ފެންވަރު ރަނގަޅު ދަރިވަރުން މުދައްރިސްކަން ހިޔާރު ނުކުރާ ކަމަށް އެޑިއުކޭޝަން މިނިސްޓަރ. ޑރ. ޢާއިޝަތު އަލީ ވިދާޅުވެއްޖެއެވެ.
މިނިސްޓަރ ޑރ. އައިޝަތު އަލީ މިހެން ވިދާޅުވީ މުދަށްރިސުންގެ ދުވަހާއި ގުޅުވައި މިއަދު ދެއްވި ޚިތާބުގައެވެ. މިއަދު ފާހަގަ ކުރަމުންދާ މުދައްރިސުންގެ ދުވަހާއި ގުޅިގެން މިއަހަރު ކަނޑައަޅާފައިވާ ޝިޢާރަކީ، "އެދޭ ތަޢުލީމް ދިނުމަށް ބޭނުންވާ މުދައްރިސުންގެ ދަތިކަން ހައްލުކުރުން، ޢާލަމީ ޒަރޫރަތެއް" އެވެ. މިއަހަރުގެ ޝިޢާރާއި ގުޅުވައި ޔުނެސްކޯއިން ވަނީ ދުނިޔޭގެ ޤައުމުތަކުގައި މުދައްރިސުންނަށް ކުރިމަތިވާ މައިގަނޑު ދެ ގޮންޖެހުމެއް ފާހަގަކޮށްދެއްވާފައެވެ.
މިއަދުގެ ޙިތާބުގައި މިނިސްޓަރ ޢާއިޝަތު އަލީ ވަނީ، ރާއްޖެއަށް ވެސް ކުރިމަތިލާން ޖެހިފައި އޮތީ މި ގޮންޖެހުންތައްކަން ފާހަގަކޮށްފައެވެ. އެގޮތުން ޔުނެސްކޯއިން ފާހަގަ ކުރާ ފުރަތަމަ ގޮންޖެހުމަކީ، ފެންވަރު ރަނގަޅު ދަރިވަރުން މި ދާއީރާ ޙިޔާރު ނުކުރުމެވެ. މިއީ މަސައްކަތް ކުރަން ޖެހޭ މާހައުލުގެ ސަބަބުން މި ދާއިރާއަށް އޮތް ޒަމާންވީ ޝައުޤުވެރިކަން ދައްވަމުންދާތީ ކަމަށް މިނިސްޓަރ ފާހަގަ ކުރެއްވިއެވެ.
ދެވަނަ ކަމަކަށް މިނިސްޓަރ ވަނީ ފިރިހެން މުދައްރިސުންގެ މަދުކަމުގެ މައްސަލަ ފާހަގަކޮށްފައެވެ. އެގޮތުން ބައެއް ތަފާސް ހިސާބުތައް ހިއްސާކޮށްދެއްވިއެވެ. އަދި މި ހިސާބުތަކުން ތަޢުލީމީ ދާއިރާ ފުޅާކުރަން އޮތް ފުރުސަތުތައް ދައްކުވައިދޭ ކަމަށް ވިދާޅުވިއެވެ.
" ރާއްޖޭގެ ތަފާސް ހިސާބުތަކަށް ބަލާލިއަސް އަންހެން މުދައްރިސުންގެ ނިސްބަތަކީ 75 އިންސައްތަ. ކޮންމެ 4 މުދައްރިސުންގެ ތެރެއިން 3 މީހުންނަކީ، އަންހެނުން. " މިނިސްޓަރ ވިދާޅުވިއެވެ.
މިނިސްޓަރ ޢައިޝަތު ޢަލީގެ ހިޠާބުގައި މި ދައިރާއަށް ކުރިމަތިވެފައިވާ މައްސަލަތައް ހައްލު ކުރުމަށް ޔުނެސްކޯއިން 7 ކަމެއް ފާހަގަކޮށްދޭ ކަމަށް ވިދާޅުވިއެވެ. މީގެ ތެރޭގައި އެހެން ސިނާޢަތްތަކުގެ މަސައްކަތުގެ ގަޑިއާއި ކުރަން ޖެހޭ، މަސައްކަތައް އަޅާ ބަލާއިރު އެއާއި އެއްވަރަށް މަސައްކަތް ކުރާ މުދައްރިސުންނަށް އެއްވަރުގެ ޢުޖޫރައެއް ދޭން ޖެހޭ ކަން ވަނީ ފާހަގަކޮށްފައެވެ. މީގެ އިތުރުން ދައިރާގައި ކިޔަވަމުންދާ ދަރިވަރުންނަށް އެލަވެންސެއް ދިނުމާއި، މުދައްރިސުންގެ އިދާރީ މަސައްކަތް މަދުކޮށް ސްކޫލުތަކުން މުދައްރިސުންނަށް ފަހި ފުރުސަތުތައް ހޯދައި ދޭން ޖެހޭކަން ވަނީ ފާހަގަކޮށްފައެވެ.
މިނިސްޓަރ ވިދާޅުވީ މިދުވަހުގެ ޝިއާރުންވެސް އަނގައިދޭ އެއް ކަމަކީ ތަރައްޤީވެފައިވާ އަދި ތަރައްޤީވަމުން އަންނަ ޤައުމުތަކަށްވެސް ރާއްޖެއެކޭ އެއްގޮތަށް މިމައްސަލަތައް ކުރިމަތިވެފައިވާ ކަން ކަމަށް ވިދާޅުވިއެވެ. އަދި މިހާރު އޮތް ހާލަތު ބަދަލުކޮށް ރަނގަޅު މުދައްރިސުން އިތުރު ކުރުމަށް ހުރިހާ ޤައުމަކުން މަސައްކަތް ކުރާ ކަމަށް މިނިސްޓަރ ވިދާޅުވިއެވެ.