ރާއްޖޭގައި ޙިދުމަތް ދެމުންދާތާ 18 އަހަރު ފަހުން ގިނަ ވަސީލަތްތަކާއި އެކު އުރީދޫގެ އަމިއްލަ އޮފީސް އިމާރާތް ހުޅުވައިފިއެވެ.
ހުޅުމާލެ ސެންޓްރަލް ޕާކު ކައިރީ ހުންނަ މި ޢިމާރާތަކީ ރާއްޖޭގައި އުރީދޫގެ މައި އޮފީހެވެ. މި އޮފީސް ހުޅުއްވައި ދެއްވީ، ރާއްޖޭގެ ރައިސުލްޖުމުހޫއްރީއްޔާގެ ނައިބް ފައިސަލް ނަސީމްއެވެ. އަރިހުގައި އުރީދޫގެ ގްރޫޕުގެ މެނޭޖިންގް ޑިރެކްޓަރ އަދި ސީއީއޯ އަޒީޒް އަލުތުމަން ފަޙްރޫ ވަނީ ހާއްސަ މެހެމާނެއްގެ ގޮތުގައި ބައިވެރިވެވަޑައިގެންފައެވެ. މީގެ އިތުރުން ރަސްމީއްޔާތުގައި އުރީދޫގެ މޯލްޑިވްސް މެނޭޖިންގް ޑިރެކްޓަރ ޚާލިދް އަލް ޙަމަދީ އާއި ސަރުކާރުގެ ވަޒީރުންނާއި ކުންފުނީގެ އިސްވެރިން ވަނީ ބައިވެރިވެވަޑައިގެންފައެވެ.
އުރީދޫގެ މައި އޮފީސް އިމާރާތަކީ ބޭސްމެންޓް ޕާކީން ހިމެނޭހެން ގިނަ ވަސީލަތްތަކާއި އެކު ތަރައްޤީ ކުރެވިފައިވާ 11 ބުރީގެ އިމާރާތެކެވެ. ޗައިނާގެ ސީސީއީސީ ކުންފުންޏާ ހަވާލުކޮށްގެން ބިނާކުރި އެ އިމާރާތުގައި މުވައްޒަފުންނަށް ފަސޭހަ ވާނެ ގިނަ ވަސީލަތްތައް ވަނީ ޤާއިމް ކުރެވިފައެވެ. އެގޮތުން މުވައްޒަފުންނަށް ހާއްސަ ކުއައިޓް ރޫމަކާއި، ހޭންގްއައުޓް އޭރިއާއަކާއި، ކެފޭ ޙިދުމަތާއި، މުވައްޒަފުންގެ ޖިމެއްގެ އިތުރުން، ކުޑަކުދިންނަށް ޙާއްސަ ސަރަހައްދެއް އޮފީހުގައި ވަނީ ޤާއިމް ކުރެވިފައެވެ. މިއީ ޒަމާނީ އޮފީހެއްގައި ހިމެނޭ ގިނަ ވަސީލަތްތަކާއި އެކު ހުޅުވާފައިވާ އިމާރާތެކެވެ.
ހޯމަ ދުވަހުގެ ރޭ ހުޅުމާލެ ސެންޓްރަލް ޕާކުގައި ބޭއްވި ރަސްމީއްޔާތުގައި އުރީދޫ ގްރޫޕުގެ މެނޭޖިންގް ޑިރެކްޓަރ އަޒީޒު އަލުތުމަން ފަޙްރޫ ދެއްކެވި ވާހަކަފުޅުގައި، ވިދާޅުވީ އުރީދޫ ގްރޫޕުގެ ދަށުން ހިންގާ ކުންފުނިތަކުގެ ތެރެއިން ރާއްޖެއަކީ ވަރަށް ޙާއްސަ ޖާގައެއް ދެވިފައިވާ ތަނެއް ކަމަށެވެ. އެގޮތުން އަލަށް ހުޅުވޭ ހެޑް ކުއާޓާސް އަކީ އުރީދޫއިން ރާއްޖެއަށް ކުރަމުންދާ އިންވެސްޓެމެންޓުގެ އަލިގަދަ ހެއްކެއް ކަމަށް ވިދާޅުވިއެވެ. އަދި އެކުންފުނިން ރާއްޖޭގެ ޑިޖިޓަލް ކުރިމަގު ބިނާ ކުރުމުގައި އައު ޓެކްނޮލޮޖީ ތައާރަފްކޮށް އެކަމުގެ މުހިންމު ބައިވެރިއެއްގެ ގޮތުގައި ދެމި ތިބޭނެ ކަމުގެ ޔަޤީންކަން ވަނީ އަރުވާފައެވެ.
ހަވާއެރުވުމުގެ ހަރަކާތްތަކާއި އެކު ބޭއްވިގެން ދިޔަ މި ކުލަ ގަދަ ހަފްލާގައި، އުރީދޫގެ މޯލްޑިވްސް ސީއީއޯ ޚާލިދު އަލް ހަމަދީ ވިދާޅުވީ، މި ހެޑްކުއާޓާސް ދައްކުވައިދެނީ ފާއިތުވި 18 އަހަރު ދުވަހު އުރީދޫގެ މުވައްޒަފުން ހޯދައި ދީފައިވާ ކާމިޔާބީ ކަމަށެވެ. އަދި އުރީދޫގެ މި ދިގު ދަތުރުގައި ރާއްޖޭގެ ރައްޔިތުންގެ ބައިވެރިވުމާއި، އަލި ގަދަ ކުރިމަގަކަށް ދަތުރުކުރާކަން ފެނިގެން ދާ ކަމަށް ވިދާޅުވިއެވެ. އޭނާ ވަނީ އުރީދޫގެ މަސައްކަތްތަކަށް ލިބެމުންދާ އެއްބާރުލުމަށް ހާއްސަ ޝުކުރެއް އަދާ ކޮށްފައެވެ.
Excited to unveil the Ooredoo Maldives Headquarters that showcases innovation, connectivity, and beauty all in one frame from a breathtaking perspective. pic.twitter.com/RQ80SzvxiC
— Ooredoo Maldives (@OoredooMaldives) September 25, 2023
އުރީދޫގެ އަމިއްލަ އޮފީހެއް ހުޅުވިގެން ދިޔައިރު، މިއީ ގިނަ ވަސީލަތްތަކެއް ޤާއިމް ކުރެވިފައިވާ ތަނެކެވެ. އުރީދޫން ވަނީ އޮފީސް ހުޅުވުމާއި ދިމާކޮށް އޮފީހުގެ ފޮޓޯ އަދި ވީޑިއޯ ނަގައިގެން ޙާއްސަ އިނާމެއް ލިބޭ ޕްރޮމޯޝަނެއްވެސް ފަށާފައެވެ.