އައްޑޫ މަރަދޫގައި އުމުރުން ދުވަސް މީހެއް ދިރިއުޅެމުންދިޔަ ގެއަކަށް ވަދެ ބަނުމަށް ފަހު ފައިސާތަކެއް ފޭރިގަނެފައިވާ ކަމަށް ފުލުހުން ބުނެފި އެވެ.
ފުލުހުންނަށް މި ހަދިސާ ރިޕޯޓްކޮށްފައިވަނީ މިއަދު ހެނދު 6:17 ގައެވެ. މި ހާދިސާގައި އަނިޔާކޮށް ފައިސާ ފޭރިގަނެފައިވަނީ އުމުރުން 81 އަހަރުގެ ފިރިހެނެއްގެ އަތުންނެވެ. އެމީހާ ދިރިއުޅޭ ގެއަށް ވަން މީހާ، އުމުރުން ދުވަސްވީ މީހާ ބަނދެފައިވާއިރު އެމީހާ ސަލާމަތްވުމަށް މަސައްކަތް ކުރުމުގެ ތެރޭ އަތުގެ މުލައްދަނޑިއަށް ވަރަށް ބޮޑަށް އަނިޔާވެފައިވާ ކަމަށް ފުލުހުން ބުނެއެވެ.
އޭނާ ވަނީ ފަރުވާ ދިނުމަށް އައްޑޫ އެކުއެެޓޯރިއަލް ހޮސްޕިޓަލަށް ގެންގޮސްފައެވެ. އަދި މިހާރު އޭނާއަށް ހޮސްޕިޓަލުގައި ދަނީ ފަރުވާ ދެމުންނެވެ.
މިމައްސަލާގައި ފުލުހުން ވަނީ އުމުރުން 50 އަހަރުގެ މީހެއް ހައްޔަރުކޮށްފައެވެ. އަދި މައްސަލަ މިހާރު ފުލުހުން ތަހުޤީޤު ކުރަމުންދާ ކަމަށް ވަނީ ބުނެފައެވެ. މިމައްސަލާގައި އުމުރުން ދުވަސްވީ މީހާއަތުން ފޭރިގަނެފައިވަނީ ކިހާ އަދަދެއްގެ ފައިސާ ކަމެއް ފުލުހުން ހާމައެއް ނުކުރެއެވެ.
މީގެ ކުރިންވެސް ބިރުދައްކައި ފޭރުމުގެ މައްސަލަތައް ފެންމަތިވެފައިވެއެވެ. ނަމަވެސް މިގޮތަށް ދިރިއުޅޭ ގެއަށް ވަދެ ބަނދެ ރަހީނުކޮށްގެން ފޭރުމުގެ މައްސަލަ އެއް އައްޑޫއިން ފާހަގަވެފައި ނެތެވެ. މާލެ ސަރަހައްދުގައި މަގުމަތިން މީހުން ރަހީނުކޮށް ބިރުދައްކަގައިން އެކައުންޓުގައި ހުރި ފައިސާ އަނިޔާކޮށްގެން ފޭރިގަނެފައިވާ މައްސަލަ ފުލުހުންނަށް ރިޕޯޓް ކުރެވިފައި އެބަހުއްޓެވެ.