އަމިއްލަ ސަރުކާރުގައި މީޑިއާތަކަށް އެއްވެސް ނުފޫޒެއް ނޯންނާނެ ކަމަށާއި ނޫސްވެރިންނަށް ވަރަށް މިނިވަންކަމާ އެކީ މަސައްކަތް ކުރެވޭނެ މާހައުލެއް އޮންނާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ސަންގު ޓީވީ އަށް ދެއްވި އިންޓަވިއުއެއްގައި މާލޭގެ މޭޔަރުގެ މަގާމުގައި ހުންނެވި ކުރީގެ ހޯމް މިނިސްޓަރު ރޭ ވިދާޅުވީ މީޑިއާތަކަށް އަމިއްލަ އިހުތިޔާރުގައި ކުރިއަރައި ދާން ސަރުކާރުގެ ތެރެއިން އެއްވެސް ހުރަހެއް ނާޅުއްވާނެ ކަމަށެވެ. އަދި މީޑިއާތައް ކުރިއަރުވަން ސަރުކާރުގެ ތެރެއިން ގިނަ ކަންތައްތަކެއް ކުރައްވަން ބޭނުންވާ ކަމަށް ވެސް ވިދާޅުވި އެވެ.
މުއިއްޒު ވިދާޅުވެފައިވާ ގޮތުގައި ދައުލަތުގެ ބަޖެޓުން ވަކި ޕަސެންޓެއް އަމިއްލަ މީޑިއާތަކަށް ދެއްވާނެ އެވެ.
"އަޅުގަނޑުމެންގެ ސަރުކާރުގައި މީޑިއާ ވަނީ ހަގީގަތުގައި ވެސް ވަރަށް މިނިވަން، އަމިއްލަ އިހްތިޔާރުގައި ކުރިއަރައި، ގެންދަން ބޭނުންވާ އެންމެ ފުޅާމިނެއްގައި ގެންދިއުމުގެ އެއްވެސް ހުރަހެއް ނެތް ކަމަކަށް،" އޭނަ ވިދާޅުވި އެވެ. "އަދި ސަރުކާރުން އަޅުގަނޑު ދޭން ބޭނުންވާ މިންވަރަށް، އަޅުގަނޑު ބޭނުން ވަރަށް ގިނަ ކަންކަން ކޮށްދޭން. ފުރިހަމަ މިންވަރެއްގައި އެެހީތެރިކަން ދީގެން ކުރިއަރާ ދާ ބަޔަަކަށް މީޑިއާ ހަދަން ބޭނުން ވަނީ."
މުއިއްޒު ވިދާޅުވި ގޮތުގައި ނޫސްވެރިކަމަށް ޝަައުގުވެރިވާ ދަރިވަރުންނަށް އެ ދާއިރާއާ ގުޅޭ ތައުލީމާއި ތަޖުރިބާ ހޯދުމުގެ ފުރުސަތު ވެސް ސަރުކާރުން ފަހިކޮށް ދޭނެ އެވެ.