ރައްޔިތުންގެ މަޖިލީހުގެ މައްޗަންގޯޅި ދެކުނު ދާއިރާގެ ކުރީގެ މެންބަރު އަބްދުﷲ ސިނާން އެމްޑީޕީއާ ގުޅިވަޑައިގެންފި އެވެ.
އޭނަ އެ ޕާޓީ އަށް ސޮއިކުރައްވައި ފޯމް ހަވާލުކުރެއްވީ ޗެއާޕާސަން ފައްޔާޒް އިސްމާއީލާ އެވެ. ސިނާނަކީ ކުރީގެ ރައީސް އަބްދުﷲ ޔާމީންގެ ދައުރުގައި މަޖިލީހުގެ ގޮނޑި ގެއްލުވާލި 12 މެންބަރުންގެ ތެރޭގައި ހިމެނިވަޑައިގަތް ބޭފުޅެކެވެ.
ސިނާން އެމްޑީޕީއާ ގުޅިވަޑައިގަޔް އިރު، މައްޗަންގޯޅި ދެކުނު ދާއިރާގެ މިހާރުގެ މެންބަރު އަހުމަދު ހައިތަމް މިއަދު ވަނީ އެމްޑީޕީން ވަކިވެވަޑައިގެންފަ އެވެ.
ދާދި ފަހުން އެމްޑީޕީން ވަކިވި މަޖިލިސް މެމްބަރުންގެ ތެރޭގައި ފޮނަދޫ ދާއިރާގެ މެމްބަރު މޫސާ ސިރާޖް ވެސް ހިމެނެ އެވެ. އޭނަ މި ހަފުތާގައި ވަނީ ޕީޕީއެމަށް ސޮއިކުރައްވައިފަ އެވެ.
އެމްޑީޕީ އަށް ކުރިން މަލިޖީހުގައި ސުޕަ މެޖޯރިޓީ އޮތް ނަމަވެސް އެ ޕާޓީ އަށް ނިސްބަތްވި 12 މެމްބަރަކު ޕާޓީން ވަކިވެވަޑައިގަތުމުން ސުޕަ މެޖޯރިޓީ ގެއްލިފައިވެ އެވެ. އެ މެމްބަރުންނަކީ ފަހުން މި އަހަރުގެ ރިޔާސީގެ ފުރަތަމަ ބުރުގައި ވާދަކުރި ޑިމޮކްރެޓްސް އުފެއްދެވި ބޭފުޅުންނެވެ.
އެ ޕާޓީ އުފެއްދީ މަޖިލީހުގެ ރައީސްގެ މަގާމުގައި ހުންނެވި މުހައްމަދު ނަޝީދު އިސްކޮށް ހުންނަވައިގެންނެވެ.