ރިޔާސީ އިންތިހާބުގެ ފުރަތަމަ ބުރުން އުންމީދުކުރި ގޮތަށް ހިލާފަށް މޮޅު ނުވެވުނީ މައިގަނޑު ތިން ސަބަބަކާ ހެދި ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެ އެވެ.
ކެމްޕޭނަށް ރޭ ދަންވަރު އައްޑު އަށް ވަޑައިގެން މިއަދު ހެނދުނު ހިތަދޫގައި ބޭއްވި އިވެންޓެއްގައި ވިދާޅުވީ އިންތިހާބު އެއްބުރުން ކާމިޔާބު ނުކުރެވުނު ތިން ސަބަބުގެ ތެރޭގައި ހިމެނެނީ މި މަހުގެ 9 ގައި އެންމެ ފަހު ވަގުތާ ހަމައަށް މަޑުކޮށް، އިންތިހާބުގައި ވޯޓްލާން މީހުން ނެރެން މަސައްކަތް ކުރަން ޖެހޭ ވަރަށް މަސައްކަތް ނުކުރެވުމާއި އެމްޑީީގެ ތެރޭގައި މި ފަހުން އުފެދުނު ހިޔާލު ތަފާތުވުންތަކާ ހެދި ޕާޓީން ވަކިވެގެން ދިޔަ މީހުން އަލުން އަނބުރާ ގެންނަން މަސައްކަތް ނުކުރެވުމާއި ސަރުކާރާ ބެހޭ ގޮތުން އިދިކޮޅު ފަރާތްތަކުން ފަތުރަމުން ދިޔަ ދޮގު ވާހަކަތަކައް ރައްދު ނުދެވުން ކަމަށެވެ.
އެހެންވެ އިންތިހާބުގެ ފުރަތަމަ ބުރުގެ ނަތީޖާއާ މުއާރަޖާކުރުމުން ފާހަގަވި މި ކަންތައްތައް ދެވަނަ ބުރުގައި ތަރުރާރު ވިޔަ ނުދިނުށް މަސައްކަތްކޮށް އާ ހިތްވަރާއި ޖޯޝަކާ އެކީ އިންތިހާބަށް ނުކުތުމުން ބޮޑުތަނުން ކާމިޔާބު ކުރެވޭނެ ކަމަށް ރައީސް ވިދާޅުވި އެވެ.
"އިރާދަކުރެވިއްޔާ މި ތިން ކަންތައް ކުރެވިއްޖެއްޔާ މި އިންތިހާބު އަޅުގަނޑުމެންނަށް މިއޮތީ ބޮޑުތަނުން ކާމިޔާބުވެފައި." ރައީސް ވިދާޅުވި އެވެ.
އެ މަނިކުފާނު ވިދާޅުވީ އަންނަ ހޮނިހިރު ދުވަހު ބާއްވާ ދެވަނަ ބުރުން މޮޅުވާން ކުރިއަށް އޮތް މިއޮތް 48 ގަޑިއިރުގެ ތެރޭގައި ވެސް ގިނަ މަސައްކަތްތަކެއް ކުރެވިދާނެ ކަމަށެވެ. އެހެންވެ އެ މަސައްކަތްކޮށް އެމްޑީޕީ އާއި އެ ޕާޓީގެ ބައިވެރިންކޮށް ދިނުމށް ރައީސް އެދިވަޑައިގެންނެވި އެވެ.