އިއްޔެ ބޭއްވި ރިޔާސީ އިންތިހާބު ޕީއެންސީގެ ކެންޑީޑޭޓް ޑރ. މުހައްމަދު މުއިއްޒު ކާމިޔާބުކުރެއްވުމާ ގުޅިގެން ދެން އޮތީ ބަދަހިކަމާއި އެކީ ގައުމާއިގެން ކުރިއަށް ދިއުން ކަމަށް ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމު އަލީ ސައީދު ވިދާޅުވެއްޖެ އެވެ.
ސޯޝަލް މީޑިއާގައި އޭނަ ވިދާޅުވީ މި ވަގުތަކީ ގައުމު އެއްބައިވަންތަވާންވީ ވަގުތު ކަމަށެވެ.
"[މިއީ] އެކުވެރިކަމާއި އަހުވަންތަކަމުގެ ސަފުތައް ބަދަހިކޮށް ގައުމާ އެކު ކުރިއަށް ދާންވީ ވަގުތު." ޝަހީމު ވިދާޅުވި އެވެ.
ރައީސް ޔާމީން އަބްދުﷲ ޔާމީންގެ ވެރިކަމުގައި އިސްލާމިކް މިނިސްޓަރުކަން ކުރެއްވި ޝަހީމަކީ މުއިއްޒުހެ ކެމްޕޭންގައި ވަރަށް އިސްކޮށް އުޅުއްވި އެކެކެވެ. އެގޮތުން ކެމްޕޭން ތެރޭގައި އޭނަ އެންމެ ބޮޑަށް އެދިވަޑައިވަގަތީ ގައުމުގެ ހަމަޖެހުމާއި ކުރިއެރުމަށްޓަކައި މުއިއްޒު ހޮވައިި ދެއްވުމަށެވެ.
ވަގުތީ ނަތީޖާ ދައްކާ ގޮތުން މުއިއްޒު އިންތިހާބު ކާމިޔާބުކުރެއްވީ 126,842 ވޯޓުންނެވެ. އެއީ ވޯޓްލީ މީހުންގެ 53.9 ޕަސެންޓެވެ. އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހަށް ލިބިވަޑައިގަތީ 108,500 ވޯޓެވެ. އެއީ ވޯޓްލީ މީހުންގެ 46.1 ޕަސެންޓެވެ.