އައްޑޫގެ ތަރައްޤީގެ ނާރެހާއި ގުޅިފައިވަނީ ގަމުގެ ވައިގެ ބަނދަރެވެ. އިނގިރޭސިން ގަމުގައި އުޅުނު ދުވަސްވަރު ބިނާކުރި އެއާޕޯޓަށް 50 އަހަރަށް ވުރެ ގިނަ ދުވަސް ވެފައިވާއިރު މިތަނުގެ ފުރިހަމަ ފައިދާ އައްޑޫ ރައްޔިތުންނަކަށް ނުލިބެއެވެ.
އައްޑޫ ތަރައްޤީވެ ކުރިއަރައިގެންދަނީ މި އެއާޕޯޓް ތަރައްޤީވެގެން ކަމާއި މެދު ޝައްކެއްނެތެވެ. އެހެންވެ އެ މަސައްކަތް އައްޑޫ މީހުން ކުރާތާ އެތަކެއް އަހަރުތަކެއް ވެއްޖެއެވެ. ނަމަވެސް މިކަން ނުކުރެވި މިވަނީ ސިޔާސީ މަގްސަދާހެދިއެވެ.
ރައީސް މައުމޫނު ސަރުކާރުން އެދުވަސްވަރުގެ މިންގަޑަށް ފައްތައިގެން ގަމުގެ އެއާޕޯޓް އިންޓަނޭޝަނަލް ކުރިއެވެ. ނަމަވެސް އެތަނުގެ ބޭނުން އެންމެ ފުރިހަމަ ގޮތުގައި ނެގޭގޮތްނުވިއެވެ. ގިނަ މީހުން ނަޒަރުގައި އެއީ ނަމަކަށް އިންޓަނޭޝަނަލް އެއާޕޯޓް ނަންބޯޑު ހަރުކުރީއެވެ.
ރައީސް ނަޝީދު ވެރިކަމާއި ހަވާލުވެ ވަޑައިގަތް ހިސާބުން ގަމުގެ އެއާރޕޯރޓް ތަރައްޤީކުރުމުގެ މަސައްކަތް ފެށިއެވެ. ގަން އިންޓަރނެޝަނަލް އެއާޕޯރޓްސް ކޮމްޕެނީއެއް އުފައްދާ ސަރުކާރާއި، އެސްޓީއޯ އަދި ގަން އެއަރޕޯރޓްސް ކޮމްޕެނީ ހެމެނޭ ގޮތަށް ޖޮއިންޓް ވެންޗަރ ކުންފުންޏެއް އުފައްދާ ގަމުގެ އެއަރޕޯރޓް ތަރައްޤީކުރުމުގެ މަަސައްކަތް ފެށިއެވެ. ނަމަވެސް އެކަންވެސް ތަފާތު ސަބަބުތަކާއި ހެދި ވަނީ ނުކުރެވިއެެވެ.
މިހާރު އަނެއްކާވެސް ގަން އެއާޕޯޓް ތަރައްޤީ ވެދާނެ ކަމުގެ ކުލަވަރު ފެންނަން ފަށައިފިއެވެ. ގަން އެއާޕޯޓްސްގެ 30 އިން ސައްތަ ހިއްސާ ޗަމްޕާ އަފީފްގެ ބޮޑު ހިއްސާއެއް އޮންނަ ކާސާ ހޯލްޑިން އަށް ވިއްކާލާފައިވާ އިރު އެއާޕޯރޓް ތަރައްޤީކުރުމަށް ހުޅުވާލި ފުރުސަތުގައި ޕްރޮޕޯސަލް ހުށަހެޅި ފަރާތަކުގެ ބިޑް އިވެލުއޭޝަން މިހާރު އަންނަނީ ކުރެވެމުންނެވެ. އެގޮތުން ޕްރޮޕޯސަލް ހުށަހެޅި ހޯގާރޑް އާއި ލަގާންގެ ޕްރޮޕޯސަލް ތަަކުގެ އިވަލުއޭޝަން ނިމި މި މަހުގެ 16 ހާ ހިސާބުގައި ބިޑް ކާމިޔާބު ކުރި ފަރާތް އިއުލާން ކުރެވެ ވަރުވާނެކަމަށް އައްޑޫ އިންޓަނޭޝަނަލް އެއާޕޯރޓްސް ކޮމްޕެނީގެ މެނޭޖިން ޑިރެކްޓަރ ޝާހިދު އަލީ (ޝާޑް) ވަނީ ވިދާޅުވެފައިއެވެ.
ނަމަވެސް މިކަމުގައި އަދި ވެސް ކަންބޮޑުވުންތައް އެބަހުރިއެވެ. ގަން އެއާރޕޯޓްސް ކޮމްޕެނީ އާއި، އެސްޓީއޯ އަދި އެމްއޭސީއެލް އާއި ކާސާ ހޯޅްޑިންގެ ފުރަތަމަ ބޯޑު މީޓިން މިދިޔަ ހަފްތާގެ ބުރާސްފަތި ދުވަހު ބޭއްވުނު އިރު އައްޑޫ އިންޓަނޭޝަނަލް އެއާޕޯރޓްސް ކޮމްޕެނީ ބޯޑަށް ސަރުކާރުން އިތުރު ތިން މެމްބަރަކު ވަނީ އައްޔަން ކުރަންޖެހިފައެވެ.
މިހާރުގެ ބޯޑުގައި ހިމެނިވަޑައިގަންނަވަނީ އެސްޓީއޯގެ ފަރާތުން އެތަނުގެ މެނޭޖިން ޑިރެކްޓަރ ޝާހިދުއަލީ (ޝާޑް) އާއި ގަން އެއާޕޯރޓްސް ކޮމްޕެނީގެ ފަރާތުން އަބްދުﷲ ނަސީރު އާއި އެމްއޭސީއެލްގެ ފަރާތުން އެކުންފުނީގެ މެނޭޖިން ޑިރެކްޓަރ ޑރ. އިބްރާހިމް މަހުފޫޒް އެވެ. ކަސާ ހޯލްޑިންގެ ފަރާތުން އިބްރާހިމް ނޫރައްދީން އާއި ޗަމްޕާ ހަސަން އަފީފް ހިމެނިވަޑާއިގަންނަވާ އިރު ސަރުކާރުން އިތުރު ތިންބޭފުޅަކު ވަނީ އައްޔަން ކުރަންޖެހިފައިއެވެ.
މިހާރުގެ ސަރުކާރު އުފެދިފައިވާ ގޮތުން މިތިން މަގާމަށް އައްޔަން ކުރާނެ ފަރާތްތަކާއި މެދު މިހާރުވެސް ތަފާތު ވާހަކަ ތައް ދެކެވެން ފަށައިފިއެވެ. އެއްވެސް ކަހަލަ ޤާބިލްކަމެއް ނެތް ޕާރޓީ ފިކުރުގެ އެކްޓިވިސްޓުންތަކަކަށް މި މަގާމުތައް ދީފާނެ ކަމުގެ ވާހަކަ ތައް އެބަ އިވެއެވެ. އެހެން ވެއްޖެ ނަމަ އަނެއްކާވެސް މި މަސައްކަތް ނާކާމިޔާބު ވެދާނެ ކަމުގެ ބިރު އެބައޮތެވެ.
ރައީސް މުހައްމަދު ވަހީދު ސަރުކާރުގެ އެޑްވައިޒަރުންނަށް ތިބީ އައްޑޫ މީހުންނެވެ. ޑރ. ހަސަން ސައީދާއި، އިބްރާހިމް ލުޠުފީ (ސަންދާނު ލުޠުފީ) އަދި ސަންދާނު އަހައްމާއިދީ ފަދަ ބޭބޭފުޅުން މިކަމާއި މެދު ވިސްނަންޖެހޭނެއެވެ،
ޖީއެމްއާރު އަތުން އިބްރާހިމް ނާސިރު އިންޓަނޭޝަނަލް އެއާޕޯރޓް ނެގުމަށް ފަހު އެ އެއާޕޯޓް ހިންގުމަށް ސަރުކާރުން ވަކި ކުންފުންޏެއް ހަދާފައިވާ އިރު އެކުންފުނީގެ ބޯޑަށް މީހުން ނެގުމަށް ކުރީ އިއްލާނެވެ.
ޝަރުޠަކަށް އޮތީ އިކޮނޮމިކްސް އާއި ބިޒްނަސް އާއި ފައިނޭންސް އާއި އެކައުންޓިން އާއި އިންޖިނިއަރިން އާއި އޭވިއޭޝަން އަދި މެނޭޖްމަންޓުގެ ދާއިރާ އިން ތަޖުރިބާ ލިބިފައިވާ ބަޔަކަށް ވާންޖެހޭނެ ކަމަށެވެ. އަދި ކުރިމަތިލާ ފަރާތަށް އިވެލުއޭޓް ކުރުމަށް ހަމަޖެހިފައިވަނީ މާކްސް ދީގެންނެވެ. އެއީ ކޮލިފިކޭޝަނަށް 30 ޕަސެންޓް، ކޯޕަރޭޓް ޑައިރެކްޓާސް އެންޑް ސެކްރެޓަރީ ސެޓްފިކެޓް އޮންނަ މީހުންނަށް ފަސް ޕަސެންޓް، ތަޖުރިބާ އަށް 35 ޕަސެންޓް އަދި އިންޓަވިއު އަށް 30 ޕަސެންޓްގެ އުސޫލުންނެވެ.
ނަމަވެސް އައްޑޫ އިންޓަނޭޝަނަލް އެއާޕޯރޓް ބޯޑަށް މީހުން ސަރުކާރުން އައްޔަން ކުރަން ނިންމާފައިވާ އިރު މާލޭ އެއާޕޯރޓްސް ލިމިޓެޑްއަށް މީހުން ނެގުމަށް އިއްލާން ކުރުމުން މިކަމަށް ސަރުކާރުން ދޭ އަހަމިއްޔަތު އެބަ ފެނިގެން ދެއެވެ.
އައްޑޫ އިންޓަނޭޝަނަލް އެއާޕޯޓް ބޯޑަށް މީހުން ލުން ސިޔާސީ ނުކުރުމަށް އައްޑޫ ޑިވެލޮޕްމެންޓް ކޮމެޓީންވެސް ވަނީ އިލްތިމާސް ކޮށްފައިއެވެ. އައްޑޫ ރައްޔިތުން އެދެނީ މިހާރުގެ ސަރުކާރުން މިކަމާއި ފުންކޮށް ވިސްނަވާ އަވަސް ގޮތަކަށް ގާބިލް މީހުން ހޯދުމަށް އިއްލާން ކުރުމަށެވެ. މިކަމަށް ގާބިލް އެތައް އައްޑޫ ދަރިންނެއް މި ރާއްޖެ އެބަ ތިއްބެވެ. އެދަރިން އައްޑޫ ތަރައްޤީކުރާނެއެވެ. ސިޔާސީ ކުލަވަރު ނުޖައްސައި މި ފުރުސަތު ފަންނީ ގާބިލް ބޭފުޅުންނަށް ދެއްވާށެވެ.
އައްޑޫ އެއާޕޯޓަކީ ސިޔާސީ ތަނަކަށް ނަހައްދަވާށެވެ. އައްޑޫގެ ކުރިމަގަށް ހުރަސް ނާޅުއްވާށެވެ.