އިންތިޙާބީ ރައީސް ޑރ. މުހައްމަދު މުޢިއްޒުގެ އިންތިޤާލީ ކޮމެޓީގައި އެކި ދާއިރާތަކުން ފަންނީ އަދި ޤާބިލް އަންހެން ބޭފުޅުން ތިއްބެއްވި ކަމަށް ޕްރޮގްރެސިވް ކޯލިޝަނުން ވިދާޅުވެއްޖެއެވެ.
ޕްރޮގްރެސިވް ކޯލިޝަންގެ ތަރުޖަމާނު ހިނާ ވަލީދު މިހެން ވިދާޅުވީ، އިންތިޤާލީ ކޮމެޓީގެ ޑިރެކްޓަރ ޖެނެރަލްއަކަށް ޕީއެންސީގެ ޗެއާރޕާސަން އަބްދުﷲ އަބްދުލް ރަހީމް ހަމަޖެއްސެވުމަށް ސިވިލް ސާވިސް ކޮމިޝަނުން ބޭއްވި ބައްދަލުވުމާއި ގުޅިގެންނެވެ. އެ ބައްދަލުވުމުގައި ޕާޓީގެ ފަރާތުން ބައިވެރިވަޑައިގެންނެވީ ގިނައިން ފިރިހެން ބޭފުޅުންނެވެ. މިކަމާއި ގުޅިގެން އިންތިޤާލީ ކޮމެޓީއަށް ސޯޝަލް މީޑިއާގައިވަނީ ފާޑު ކިއުން އަމާޒުވެފައެވެ.
މި ކަމަށް ރައްދު ދެއްވައި، ޕްރޮގްރެސިވް ކޯލިޝަންގެ ތަރުޖަމާނު ހީނާ ވަލީދު ވިދާޅުވީ، އެއީ ޑީޖީ އޮފް ޓްރާންސިޝަން އެޕޮއިންޓް ކުރުމަށް ބޭއްވި ރަސްމިއްޔާތެއް ކަމަށެވެ. އަދި ރަސްމީއްޔާތުގައި ބައިވެރިވީ ދެޕާޓީގެ ލީޑަރުން ކަމަށް ވިދާޅުވިއެވެ.
" ޓްރާންސިޝަން ކޮމިޓީތައް އެކުލަވާލެވެނީ ތަފާތު ދާއިރާތަކުން ފަންނުވެރި ހުނަރުވެރި ގާބިލް އަންހެނުން ހިމެނޭ ގޮތަށް. އިންތިޚާބީ ރައީސްގެ މެނިފެސްޓޯގައި ދެވަނަ އަށް އެންމެ އިސްކަން ދެއްވާފައިވަނީވެސް އަންހެނުންނަށް." ހީނާ ވިދާޅުވިއެވެ.
މިވަގުތު ސަރުކާރު ބަދަލުވުމުގެ އިންތިޤާލީ މަރުހަލާ ކުރިއަށްދާއިރު، އިންތިހާބީ ރައީސްގެ އޮފީސް ވަނީ ރައީސުލްޖުމުހޫއްރީއްޔާ އިބްރާހިމް މުހައްމަދު ސާލިޙް ޤާއިމްކޮށްދެއްވާފައެވެ. އަދި އިންތިޤާލީ ހުރިހާ މަރުހަލާއެއްގައި ސަރުކާރުގެ ފުރިހަމަ އެއްބާރުލުން ލިބޭނެ ކަމަށް ނިމިގެންދާ ސަރުކާރުން ވަނީ ބުނެފައެވެ.
ޑރ. މުއިއްޒު ވަނީ ސަރުކާރުގައި ހުރިހާ ފަންތިއެއްގައި ޤާބިލް ބޭފުޅުން ނަންގަވާނެ ކަމަށް ކެމްޕެއިންގެ ތެރެއިން ވިދާޅުވެފައެވެ.