މުޢިއްޒާ އެކީ އައްޑު އަށް އޮތީ ކޮން ކަމެއް؟

ރާއްޖޭގައި މިހާތަނަށް ބޭއްވުނު އެންމެ ކާމިޔާބު އެއް ރިޔާސީ އިންތިހާބަކީ އީއްޔެ ބޭއްވިގެން ދިޔަ ރިޔާސީ އިންތިހާބު ކަމަށް އިލެކްޝަންސް ކޮމިޝަނުން ވިދާޅުވެއެވެ. ރާއްޖޭގެ 2 ވަނަ ޖުމުހޫއްރިއްޔާގެ 6 ވަނަ ރައީސް، އިބްރާހިމް މުހައްމަދު ސާލިޙް ބަލިކުރައްވާ، އިދިކޮޅު ކެނޑިޑޭޓް އަދި ކުރިއަށް އޮތް ތަނުގައި ރާއްޖޭގެ 2 ވަނަ ޖުމުހޫއްރީއްޔާގެ 7 ވަނަ ރައީސްއަށް ޑރ. މުހައްމަދު މުޢިއްޒު މިވަނީ ހޮވިވަޑެންގަފައެވެ.

މި އިންތިހާބުގެ ކަންކަން އީއްޔެ ނިމިގެން ދިޔައިރު ޑރ. މުއިއްޒުއަށް މުޅި ރާއްޖޭގެ ދެ އަތޮޅެއް ފިޔަވައި ހުރިހާ އަތޮޅަކުންވެ މެޖޯރިޓީވަނީ ލިބިފައެވެ. މެޖޯރިޓީ ނުލިބުނީ އެއީ އއ. އަތޮޅާއި އެންމެ ދެކުނުން އައްޑޫސިޓީ އިންނެވެ. އެމްޑީޕީއަށް މި އިންތިހާބުގައި ލިބުނު ކުޑަ ކަމީޔާބީ އަކީ އައްޑޫގައި އެމްޑީޕީގެ މެޖޯރިޓީ ދެމެހެއްޓުމެވެ. ކޮންމެ ގޮތެއް ވިޔަސް، މިއަދަށް އަލިވިލުނީ އިންތިހާބީ ރައީސް ޑރ. މުހައްމަދު މުޢިއްޒު އާއި އެކުގައެވެ.

ރާއްޖޭގެ ދެކުނުން އޮތް އައްޑޫސިޓީގެ ރައްޔިތުންގެ ހިތުގައި އޮތް އެންމެ ބޮޑު ސުވާލަކަށްވީ، އައްޑޫގައި މިވަގުތު މި ސަރުކާރުން އެތައް ޙަރަދެއްކޮށްގެން ކުރިއަށް މިގެންދާ ބިޔަ ބޮޑު މަޝްރޫޢުތައް ހުއްޓިދާނެ ހެއްޔެވެ. އެ ސުވާލަށް ޑރ. މުޢިއްޒު ތަކުރާރުކޮށް ދެއްވާ ޖަވާބަކީ، އެއްވެސް މަޝްރޫޢުއެއް ނުހުއްޓުވާނެ ކަމެވެ. އަދި އެއްވެސް މަޝްރޫޢޫ ނުހުއްޓުވާނެ ކަމަށާއި، ނަމަވެސް ރައްޔިތުން އެދޭ ގޮތަށް ނުދާނަމަ އެކަމެއް އިސްލާހު ކޮށްދެއްވާނެ ކަމަށް ވިދާޅުވިއެވެ. މިކަން އައްޑޫއަށް ވަޑައިގަތް އެންމެ ފަހު ދަތުރުފުޅުގައިވެސް ވަނީ ރައްޔިތުންނަށް ޔަޤީންކޮށްދެއްވާފައެވެ.

މިހާ ހިސާބުން ދެން އޮތީ ކުރިއަށް އޮތް ފަސް އަހަރު ދުވަހު، ޑރ. މުޢިއްޒު ވެރިކަމެއްގައި އައްޑޫސިޓީއަށް ގެންނަން ވަޢުދުވެވަޑައިގެންނެވި ކަންކަމެވެ. ރައީސް ސާލިޙް ފަދައިން ޑރ. މުޢިއްޒުވެސް އައްޑޫއަށް ގިނަ ވަޢުދުތަކެއް ވެވަޑައިގެންނެވިއެވެ. ކުރިއަށް އޮތް 5 އަހަރަށް ރައްޔިތުންނަށް އުއްމީދުތަކެއް ވަނީ ދެއްވާފައެވެ.

ޢުމްރާނީ ތަރައްޤީގެ އެންމެ ބޮޑު މަޝްރޫޢޫއަކަށް ބްރިޖް

ޑރ. މުޢިއްޒުގެ އައްޑޫ ވަޢުދުތަކުގެ ތެރެއިން އެންމެ ގިނަ ބަޔަކު އެކަމަށް އިންތިޒާރުކުރާ އަދި އެންމެ ގިނަ ބަޔަކު ފާހަގަ ކުރާ ވަޢުދަކީ، އައްޑޫސިޓީގައި އެއްފަސްވެގެން ގުޅިފައި ނެތް ހުޅުމީދޫ އާއި ހިތަދޫ ގުޅާލުމުގެ ވަޢުދެވެ. މިއީ ކުޑަ ވަޢުދެއް ނޫނެވެ. މުޅި ޖުމްލަ 15 ކިލޯމީޓަރުގެ މި ބްރިޖުން ހިތަދޫއާއި ހުޅުމީދޫ ގުޅާލާއިރު ދައުރުގެ ފުރަތަމަ އަހަރު ޢަމަލީ މަސައްކަތް ފަށްޓަވާނެ ކަމަށް ވަނީ ވަޢުދުވެވަޑައިގެންފައެވެ.

މި މަސައްކަތުގެ ބޮޑުމިން އަންދާޒާ ކުރާނަމަ، ރައީސް ޔާމީން އެޅުއްވި ސިނަމާލެ ބްރިޖަކީ 1.39 ކިލޯމީޓަރުގެ ބްރިޖެކެވެ. މި ސަރުކާރުން ފަށާފައިވާ ތިލަމާލެ ބްރިޖަކީ ޖުމްލަ 6.74 ކިލޯމީޓަރު އަދި ހަމަ އެކަނި ކަނޑު ހުރަސްކޮށް އަޅާ ބައިތަކުގައިވެސް 3.6 ކިލޯމީޓަރު ހުރި ބްރިޖެކެވެ. އެހެން ކަމުން ހުޅުމީދޫގެ މި ބްރިޖަކީ މި ރިޔާސީ ދައުރުގައި ފަށައި ކުރިއަށް ގެންދެވޭނެ އެންމެ ބޮޑު އެއް މަޝްރޫޢުއަށް ވެގެން ދާނެއެވެ.

މީގެ އިތުރުން ގަން އިންޓަނޭޝަނަލް އެއާޕޯޓަށް އިތުރު މަންޒިލުތަކުން ފްލައިޓް ޖެއްސޭ ގޮތަށް ތަރައްޤީކޮށް ނިންމަވައި ދެއްވާނެ ކަމަށް ވަނީ ވަޢުދުވެވަޑައިގެންފައެވެ. އަދި އައްޑޫ ސަރަހައްދީ ބަނދަރު ތަރައްޤީ ކުރުމުގެ މަސައްކަތްވެސް ނިންމަވައި ދެއްވާނެ ކަމަށް ވަޢުދުވެވަޑައިގެންނެވިއެވެ.

މީގެ އިތުރުން ހުޅުމީދޫގައި މިވަގުތު ހުރި އައްޑޫ ފިޝަރީޒް ކޮމްޕެލެކްސް އައިސް ޕްލާންޓަކުން ދަޅު ބަނދުކުރާ ކާރުޙާނާއަކަށް ބަދަލުކޮށްދެއްވާނެ ކަމަށް ވަނީ ވަޢުދު ވެވަޑައިގެންފައެވެ. މިއާއެކު މިތަނުން އެކަނިވެސް 500 ވަޒީފާ އުފެދިގެންދާނެ ކަމަށް ވިދާޅުވިއެވެ.

ފަތުރުވެރިކަމުގެ ދާއިރާއަށް 6000 އެނދު އަދި 10،000 ވަޒީފާ

އައްޑޫސިޓީގައި ފަތުރުވެރިކަން ކުރިއެރުވުމަށް އާއްސޭރި ޓުއަރިޒަމް ޕްރޮޖެކްޓް ކުރިއަށް ގެންދަވާނެ ކަމަށް ވަނީ ވިދާޅުވެފައެވެ. މިގޮތުން މި މަޝްރުޢޫ ނިމިގެންދާއިރު 10،000 ވަޒީފާ އުފެދިގެން ދާއިރު، 6000 އެނދު އިތުރު ކުރެވޭނެ ކަމަށް ވަނީ ވިދާޅުވެފައެވެ. އަދި މި މަޝްރޫޢު އަކީ ސަރުކާރުން އައްޑޫގެ ޓުއަރިޒަމަށް އިންވެސްޓް ކޮށްގެން ހިންގާ މަޝްރޫޢު އެއް ކަމަށް ވަނީ ވިދާޅުވެފައެވެ.

މިއާއެކު އެއާޕޯޓް މަޝްރޫޢު ނިމި، ސީޕްލޭން ހަބެއް އައްޑޫގައި ޤާއިމް ވެގެން ދާނެ ކަމަށް މުޢިއްޒު ވަނީ ވިދާޅުވެފައެވެ. މިއީ އައްޑޫ ފުވައްމުލައް އަދި ހުވަދޫގެ ރިސޯޓުތަކާއި ގުޅުވާލާނެ މަޝްރޫޢުއެއް ކަމަށް ވަނީ ވިދާޅުވެފައެވެ. މިކަމަކީ އެއާޕޯޓް ތަރައްޤީއއި ގުޅިފައިވާ މުހިންމު މަޝްރޫޢުއެކެވެ.

ގެދޮރުވެރިކަމާއި ސިއްޙީ ނިޒާމަށް ބަދަލުތަކެއް

އައްޑޫއަށް ކެމްޕެއިންގެ ދެވަނަ ބުރުގައި ކުރެއްވި ދަތުރުފުޅުގައި ޑރ. މުޢިއްޒު ވަނީ ކުރިއަށް އޮތް ފަސް އަހަރު ނިމޭއިރު އައްޑޫގައި ގެދޮރުވެރިކަން ނުލިބޭ އެކަކުވެސް ނުހުންނާނެ ކަމަށް ވިދާޅުވެފައެވެ. އައްޑޫއިން ގިނަ ބިންތަކެއް ދޫކުރުމަށް ކައުންސިލުން ނިންމާފައިވާއިރު، ގެ އެޅުމަށް ފައިނޭންސް ހަމަޖެއްސުމަށް މުޢިއްޒު ވަނީ ވަޢުދުވެވަޑައިގެންފައެވެ.

ބޯހިޔާވަހިކަމުގެ މައްސަލައަށް ހައްލެއް ގެނައުމުގެ އިތުުރުން، އައްޑޫ ހޮސްޕިޓަލުން ހުރިހާ ކަމެއް މާލެ ނުގޮސް ކުރެވޭނެ އިންތިޒާމު ހަމަޖައްސައި ހޮސްޕިޓަލުގެ ޚިދުމަތް ފުޅާ ކުރައްވާނެ ކަމުގެ ވަޢުދު ވަނީ ވެވަޑައިގެންފައެވެ. މީގެ އިތުރުން ޙާއްސަ އެހީއަށް ބޭނުންވާ ފަރާތްތަކަށް ހާއްސަ ހޮސްޕިޓަލެއް އައްޑޫގައި ޤާއިމްކޮށްދެއްވާނެ ކަމަށްވެސް ވަޢުދުވެވަޑައިގެންނެވިއެވެ.

އެހެނިހެން ބައެއް ފާހަގަކޮއްލެވޭ ވަޢުދުތައް

1. އައްޑޫ ހިމެނޭހެން ހުރިހާ ސިޓީއެއްގައި ޑޮލަރު އޭޓީއެމްއެއް ޤާއިމް ކުރުން
2. އިންޓަނޭޝަނަލް ރޭސް ޓްރެކެއް އަޅައިދިނުން
3. ނޭޗަރ ޕާކަކީ ރައްޔިތުންނަށް ނަފާ ލިބޭ ތަނަކަށް ހެދުން
4. ވެރިކަމުގެ ފުރަތަމަ އަހަރު ޝަންގްރިއްލާ ހުޅުވުން
5. ބަޔޯސްފިއަރ ރިޒާވް ތެރެއިން މަގުތައް ހެދުމަށް މަޝްވަރާކޮށް އެކަން ކުރުން
6. ހޮސްޕިޓަލު ވަށައިގެން އޮތް ކުޅި ރައްޔިތުންނަށް ހިތްފަސޭހަކޮށް ބޭނުން ކުރެވޭ ގޮތަށް ހަދައި ދިނުން

ޑރ. މުއިއްޒުގެ ބައެއް ވަޢުދުތަކަކީ ހަމައެކަނި އައްޑޫއަށް ހާއްސަ ވަޢުދުތަކެއް ނޫނެވެ. އަދި މިނޫންވެސް ގިނަ ވަޢުދުތަކެއް ކެމްޕެއިންގެ އެކި މަރުހަލާގައިވެފައިވާއިރު، ޖުމްލަކޮށް އައްޑޫގެ ރައްޔިތުންގެ ހުވަފެންތަކުގައި ކުލަ ޖައްސަވާނެ ކަަމަށް ވަނީ ވިދާޅުވެފައެވެ. އަދި އައްޑޫގެ އެއްވެސް މަޝްރޫޢެއް ނުހުއްޓުވާނެ ކަމަށާއި ސިޓީގެ މަގުތައް ސިޓީއެއްގައި ހުންނަން ޖެހޭ ފެންވަރަށް ތަރައްޤީކޮށް ނިންމަވައި ދެއްވާނެ ކަމަށް ވިދާޅުވިއެވެ.

ރައީސް އިބްރާހިމް މުހައްމަދު ސާލިޙްގެ ސަރުކާރުން އައްޑޫއަށް ދެއްވި އިސްކަން އަންނަން އޮތް ސަރުކާރުންވެސް ދިނުމަކީ ރައްޔިތުންގެ އުއްމީދެކެވެ. އައްޑޫގެ ޕީޕީއެމް/ޕީއެންސީ އަދި ޑރ. މުއިއްޒުއަށް ތާއިދު ކުރައްވާ ފަރާތްތަކުން ތިބީ އެކަން ޔަޤީންކޮށްގެންނެވެ.