މާލެ ސަރަހައްދުން ދޫކުރުމަށް ނިންމި ހުރިހާ ގޯތީގެ އިން ވަކިކޮށް ނޮވެމްބަރު މަހުގެ 5 ވަނަ ދުވަހުގެ ކުރިން ގޯތީގެ ރަޖިސްޓްރީ ހަވާލުކޮށް ދެއްވާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރައީސް ސޯލިހުގެ ސަޕޯޓަރުންނާ އެކު ރޭ މާލޭގައި ބޭއްވި ކެމްޕެއިން ޖަލްސާގައި ވާހަކަ ދައްކަވަމުން ރައީސް ސޯލިހު ވިދާޅުވީ ފާއިތުވި 40 އަހަރުގެ ތެރޭގައި މާލޭގެ ރައްޔިތުންނަށް ގޯއްޗެއް ދޭން ކެރުނު ސަރުކާރެއް މި ނޫނީ ނާންނަ ކަމަށެވެ.
ރައީސް ސޯލިހު ވިދާޅުވީ މާލޭގައި ދިރިއުޅޭ ރައްޔިތުންގެ ބޯހިޔާވަހިކަމަށް ހައްލު ހޯދައިދިނުމަކީ އެމަނިކުފާން ވެވަޑައިގެންނެވި ވައުދެއް ކަމަށާއި، އެކަން މިހާރު ކުރިއަށްދާ ކަމަށެވެ.
"އަޅުގަނޑުމެން މި ރޭ ވެސް މި ޔަގީން ކަން އަރުވަނީ މި ދައުރުގެ ތެރޭގައި ފަހެއް ނޮވެމްބަރަށް އަޅުގަނޑުމެން މިހާރު މި ދޫކޮށްފައި ހުރި ހުރިހާ ގޯތިތަކެއްގެ އިން ވަކިކޮށް ބިން ކަނޑައި އެ ބޭފުޅުންނަށް ރަޖިސްޓްރީ ހަވާލު ކުރާނަން." ރައީސް ވިދާޅުވި އެވެ.
ރައީސް ވިދާޅުވީ އަންނަ ދައުރަށް އިންތިހާބުވެއްޖެނަމަ މި ދޫކުރެވުނު ގޯތި ތަކުގައި އިމާރާތް ކުރެވޭނެ އިންތިޒާމް ހަމަޖައްސާނެ ގޮތުގެ ވައުދުވެސް ވެފައިވާ ކަމަށެވެ. އަދި އެކަންވެސް ރައްޔިތުންނަށް ކޮށްދޭނީ އެމްޑީޕީގެ ސަރުކާރަކުން ކަމަށެވެ.
"ގޯތިތައް އިމާރާތް ކުރެވޭނެ ގޮތް ހަދަދީ އެފައިސާ އަނބުރާ ދެއްކޭނެ ގޮތް އަޅުގަނޑުމެން ހައުސިން ބޭންކުގެ ތެރެއިން އެ ފައިސާ މރާއްޖޭގެ ރައްޔިތުންނަށް ލިބޭނެ ގޮތް އިރާދަ ކުރެއްވިއްޔާ ހަދާނަން" ރައީސް ސޯލިހު ވިދާޅުވިއެވެ.
ރައީސް ވިދާޅުވީ އިދިކޮޅު ކެންޑިޑޭޓުގެ ފަރާތުން މިހާރު ދޫކޮށްފައިވާ ގޯތިތަކުގައި އިމާރާތްކޮށްދެނެ ކަމަށާއި ގޯތި އަތޔނުލާނެ ކަމަށް ވިދާޅުމަުން އަންނަކަމަށެވެ. ނަމަވެސް އެ ބޭފުޅުންގެ ޕީޕީއެމްގެ ވެރިކަމެއްގައި ކަންވެގެން ދިޔަ ގޮތް ރައީސް ވިދާޅުވެ ދެއްވި އެވެ.
އެގޮތުން ގުޅީ ފަޅުން ގޯތި ލިބުނު މީހުންނަށް 24 ގަޑި އިރުގެ މުހުލަތެއް ދިނުމަށް ފަހު ފުލުހުން އެރަށައް އަރުވައި ރައްޔިތުން އެރަށުން ބޭލި ކަމަށާއި، ގޮދެރުވެރިކަމުގެ ދަށުން ހުޅުމާލޭގައި ކުރިއަށްގެންދިޔަ ސީލައިފް އާއި ކޭޕާކް އަދި ޖާހު ގާޑަންގެ ކަންތައް ވެގެންދިޔަ ގޮތް ރައީސް ވިދާޅުވިއެވެ.
މި ސަރުކާރުގެ ބިންވެރިޔާ ސްކީމްގެ ދަށުން 18،955 މީހަކު ގޯއްޗަށް ޝަރުތު ހަމަވާ ކަމަށް ސަރުކާރުން ވަނީ ބުނެފަ އެވެ. އަދި ސަރުކާރުން ވަނީ މާލޭގައި ދިރިއުޅޭތާ 20 އަހަރުވެފައިވާ މީހުންނަށްވެސް ގޯތި ދިނުމަށް ހުޅުވާލާފަ އެވެ.