އަލަށް އުފެދޭ ޕީޕީއެމް/ޕީއެންސީގެ ސަރުކާރެއްގައި ރައީސް ނަޝީދު އިސްވެ ހުންނަވާ ދަ ޑިމޮކްރެޓްސް ޕާޓީން ބައިވެރިވާނެ ކަމަށް އެ ޕާޓީން ހާމަކޮށްފިއެވެ.
މިކަން ހާމަކޮށްފައިވަނީ އެޕާޓީގެ ޗެއާރޕާސަން ހަސަން ލަތީފް ކުރެއްވި ޓްވީޓެއްގައެވެ. މިކަމުގެ އެއްވެސް އިތުރު ތަފްސީލެއް ހާމަކޮށްފައި ނުވާއިރު، ޕީޕީއެމް/ޕީއެންސީ އިން ވެސް މިކަމާއި ގުޅޭގޮތުން އަދި ވަކި އެއްޗެއް ބުނެފައެއް ނުވެއެވެ. މި ދެ ޕާޓީ އިންތިހާބު ނިންމާލީ ކޯލިޝަން ނުހަދައެވެ. އޭގެ ކުރިން އިންތިހާބުގައި ކޯލިޝަނެއް ހަދައިގެން ވާދަ ކުރައްވަން މަޝްވަރާ ކުރެވުނެވެ. ނަމަވެސް ޕީޕީއެމް އާއި ކުރެވުނު މަޝްވަރާތައް ނާކަމިޔާބުވެގެން މެދު ކެނޑުނީއެވެ.
Dhen ufedhey Dr. @MMuizzu ge Sarukarugai @TheDemocratsMV baiverivaane eve.
— Hassan Latheef🎈 (@HassanLatheef) October 1, 2023
މަޝްވަރާ ނާކަމިޔާބުވި ސަބަބެއް ސީދާ ދެ ޕާޓީންވެސް ހަމަކޮށްފައި ނުވި ނަމަވެސް، އެކި ފަރާތްތަކުން ދައްކާފައި ހުރި ވާހަކަތަކަށް ބަލާއިރު މަޝްވަރާތައް ނާކަމިޔާބުވީ، ޑިމޮކްރެޓްސްއިން ބަރުލަމާނީ ނިޒާމަށް ބަދަލު ކުރަން ބޭނުން ވުމުން އެކަމަށް އިދިކޮޅުން އެއްބަސް ނުވުމުންނެވެ.
ރައީސް ނަޝީދު އިސްވެ ހުންނަވާ އުފައްދަވާފައިވާ ދަ ޑިމޮކްރެޓްސްއިން ޑރ. މުއިއްޒުގެ ސަރުކާރުގައި ބައިވެރިވެވަޑައިގަންނަވާނެ ކަމަށް އިއުލާން ކޮށްފައިވާއިރު، ރަސްމީ ސިފައެއްގައި މި ދެ ޕާޓީގެ ކޯލިޝަނެއް ނެތެވެ. ނަމަވެސް މިއަދު ރައީސް ނަޝީދު ވަނީ އެމްޑީޕީގެ ޤައުމީ މަޖިލީހުގެ 50 އިންސައްތަ އިތުބާރު ލިބިވަޑައިގެންފި ކަމަށްވާނަމަ، އެމްޑީޕީއާއި ގުޅިވަޑައިގަންނަވާނެ ކަމަށް ވިދާޅުވެފައެވެ.