ސައުދި އަރަބިއްޔާ އިން 2034 ގެ ވޯލްޑް ކަޕް ހޯސްޓްކުރަން ބިޑްކުރުމާ ގުޅިގެން ރާއްޖެ އިން އެކަމަށް ތާއީދުކޮށްފި އެވެ.
ރާއްޖޭގެ އިތުރުން އަވައްޓެރި ސްރީ ލަންކާ އިން ވެސް އެ ގައުމަށް ތާއީދުކޮށްފައިވެ އެވެ.
ސައުދީން 2034 ގެ ވޯލްޑް ކަޕް އެ ގައުމުގައި ބާއްވަން ބިޑްކުރީ މިދިޔަ ހަފުތާގެ ފަހުކޮޅު އެވެ. އެ ގައުމުގެ ކުޅިވަރާ ބެހޭ ވަޒީރު ޕްރިންސް އަބްދުލްއަޒީޒް ބިން ތުރުކީ އަލް ފައިސަލް ވިދާޅުވީ ވޯލްޑް ކަޕް 2034 ގައި ސައުދީގައި ބޭއްވުމަކީ ކުޅިވަރުގައި ކުރިއަރާފައިވާ ގައުމަކަށް ސައުދީވުމުގެ އިތުރަށް ގައުމު ހޯދަމުބް އަންނަ ކުރިއެރުންތަކަށް އިތުރުވާ ބޮޅަކަށްވެގެން ދާނެ ކަމަށެވެ. އަދި ވޯލްޑް ކަޕެއް ބޭއްވުމަކީ ފުޓްބޯޅައިގެ ދަތުރުގައި ސައުދީން ކުރިއަށް އަޅާނެ ބޮޑު ފިޔަވަޅެއް ކަމަށް ވެސް ވިދާޅުވި އެވެ.
ސައުދީގެ ބިޑަށް ތާއީދުކޮށް ރާއްގެ ފުޓްބޯޅައިގެ މައި އިދާރާ އެފްއޭއެމުން ނެރުނު ބަޔާނެއްގައި ބުނީ ސައުދީން ފުޓްބޯޅަ ކުރިއެރުވުމަށް ކުރަމުން އަންނަ މަސައްކަތަށް ބަލާ އިރު އެއީ ވޯލްޑް ކަޕް ބާއްވަން އެންމެ އެކަށީގެންވާ ގައުމު ކަމަށެވެ. އަދި އެކަމަށް ބޭނުންވާ ވަސީލަތްތަކާއި ދަނޑުތަކާއި ގާބިލުކަން ވެސް ސައޫދީގައި ހުރި ކަމަށް ގަބޫލުކުރާ ކަމަށެވެ.
ސައުދީން ވޯލްޑް ކަޕް ބާއްވަން އަމާޒު ހިފި އިރު، ސައުދީ ލީގްގައި މިހާރު ދުނިޔޭގެ އެންމެ މަޝްހޫރު ވަރުގަދަ ފުޓްބޯޅަ ތަރިން ކުޅެ އެވެ. ސައުދީން ވޯލްޑް ކަޕަށް ބިޑުކުރި އިރު، މި އަހަރުގެ ފީފާ ކްލަބް ވޯލްޑް ކަޕް ބާއްވަން ހަމަޖެހިފައި ވަނީ ވެސް އެ ގައުމުގަ އެވެ. އަދި 2027 ގެ އޭޝިއަން ކަޕް ވެސް އޮންނާނީ ސައުދީގަ އެވެ.
މިދިޔަ އަހަރު ވޯލްޑް ކަޕް ބޭއްވި ގަތަރުގަ އެވެ. ދެން އޮންނަ ވޯލްޑް ކަޕް 2026 ގައި ބާއްވާނީ އެމެރިކާ އާއި މެކްސިކޯ އަދި ކެނެޑާގަ އެވެ.