އައު ރައީސްއަށް ޖާގަ ހަނިވާނެހެން ޤާނޫނު އަސާސީއަށް ބަދަލު ގެނައުމާއި ދެކޮޅު ކަމަށް ރައީސް އިބްރާހިމް މުހައްމަދު ސާލިޙް ވިދާޅުވެއްޖެއެވެ.
ރިޔާސީ އިންތިހާބަށް ފަހު ނޫސްވެރިންނާއި އެކު ބޭއްވި ބައްދަލުވުމުގައި ނިޒާމީ މައްސަލައާއި ގުޅޭގޮތުން ރައީސްއާއި ވަނީ ސުވާލު ކުރައްވާފައެވެ. އެމަނިކުފާނު ވަނީ އެމަނިކުފާނު ކުރީގައިވެސް ހުންނެވި ގޮތަށް އަދިވެސް ތާޢީދު ކުރައްވަނީ ރިޔާސީ ނިޒާމަކަށް ކަމަށް ވިދާޅުވެފައެވެ. އެގޮތުން ނިޒާމު ބަދަލު ކުރުމަށް މިވަގުތު މަޖިލީހަށް ހުށަހަޅާފައިވާ މައްސަލާގައި އެމަނިކުފާނު ވިދާޅުވީ އެކަމާއި ގުޅިގެން މަޖިލީހުން ގޮތެއް ނިންމެވުމުން ރައްޔިތުން ގާތަށް ދާނެ ކަމަށެވެ.
ނަމަވެސް އެމަނިކުފާނު އަމިއްލަފުޅަށް ޤަބޫލު ކުރައްވާ ގޮތުގައި މިވަގުތު ނިޒާމު ބަދަލު ކުރުމަކީ އެންމެ ރަނގަޅު ގޮތް ނޫން ކަމަށް ވިދާޅުވިއެވެ.
"5 އަހަރު ދުވަހަށް ރައީސަކު އިންތިހާބުކޮށްފައި އެއޮތީ. އެ ޖާގަ ހަނިވާގޮތަށް ޤާނޫނު އަސާސީއަށް ބަދަލު ގެނައުމަކީ އެންމެ ރަނގަޅު ގޮތް ކަމަށް އަޅުގަނޑު ނުދެކެން. ޕްރޮސެސް ކުރިއަށް ދާން ވާނެ" ރައީސް ވިދާޅުވިއެވެ.
އެމަނިކުފާނު އެހެން ވިދާޅުވި ނަމަވެސް އެކަމުގައި ގޮތެއް ނިންމަން އޮތީ މަޖިލީހަށް ކަމުން މަޖިލީހުން އެކަމާއި ގުޅިގެން ނިންމަވާ ގޮތަކަށް ކުރިއަށް ވަޑައިގަންނަވާނެ ކަމަށް އެމަނިކުފާނު ވިދާޅުވިއެވެ.
ދަ ޑިމޮކްރެޓްސްއަށް ނިސްބަތްވާ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ މިދިޔަ ހޯމަ ދުވަހު ވަނީ ގާނޫނުއަސާސީއަށް އިސްލާހެއް ގެނައުމަށް ހުށަހަޅާފަ އެވެ. އެ އިސްލާހުގެ މައްސަލައާ އެކު، ނިޒާމާ ގުޅޭ މައްސަލާގައި މިއަދު ތާވަލު ކުރެވުނު ނަމަވެސް، ޖަލްސާ ވަނީ ކޯރަމް ހަމަ ނުވުމުން ކުރިއަށް ނުގެންދެވިއެވެ.
އިމްތިޔާޒު ހުށަހެޅުއްވީ ޤާނޫނު އަސާސީގެ 262 މާއްދާ އިސްލާހު ގެނައުމަށެވެ. މިހާރު އޮތް ގޮތުން ނިޒާމު ބަދަލު ކުރަން ފާސްކޮށްފި ނަމަ، އެ އިސްލާހާއި ގުޅޭގޮތުން ރައްޔިތުންގެ ފެންނަ ނުފެންނަ ވޯޓެއް ނަގަން ޖެހެއެވެ. އަދި އެ ވޯޓުން ރައްޔިތުން ބަލައި ނުގަނެފި ނަމަ އެ އިސްލާހު ބާތިލްވާނެއެވެ. އިމްތިޔާޒުގެ އިސްލާހަކީ ނިޒާމީ ވޯޓަށް ފަހު މި ވޯޓު ނުނަގުމަށް ހުށަހަޅާފައިވާ އިސްލާހެެކެވެ.