ސަރުކާރުގެ ފުރަތަމަ 100 ދުވަހަށް އަދި މިހާތަނަށް ކެމްޕެއިން ތެރެއިން އެއްވެސް ވަޢުދެއް ނުވާ ކަމަށް ޕީއެންސީގެ ރިޔާސީ ކެނޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ޕީއެންސީގެ ރިޔާސީ ކެނޑިޑޭޓް ޑރ. މުއިއްޒު މިހެން ވިދާޅުވީ، އީއްޔެ އައްޑޫސިޓީއަށް ކުރެއްވި ދަތުރުފުޅެއްގައި ފޭދޫ ރައްޔިތުންނާއި އެކު ބޭއްވި ސުވާލާއި ޖަވާބު ސެޝަނެއްގައެވެ. އެ ސެޝަނުގައި މީހަކު ވަނީ ޕޭޕަލް ފަދަ ޕްލެޓްފޯމްތައް ގެނައުމަށް ވައުދު ވެފައިވާއިރު، އެކަން ފުރަތަމަ 100 ދުވަހުގެ ތެރޭ ވާނެތޯ ސުވާލު ކުރައްވާފައެވެ.
ސުވާލަށް ޖަވާބު ދެއްވަމުން، ސަރުކާރުން ކަންކަން ސިއްރުކޮށްފައި އޮތް މިންވަރު ބޮޑުކަމުން އެއްވެސް ފަރާތަކަށް ކަންކަން އޮތް ގޮތުގެ ތަފްސީލެއް ނޭނގޭ ކަމަށެވެ. ދަރަންޏާއި އަދި މިފަދަ ކަންކަން ހުރި މިންވަރު ނޭނގި ވަޢުދުވުމަކީ ކުރާނެ ކަމެއް ނޫން ކަމަށް މުއިއްޒު ވިދާޅުވިއެވެ.
" އެހެން ނަމަވެސް އިރާދަކުރެއްވިއްޔާ މިކަން ކާމިޔާބުވެ، ދެން މިފެށޭ ޓްރާންސިޝަން ޕީރިއަޑްގެ ތެރޭގައި އޮފީސްތަކަށް ވަދެ ވާނުވާ ބެލުމަށްފަހު 100 ދުވަހުގެ ތާވަލެއް ހަދާނަން. " މުއިއްޒު ވިދާޅުވިއެވެ.
މުއިއްޒުގެ ފުރަތަމަ 100 ދުވަހުގެ ތެރޭ މައިގަނޑު ގޮތެއްގައި ޚާރިޖީ ސިޔާސަތު ރަނގަޅުކުރުމާ، އިޤްތިޞާދު ރަނގަޅުކުރަން އަދި ޚަރަދަށް ޒިންމާވުމުގެ ޤާނޫނުން ސަސްޕެންޑްކޮށްފައިވާ މާއްދާ އަލުން ތަންފީޒުކުރެވޭނެގޮތް ހެދުމަށް މަޖިލީހަށް ހުށަހަޅުއްވާނެ ކަމަށް ވިދާޅުވިއެވެ. އަދި އޭގެ އިތުރުން އެ މާއްދާ އުވާ ނުލެވުނަސް ސަރުކާރުން ފައިސާ ޗާޕް ކުރުން ހުއްޓާލާނެ ކަމަށް ވިދާޅުވިއެވެ.