އަންނަ އަހަރު ބާއްވާ ރައްޔިތުުންގެ މަޖިލީހުގެ އިންތިހާބަށް އިތުރުކުރަން ނިންމި ހަ ދާއިރާއާ އެކީ 93 އިންތިހާބީ ދާއިރާގެ އާބާދީ ކަނޑައަޅާފައިވާ ގޮތުގެ ވަގުތީ ރިޕޯޓް އިލެކްޝަން ކޮމިޝަން (އީސީ) އިން އާންމުކޮށްފި އެވެ.
އެތަނުން ބުނީ މި ރިޕޯޓަށް ޝަކުވާ ހުށަހެޅުމުގެ ފުރުސަތު މިއަދުން ފެށިގެން އަންނަ މަހުގެ 19 އާ ހަމައަށް ހުޅުވާލާފައިވާ ކަމަށެވެ. އަންނަ އަހަރު މަޖިލީހަށް ހަ ގޮނޑި އިތުރުކުރަން ނިންމި އިރު، މިހާރު ހިނގަމުން އަންނަ މަޖިލީހުގެ މެމްބަރުންގެ އަދަދަކީ 87 އެވެ
ގޮނޑި އިތުރުވި ހަ ދާއިރާ އަކީ ހުޅުމާލެ މެދު ދާއިރާ އާއި ހުޅުމާލެ އުތުރު ދާއިރާ އާއި ހިތާދޫ ދާއިރާ (ބ. ހިތާދޫ، މާޅޮސް، ދަރަވަންދޫ) ދާއިރާ އާއި ހުރާ ދާއިރާ (ކ. ހުރާ، ހިންމަފުށި، ގުޅީ) އާއި ކޮލަމާފުށި ދާއިރާ (ގއ. ކޮލަމާފުށި، ދެއްވަދޫ) ގެ އިތުރުން އައްޑޫ ފޭދޫ އުތުރު ދާއިރާ (ފޭދޫ/މަރަދޫފޭދޫ) އެވެ.
މި ބަދަލާ އެކު، ބ. އޭދަފުށި، ގއ. ވިލިނގިލި އަދި ރ. މީދޫ ދާއިރާގައި އޮންނާނީ އެ ދާއިރާއަށް ނިސްބަތްވާ ރަށް އެކަންޏެވެ.
އީސީން އާންމުކުރތި ރިޕޯޓުގައިވާ ގޮތުން ބައެއް އިންތިހާބީ ދާއިރާތަކުގެ ނަމަށް ވެސް ބަދަލު އައިސްފައިވެ އެވެ. އެގޮތުން ހުޅުމާލެ ދާއިރާގެ ނަން، ހުޅުމާލެ ދެކުނު ދާއިރާއަށް، ކ. ގުރައިދޫ ދާއިރާގެ ނަން މާފުށި ދާއިރާއަށް، ތ. ގުރައިދޫ ދާއިރާގެ ނަން ގުރައިދޫ ދާއިރާއަށް އަދި ފޭދޫ ދާއިރާގެ ނަން ފޭދޫ ދެކުނު ދާއިރާގެ އަށް ބަދަލުކޮށްފައިވެ އެވެ.
އަންނަ އަހަރުގެ މަޖިލިސް އިންތިހާބު ބާއްވާނެ ތާރީހެއް އީސީން އަދި ނުނިންމަ އެވެ.