ޓޫރިޒަމް ދާއިރާގައި މަސައްކަތްކުރާ ހުރިގާ ފަރާތްތަކެއް ތަމްސީލުވާ ގޮތަށް އެޑްވައިޒަރީ ކޮމިޓީއެއް އުފައްދަވާނެ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެ އެވެ.
ރޭ މާލޭގައި ބޭއްވި އެ މަނިކުފާންގެ ކެމްޕޭން އިވެންޓެއްގައި ވިދާޅުވީ ޓޫރިޒަމް މިނިސްޓްރީގެ ތެރޭގައި އެޑްވައިޒަރީ ކޮމެޓީއެއް ނުވަތަ ކޮމިޝަނެއް އުފެއްދުމަށް އެ ދާއިރާގެ މުވައްޒަފުން އެ މަނިކުފާނަށް ހުށަހަޅުއްވާފައިވާ ކަމަށެވެ. އެހެންވެ އެ އެދުމާ އެއްގޮތަށް ކޮމެޓީއެއް އުފައްދަވައި، މަސައްކަތް ކުރައްވާނެ ކަމަށް ވިދާޅުވި އެވެ.
"އެއް ކަމަކަށް އެބޭފުޅުުން ހުށަހެޅުއްވި، މިނިސްޓްރީ އޮފް ޓުއަރިޒަމްގައި އެޑްވައިޒަރީ ކޮމެޓީއެއް ނުވަތަ ކޮމިޝަނެއް އުފައްދަން،' ރައީސް ވިދާޅުވި އެވެ. "އެއީ މުވައްޒަފުންނާއި ރިސޯޓު އޯނަރުންނާއި ޓުއާ އޮޕަރޭޓަރުންނާއި އެހެންގޮސް މި ދާއިރާގައި މަސައްކަތް ކުރާ ހުރިހާ ބައެއް ހިމެނޭ ގޮތަށް އެޑްވައިޒަރީ ކޮމެޓިއެއް އުފައްދައި އެ އެންމެންގެ ލަފާގެ މަތިން އިންޑަސްޓްރީ ކުރިއަރުވަން ގޮތްތަކެއް ނިންމުމަށް." ރައީސް ވިދާޅުވި އެވެ.
ރައީސް ވަނީ ޓޫރޒަމް ދާއިރާ އަށް މުހިއްމު ވައުދުތަކެއް ވެވަޑައިގެންފަ އެވެ. އެގޮތުން ޓޫރިޒަމް ދާއިރާގެ މަސައްކަތްތެރިންނަށް ބޯހިޔާވެހިކަން ފަހިކޮށް ދިނުމުގެ ގޮތުން ފްލެޓް ދިނުމާއި ހަފުތާއަކު ދެ ދުވަސް މުވައްޒަފުންނަށް ޗުއްޓީ ދިނުމާއި ޖެނެރަލް މެނޭޖަރުންގެ ލެވެލާ ހަމައަށް މީހުން ތަމްރީނު ކުރުމަށް ސްކޮލާޝިޕް ދިނުން ފަދަ ކަންކަން ހިމެނެ އެވެ.
ޓޫރިޒަމަކީ މިހާރު ރާއްޖޭގެ އިގުތިސާދު ބިނާވެފައި އޮތް ދާއިރާ އެވެ.