ރިޔާސީ އިންތިހާބުގައި ރާއްޖެއިން ބޭރަށް ވޯޓުލާން ރީރެޖިސްޓަރ ކުރި މީހުންގެ އަދަދު ފުރަތަމަ ބުރާއި އަޅާބަލާއިރު ދެވަނަ ބުރުގައި ދެގުނަ އިތުރުވެއްޖެއެވެ.
އިލެކްޝަންސް ކޮމިޝަންގެ ނައިބް ރައީސް އިސްމާޢިލް ހަބީބް ވަނީ އިންތިހާބުގައި ދެވެނަ ބުރަށް ރީރެޖިސްޓަރ ކުރި މީހުންގެ ތެރެއިން ރާއްޖެއިން ބޭރުގައި ވޯޓުލުމަށް ރެޖިސްޓަރ ކޮށްފައިވާ މީހުންގެ ތަފާސް ހިސާބުތައް އާންމުކޮށްފައެވެ. ރިޔާސީ އިންތިހާބުގެ ފުރަތަމަ ބުރުގައި ރާއްޖެއިން ބޭރުގައި ވޯޓުލާން ރެޖިސްޓަރ ކޮށްފައިވަނީ، 3327 މީހުންނެވެ. ނަމަވެސް އޭގެ ގާތްގަނޑަކަށް ދެގުނަ އިތުރަށް މީހުން ވަނީ ދެވަނަ ބުރުގައި ވޯޓުލާން ރެޖިސްޓަރ ކޮށްފައެވެ.
ރިޔާސީ އިންތިހާބު 2023 ގެ ފުރަތަމަ ބުރުގައި، ރާއްޖޭން ބޭރުގައި ވޯޓުލުމަށް ރަޖިސްޓަރީ ކޮށްފައިވަނީ 3327 މީހުން.
ދެވަނަބުރުގައި، ރާއްޖޭން ބޭރުގައި ވޯޓުލުމަށް ރަޖިސްޓަރީ ކޮށްފައިވަނީ 6223 މީހުން.#visnun23 @ElectionsMv @presidencymv @mvpeoplesmajlis @psmnewsmv @MDPSecretariat… pic.twitter.com/GjU9s6D6ge— Ismail Habeeb (@IsmailHabeeb) September 25, 2023
މި ހަފްތާގެ ހޮނިހިރު ދުވަހު އޮންނަ ރިޔާސީ އިންތިހާބުގެ ދެވަނަ ބުރުގައި ވޯޓުލާން 6223 ވަނީ ރެޖިސްޓަރ ކޮށްފައެވެ. އެއީ އިންޑިއާ، އެކުވެރި އަރަބި އިމާރާތް، އިންގިރޭސިވިލާތް، ސްރީލަންކާ އަދި މެލޭޝިއާގައެވެ. މިގޮތުން އިންޑިއާގައި 2 ފޮށި، ލަންކާގައި ދެ ފޮށި، ބަހައްޓާއިރު، އިންގިރޭސި ވިލާތުގައި އެއް ފޮށި އަދި އެކުވެރި އަރަބި އިމާރާތުގެ އަބޫ ދާބީގައި އެއް ފޮށި ބަހައްޓާނެއެވެ. މިފަހަރު އެންމެ ގިނަ މީހުން ވޯޓުލާނީ މެލޭޝިއާއަށެވެ. އެއީ 2520 މީހުންނެވެ.
ރިޔާސީ އިންތިޙާބުގެ ދެވަނަ ބުރުގައި ވޯޓު ލުމަށް މި ހޮނިހިރު ދުވަހު ތައްޔާރުވަމުންދާއިރު، މިދިޔަ ހަފްތާ ތެރޭ ވަނީ ދެވަނަ ބުރަށް ރީރެޖިސްޓަރ ކޮށްފައެވެ. އެގޮތުން ރީރެޖިސްޓްރޭޝަން ކުރުމަށް ހުށަހެޅި ފަރާތްތަކުގެ ތެރެއިން ސައްޙަވީ 38763 ފަރާތެއްގެ ފޯމެވެ. އަދި އިތުރު 11284 ފޯމެއްގެ ސައްޙަކަން ކަށަވަރު ނުވާ ކަމަށް އީސީން ބުނެއެވެ.
ރިޔާސީ އިންތިޙާބުގެ ދެވަނަ ބުރުގައި ވޯޓު ލުމުގެ ހައްޤު ލިބިގެންވާ މީހުންގެ ޖުމްލަ އަދަދަކީ، 282،803 މީހުންނެވެ. ފުރަތަމަ ބުރުގައި ވޯޓު ލުމުގެ ހައްޤު ލިބިފައިވަނީ 282،395 މީހުންނަށެވެ.