބި މީހުންގެ ތެރެއުން މީހަކު ކަމަށެވެ.
"މިހާރުއްސުރެ ޕީޕީއެމްގެ އަސްލު ސިފަ މި ދަނީ ފެންނަމުން. ވެރިކަން ލިބިއްޖިއްޔާ ކަންތައްތައް ހުންނާނެ ގޮތް އަންދާޒާކޮށްލައްވާ." އިންޒާރު ދިނީ އިދިކޮޅު ޕީޕީއެމް/ޕީއެންސީ ކޯލިޝަނަށް ނިސްބަތްވާ މީހެއް ކަމަށް އިޝާރާތްކޮށް، އޭނަ ވިދާޅުވި އެވެ.
މި މައްސަލަ ވަނީ ފުލުހުންނަށް ހުށަހަޅައިފަ އެވެ.
ނިޔާޒު ވިދާޅުވެފައި ވަނީ އޭނައާ ދިމާކޮށް އިންޒާރު ދީފައި ވަނީ ޕީޕީއެމްގެ ވެރިކަން އިޔާދަވެއްޖެ ނަމަ ރައްޔިތުންނަށް ކުރިމަތިވެދާނެ ކަންކަމާ ބެހޭ ގޮތުން ދެއްވި އިންޓަވިއުއަކާ ގުޅިގެން ކަމަށެވެ.
ދާދި ފަހުން ސޯޝަލް މީޑިއާގައި އޭނަ ވަނީ ޕީއެންސީގެ ކެންޑިޑޭޓް ޑރ. މުހައްމަދު މުއިއްޒަށް ވެސް ފާޑު ވިދާޅުވެފަ އެވެ. އެގޮތުން މުއިއްޒަކީ ހައުސިން މިނިސްޓަރަކަށް ހުންނަވައިގެން، ކުރީގެ ރައީސް އަބްދުﷲ ޔާމީންގެ އަނބިކަނބަލުން ފާތުމަތު އިބްރާހީމް ދެއްވި ލިސްޓަކަށް ހިޔާ ފްލެޓްތަކެއް ބެއްސެވި މީހެއް ކަމަށް ވިދާޅުވެފަ އެވެ. އެހެންވެ މުއިއްޒަކީ އިންސާފުވެރި ވެރިއަކަށްވެދާނެތޯ ނިޔާޒު ސުވާލު އުފައްދަވާފައިވެ އެވެ.