ޤާނޫނު އަސާސީގެ 262 ވަނަ މާއްދާއަށް ހުށަހަޅާފައިވާ އިސްލާހަކީ ޤާނޫނާއި ޚިލާފު އިސްލާހެއް ކަމަށާއި އެ ބަލައި ނުގަތުމަށް ޓްރާންސްޕޭރެންސީ މޯލްޑިވްސް އިން މަޖިލީސް މެންބަރުންނަށް ގޮވާލާއިފިއެވެ.
ހޯމަ ދުވަހު ޓްރާންސްޕޭރެންސީ މޯލްޑިވްސް އިން ނެރުނު ނޫސް ބަޔާނުގައި ބުނީ، ޤާނޫނު އަސާސީގެ 262 ވަނަ މާއްދާއަށް ބަދަލު ގެނައުމަށް ހުށަހަޅާފައިވާ ހުށަހެޅުމަކީ ރައްޔިތުންނަށް ލިބިދީފައިވާ ބާރު ހަނިކުރުން ކަމަށެވެ. އެގޮތުން ޤާނޫނު އަސާސީގައި ވެރިކަމުގެ ނިޒާމާއި، މަޖިލީހުގެ ދައުރާއި އުމުރު ފަދަ ކަންކަމަކީ ރައްޔިތުންގެ ޙީޔާލު ހޯދައިގެން ބަދަލުވެވޭނެ ކަންކަމުގެ ގޮތުގައި ކަނޑައަޅާފައި އޮތް ކަމަށެވެ.
ޤާނޫނު އަސާސީގެ 262 ވަނަ މާއްދާގައި އިސްލާހު ގެނައުމަށް މާފަންނު އުތުރު ދައިރާގެ މެންބަރު އިމްތިޔާޒު ފަހުމީ ހުށަހަޅާފައިވަނީ، ކަމަކާއި ގުޅިގެން ފެންނަ ނުފެންނަ ވޯޓެއް ނަގާފައިވާ ކަމެއްގައި، ޤާނޫނު އަސާސީއަށް އެކަމާއި ގުޅިގެން އިސްލާހެއް ގެންނަނަމަ، މިއީ ޤާނޫނު އަސާސީގެ 262 (ށ) ގުޅޭ ކަމެއް ކަމުގައި ވީ ނަމަވެސް، އިސްލާހު ތަސްދީޤު ކުރުމުގެ ކުރިން ފެންނަ ނުފެންނަ ވޯޓެއް ނަގަން ނުޖެހޭނެ ކަމަށެވެ.
ޓްރާންސްޕޭރެންސީ ބުނީ މިހާރު ހުށަހަޅާފައިވާ ބިލުގެ ސަބަބުން، ޤާނޫނު އަސާސީއަށް ގެންނަ ބައެއް ބަދަލުތައް ރައީސް ތަސްދީގު ކުރުމުގެ ކުރިން ރައްޔިތުންގެ ހިޔާލު ހޯދުމަށް އޮންނަ ބާރު ގެއްލިގެންދާ ކަމަށެވެ. އަދި މި ބާރުގެ އެންމެ މުހިންމު ބޭނުމަކީ އެއިރަކު ވެރިކަން ކުރާ ބަޔަކަށް، ޤާނޫނު އަސާސީއަށް ބަދަލު ގެނެސް ރައްޔިތުންނާއި ސީދާ ގުޅޭ ކަންކަމުގައި ރައްޔިތުންގެ ރުހުމާއި ނުލާ ބަދަލު ގެނައުމުގެ ފުރުސަތު ނުދިނުމެވެ. އަދި މި ބާރުތައް ހަނިވާގޮތަށް ގެނެވޭ ބަދަލަކީ ޤާނޫނު އަސާސީއާއި ޚިލާފު ބަދަލެއް ކަމަށް ވަނީ ބުނެފައެވެ.
އެހެން ކަމުން މި ބިލު ބަލައި ނުގަތުމަށް މަޖިލީހުގެ ހުރިހާ މެންބަރުންނަށް ޓްރާންސްޕޭރެންސީން ވަނީ ގޮވާލާފައެވެ.