ރިޔާސީ އިންތިހާބުވެ ދެވަނަ ބުރުގެ ވޯޓްލުން ފެށިތާ ދެ ގަޑިއިރު ތެރޭގައި 65،000 އަށް ވުރެ ގިނަ މީހުން ވޯޓް ލައިފި އެވެ.
ވޯޓާ ގުޅޭ ގޮތުން އިލެކްޝަން ކޮމިޝަން (އީސީ) އިން އެންމެ ފަހުން އާންމުކުރި ތަފާސްހިސާބުތަކަށް ބަލާ އިރު، ހެނދުނު 10:00 އާ ހަމައަށް ޖުލްމަ 65،600 މީހުން ވޯޓް ލާފައިވެ އެވެ. މީގެ ތެރޭގައި ހިމެނެނީ 38،309 ފިރިހެނުންނާއި 27،291 އަންހެނުންނެވެ.
ވޯޓްލުމުގެ ހައްގު ޖުމްލަ 282،84 މީހަކަށް ލިިބިގެންވެ އެވެ.
ވޯޓްލުން ފެށީ ހެނދުނު 8:00 ގަ އެވެ. އަދި ވޯޓްލުން ކުރިއަށް ދާނީ ހަވީރު 5:00 އާ ހަމައަށެވެ.
ދެވަނަ ބުރުގެ ވޯޓަށް ޖުމްލަ 586 ފޮށި ބަހައްޓާފައިވެ އެވެ. ރާއްޖެ އިން ބޭރުން ވޯޓްފޮށި ބެހެއްޓި ގައުމުތަކަކީ އިންޑިއާ، ސްރީ ލަންކާ، މެލޭޝިއާ، ޔޫއޭއީ އަދި އިނގިރޭސިވިލާތެވެ.
ރިޔާސީ އިންތިހާބުގެ ދެވަނަ ބުރުގައި ވާދަކުރައްވަނީ އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒެވެ.