އަންނަ ހޮނިހިރު ދުވަހު ބާއްވާ ރިޔާސީ އިންތިހާބުގެ ދެވަނަ ބުރުގެ އެންމެ ފަހުގެ ތައްޔާރީތަކުގެ ތެރެއިން އަތޮޅުތަކަށް އިލެކްޝަން ކޮމިޝަން (އީސީ) އިން ވޯޓް ކަރުދާސް ފޮނުވަން ފަށައިފި އެވެ.
ކޮމިޝަނުން ސޯޝަލް މީޑިއާގައި ބުނީ ވޯޓް ކަރުދާހާ އެކީ ވޯޓްލާ މަރުކަޒުތަކަށް ބޭނުންވާ ތަކެތި މިހާރު އަތޮޅުތަކަށް ފޮނުވަމުން އަންނަ ކަމަށެވެ. މި މަސައްކަތް އީސީން ކުރިއަށް ގެންދަނީ އާންމު އުސޫލުގެ މަތިން ފުލުހުންގެ އެހީތެރިކަމާ އެކީގަ އެވެ.
ރިޔާސީ އިންތިޚާބު 2023 ގެ ދެވަނަ ބުރުގެ ވޯޓުލާ މަރުކަޒުތަކަށް ބޭނުންވާ ތަކެތި އަތޮޅުތަކަށް ފޮނުވުމުގެ މަސައްކަތް މިއަދު ފަށައިފި pic.twitter.com/WktcOWotMw
— Elections Commission (@ElectionsMv) September 27, 2023
އިންތިހާބުގެ ދެވަނަ ބުރުގައި ޖުމްލަ 586 ވޯޓްފޮށި ބަހައްޓާ އިރު، ވޯޓްލުމުގެ ހައްގު 282،804 މީހަކަށް ލިބިގެންވެ އެވެ. މީގެ ތެރެއިން 409 މީހުންނަކީ އަލަށް ވޯޓްލުމުގެ ހައްގު ލިބުނު މީހުންނެވެ. އިންތިހާބުގައި ރާއްޖެއިން ބޭރުގައި ވޯޓްފޮށި ބަހައްޓަނީ ފަސް ގައުމެއްގަ އެވެ. އެއީ އިންޑިއާ، ސްރީ ލަންކާ، މެލޭޝިއާ، ޔޫއޭއީ އަދި އިނގިރޭސިވިލާތެވެ.
ހޮނިހިރު ދުވަހު ބާއްވާ އިންތިހާބުގެ ދެވަނަ ބުރުގައި ވާދަކުރައްވަނީ އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒެވެ.
ވޯޓްލުން ކުރިއަށް ދާނީ ހޮނިހިރު ދުވަހުގެ ހެނދުނު 8:00 އިން ހަވީރު 5:00 އަށެވެ. ޖުމްލަ 8 ކެންޑިޑޭޓަކާ އެކީ އިންތިހާބުގެ ފުރަތަމަ ބުރު ބޭއްވީ މި މަހުގެ 9 ގަ އެވެ.