ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލަ އަލުން މަޖިލީހަށް ވެއްދުމުގެ މަސައްކަތް އެމްޑީޕީން ފަށައިފިއެވެ.
މިމައްސަލަ މަޖިލީހަށް ވެއްދުމުގެ މަސައްކަތް ފަށާފައިވާއިރު، މިކަމާއި ގުޅޭގޮތުން ރައީސް އާއި ބައްދަލުކޮށް މަޝްވަރާވެސް ކޮށްފައިވާ ކަމަށް މައުލޫމާތު ލިބެއެވެ. އަދި މިކަމާއި ގުޅޭގޮތުމް އެމްޑީޕީ ޕީޖީން މާދަމާ މަޝްވަރާ ކުރާނެ ކަމަށް މައުލޫމާތު ލިބެއެވެ. އަދި މިމައްސަލަ ވެއްދުމަށް މިހާރު، އެމްޑީޕީގެ މަޖިލިސް މެންބަރުން ސޮއި ހޯދުމުގެ މަސައްކަތް ކުރަމުންދާކަން ވަނީ ކަށަވަރުވެފައެވެ.
ރައީސް ނަޝީދު އަދި މަޖިލީހުގެ ނައިބް ރައީސް އީވާ އަބްދުﷲގެ އިތުބާރު ނެތް ކަމުގެ މައްސަލައެއް، މަޖިލީހަށް މީގެ ކުރިން ވެއްދިއެވެ. އޭގެ ކުރިން މަޖިލީހުގެ ނައިބް ރައީސް އީވާ އަބްދުﷲގެ އިތުބާރު ނެތް ކަމުގެ މައްސަލަވެސް ވަނީ ހުށަހަޅުއްވާފައެވެ. މަޖިލީހަށް ނަޝީދުގެ އިތުބާރު ނެތް ކަމުގެ މައްސަލަ ވެއްދީ 54 މެންބަރުންގެ ސޮޔާއިއެކުގައެވެ.
ނަމަވެސް އެ މައްސަލަ އެންމެ ފަހުން އެމްޑީޕީން އަނބުރާ ގެންދިޔައީ، އިންތިހާބުގެ ފުރަތަމަ ބުރަށް ފަހުގައެވެ. އޭރު އެމްޑީޕީވެސް ދިޔައީ ރައީސް ނަޝީދު އިސްވަޑައިގެން އުފައްދަވާފައިވާ ޑިމޮކްރެޓްސް ތާޢީދު ރިޔާސީ އިންތިހާބުގެ ދެވަނަ ބުރަށް ހޯދުމުގެ މަސައްކަތް ކުރަމުންނެވެ.
ނަމަވެސް ރިޔާސީ އިންތިހާބުގެ ދެވަނަ ބުރުގައި އެމްޑީޕީއަށް ލިބިވަޑައިގަތް ނާކާމިޔާބީއާއެކު، ބޭއްވި އެމްޑީޕީގެ ޤައުމީ މަޖިލީހުގައި މިކަން ބައެއް މެންބަރުން ވަނީ ފާހަގަކޮށްފައެވެ. އަދި މަޖިލީހުގެ ރިޔާސަތު އެމްޑީޕީއަށް ހޯދުމަށް މަސައްކަތް ކުރުމަށް ވަނީ ގޮވާލާފައެވެ.