އިއްޔެ ބޭއްވި ރިޔާސީ އިންތިހާބުގައި ރައްޔިތުން ނިންމި ނިންމުމަށް އިހުތިރާމު ކުރައްވާ ކަމަށް މި ސަރުކާރުގެ އެންމެ ނުފޫޒު ގަދަ މިނިސްޓަރުންގެ ތެރޭގައި ހިމެނޭ އަހުމަދު މަހުލޫފު ވިދާޅުވެއްޖެ އެވެ.
އިންތިހާބުގެ ދެވަނަ ބުރު ވެސް ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ކާމިޔާބު ކުރެއްވުމާ ގުޅިގެން މަރުހަބާ ދަންނަވައި މަހުލޫފް ސޯޝަލް މީޑިއާގައި ވިދާޅުވީ ރައީސް ސޯލިހަށް ވޯޓު ދެއްވި ހުރިހާ ރައްޔިތުންނަށް ފަށްފަށުން ޝުކުރު އަދާކުރައްވާ ކަމަށެވެ.
"އިންތިހާ އަށް ބުރަ މަސައްކަތްކޮށް ދެއްވި ހުރިހާ ބޭފުޅުންނަށް ވަރަށް ބޮޑަށް ޝުކުރިއްޔާ. މި ގައުމަށް ގެނެސް ދެއްވި އިންގިލާބީ ތަރައްގީ އަށް އަދި ޤާނޫނުއަސާސީން ކަށަވަރުކޮށް ދީފައިވާ ރައްޔިތުންގެ ހައްގުތައް އެ ގޮތުގައި ދެމެހެއްޓެވީތީ ރައީސް އަށް ޝުކުރު ދަންނަވަން." އޭނަ ވިދާޅުވި އެވެ.
މާލޭގެ މިހާރުގެ މޭޔަރުގެ މަގާމުގައި ހުންނެވި ކުރީގެ ހޯމް މިނިސްޓަރު މުއިއްޒު ރިޔާސީ އިންތިހާބު ކާމިޔާބު ކުރެއްވީ ވަގުތީ ނަތީޖާ ދައްކާ ގޮތުން 126,842 ވޯޓުންނެވެ. އެއީ ވޯޓްލީ މީހުންގެ 53.9 ޕަސެންޓެވެ. އެމްޑީޕީގެ ކެންޑިޑޭޓް ރައީސް ސޯލިހަށް ލިބިވަޑައިގަތީ 108,500 ވޯޓެވެ. އެއީ ވޯޓްލީ މީހުންގެ 46.1 ޕަސެންޓެވެ.