ހޮނިހިރު ދުވަހު ބޭއްވި ރިޔާސީ އިންތިހާބު ކާމިޔާބު ކުރެއްވި ޑރ. މުހައްމަދު މުއިއްޒު އަންނަ މަހު މަގާމުގެ ހުވާ ކުރެއްވުމަށް ފަހު އެންމެ ފުރަތަމަ ވެސް ރާއްޖޭން ބޭރަށް ކުރައްވާ ދަތުރުގައި ވަޑައިގަންނަވާނީ އިންޑިއާ ކަމަށް ޕީއެންސީގެ ނައިބު ރައީސް މުހައްމަދު ޝަރީފު (މުންދު) ވިދާޅުވެއްޖެ އެވެ.
ރައީސް އަބްދުﷲ ޔާމީންގެ ސަރުކާރުގައި ސްރީ ލަންކާ އާއި ޖަޕާނަށް ކަނޑައެޅުއްވި ފައި ސަފީރުގެ މަގާމު އަދާކުރެއްވި މުންދު އިންޑިއާގެ ނޫހަކަށް ދެއްވި އިންޓަވިއުއެއްގައި ވިދާޅުވީ ރާއްޖޭގައި ދެން ސަރުކާރާ މެދު އިންޑިޔާ އިން އެއްގޮތަކަށް ވެސް ކަންބޮޑުވާން ނުޖެހޭނެ ކަމަށާއި ކުރިން ވެސް އެ ގައުމާ ރާއްޖެ ބާއްވަމުން އައި ގާތް ގުޅުން އެ ގޮތުގައި ދެމިއޮންނާނެ ކަމަށެވެ.
މުންދު ވިދާޅުވީ ޑރ. މުހައްމަދު މުއިއްޒުގެ ސަރުކާރުން އެންމެ ބޮޑު ކަމެއް ބާއްވައި އިސްކަން ދޭނީ ޗައިނާ އަށް ކަމަށް ބުނެ ދައްކާ ވާހަކަތަކަކީ ހަގީގަތެއް ނެތް ވާހަކަތަކެއް ކަމަށެވެ.
"އިންޑިޔާ ކަނޑުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި އިންޑިޔާ އާއެކު މަސައްކަތްކުރަން އަޅުގަނޑުމެން ބޭނުން. އެކަމުގެ އެންމެ ބޮޑު ހިއްސާދާރަކީ އިންޑިޔާ." އޭނަ ވިދާޅުވި އެވެ.
މުންދު ފާހަގަކުރެއްވި ގޮތުގައި ތާރީހަށް ނަޒަރު ހިންގައިލާ އިރު ބަލާއިރު ރާއްޖޭގައި އަލަށް އިންތިހާބު ކުރެވޭ ރައީސުން އަބަދު ވެސް އެންމެ ފުރަތމަަ ޒިޔާރަތްކުރައްވާ ގައުމަކީ އިންޑިއާ އެވެ. އެހެންވެ އާ ސަރުކާރު ވެސް އެ އުސޫލަށް ތަބާވާނެ ކަމަށް ވިދާޅުވި އެވެ.
ރައީސް އިބްރާހީމް މުހައްމަދު ސޯލިހުގެ ސަރުކާރުގައި އިންޑިއާ އަށް ރާއްޖެ މާ ބޮޑަށް ބަރޯސާވެ، އެ ގައުމުގެ އަޅުވެތިކަމަށް ދަށަށް ރާއްޖެ ގޮސްފައިވާ ކަމަށް އިދިކޮޅު ޕީޕީއެމް/ޕީއެންސީ ކޯލިޝަނުން ބުނެ އެވެ. އަދި އިންޑިއާ ސިފައިން ރާއްޖޭގައި ތިބޭ ކަމަށް ބުނެ އެ މީހުން ބާލަން ގޮވާލައި އެ ކޯލިޝަން "އިންޑިއާ އައުޓް" ގެ ނަމުގައި ކެމްޕޭނެއް ވެސް ހިންގާފައިވެ އެވެ.
އިންތިހާބު ކާމިޔާބު ކުރެއްވުމަށް ފަހު ރޭ ރައްޔިތުންނާ ބައްދަލުކުރަން ބޭއްވި ބައްދަލުވުމުގައި މުއިއްޒު ވިދާޅުވީ އިންޑިއާ ސިފައިން ރާއްޖޭގައި އެބަތިބި ކަމަށާއި އެ މީހުން ފޮނުވައިލާނެ ކަމަށެވެ.
އިންޑިއާގެ ބޮޑުވަޒީރު ނަރެންދުރަ މޯދީ އަކީ މުއިއްޒު އިންތިހާބު ކާމިޔާބު ކުރެއްވުމާ ގުޅިގެން އެންމެ ފުރަތަމަ މަރުހަބާ ވިދާޅުވި ބޭރުގެ ފުރަތަމަ ލީޑަރެވެ.