ގެދޮރުވެރިޔާ ސްކީމުން ފްލެޓް ލިބޭ ފަރާތްތައް މިހާރު ޕޯޓަލް މެދުވެރިކޮށް ފެންނާނެ ކަމަށް ހައުސިންގް މިނިސްޓްރީން ހާމަކޮށްފިއެވެ.
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލެ ސަރަޙައްދުން ފްލެޓް ދޫކުރުމަށްޓަކައި ހިންގާ ގެދޮރުވެރިޔާ ސްކީމްގެ ފްލެޓަށް ކުރިމަތިލި ފަރާތްތަކުގެ ތެރެއިން ވަގުތީ ލިސްޓް ޕްލޭނިންގް މިނިސްޓްރީން ވަނީ އާންމުކޮށްފައެވެ. އޭގެ ތެރެއިން ފްލެޓް ލިބޭ ފަރާތްތަކާއި އަދި ވަގުތީ ލިސްޓަށް ޝަކުވާ ހުށަހެޅުމުގެ ފުރުޞަތު ހުޅުވާލުމުން، ހުށަހެޅުއްވި ޝަކުވާތައް މިހާރު އެ މިނިސްޓްރީން ބަލާފައިވާ ކަމަށް މިނިސްޓްރީން މިރޭ އާންމު ކުރި އިއުލާނެއްގައި ވަނީ ހާމަކޮށްފައެވެ.
މިހާރު ޝަކުވާތަކަށް ޖަވާބު ދިނުމަށް ފަހު ޝަރުޠު ހަމަވާ ފަރާތްތަކަށް ފްލެޓް ލިބޭކަން މިހާރު ގެދޮރުވެރިން ޕޯޓަލް މެދުވެރިކޮށް ފެންނަން ހުންނާނެ ކަމަށް މިނިސްޓްރީން ވަނީ ބުނެފައެވެ.
އަދި ޝަރުޠު ހަމަނުވާ ފަރާތްތަކަށްވެސް ޝަރުޠު ހަމަނުވާ ސަބަބު ބަޔާންކޮށް ޕޯޓަލް މެދުވެރިކޮށް ވާނީ ޖަވާބު ދެވިފައި ކަމަށްވެސް މިނިސްޓްރީން ބުނެއެވެ. އަދި ޝަރުޠު ހަމަނުވާ ފަރާތްތަކުގެ އިތުރު ޝަކުވާއެއް އޮތްނަމަ ކުރިޔަށްއޮތް 7 ދުވަހުގެ ތެރޭގައި ޕޯޓަލް މެދުވެރިކޮށް ޝަކުވާ ހުށަހެޅުމުގެ ފުރުޞަތު ހުޅުވާލެވިފައިވާ ކަމުގައި ޕްލޭނިންގް މިނިސްޓްރީން ބުނެއެވެ.
މި ސްކީމުގެ ދަށުން ދެ ކޮޓަރި އާއި ތިން ކޮޓަރި ހިމެނޭ މި ފްލެޓް ލިސްޓަށް ބަލާ އިރު، ދެ ކޮޓަރީގެ ފްލެޓް ލިބޭ މީހުންގެ ލިސްޓްގައި 6،208 މީހުން ހިމެނެ އެވެ. އަދި ތިން ކޮޓަރީގެ ފްލެޓް ލިބޭ މީހުންގެ ލިސްޓްގައި 14،489 މީހުން ހިމެނެ އެވެ.
މިނިސްޓްރީން ބުނީ ދާއިމީ ލިސްޓް އިޢުލާނުކުރުމުގެ ކުރިން ވަގުތީ ލިސްޓްގައި ޝަރުތު ހަމަވާ ކަމަށް ކަނޑައަޅާފައިވާ މީހުން ހުށަހަޅާފައިވާ ފޯމުގައި ދީފައިފައިވާ ދިރިއުޅުމުގެ ޙާލަތާ ގުޅޭ މަޢުލޫމާތުގެ ސައްހަކަން ކަށަވަރުކުރުމުގެ މަސައްކަތް މި މިނިސްޓްރީން ކުރަމުންދާނެ ކަމަށެވެ.