ޝާހްރުކް ހާންގެ ކުރިއަށް އޮތް ދެ ފިލްމާއި ނަމްބަރު 17 އާ ވަރަށް ބޮޑަށް ގުޅިލާމެހިފައިވާ ކަމަށްވެ އެވެ.
އެގޮތުން މިހާރު އޭނާ ޝޫޓް ކުރަމުން އަންނަ ޔާޝްރާޖް ފިލްމްސް (ވައިއާރްއެފް) ގެ "ފޭން" ގައި ޝާހްރުކް ކުޅޭ ދެ ކެރެކްޓާގެ ތެރެއިން އެއް ކެރެކްޓާއިން އޭނާ ފެނިގެން ދާނީ އުމުރުން 17 އަހަރުގެ ކުއްޖެއްގެ ރޯލުން ކަމަށް މީޑިއާތަކުން ވަނީ ރިޕޯޓްކޮށްފަ އެވެ.
މަނީޝް ޝަރްމާ ޑައިރެކްޓް ކުރާ އެ ފިލްމުގައި ޝާހްރުކް ކުޅޭ އަނެއް ކެރެކްޓާއަކީ ސުޕަސްޓާރެއްގެ ރޯލެވެ.
ޔަގީންވާ އެއް ކަމަކީ މި ފިލްމުން މީގެ ކުރިން ޝާހްރުކް ފެނިގެން ނުދާ ފަދަ ތަފާތު ގޮތަކަށް އޭނާ ފެނިގެން ދާނެ ކަމެވެ. އެގޮތުން އޭނާގެ މޭކަޕަށް ވަަރަށް ބޮޑު ސަމާލު ކަމެއްދީ، އެކަމަށް ހާއްސަ ހޮލީވުޑްގެ އެކްސްޕާޓެއް "ފޭން" ގައި އަންނަނީ ހަރަކާތްތެރިވަމުންނެވެ.
އަނެއްކޮޅުން މި ފިލްމަކީ ވަރަށް ބޮޑަށް ވީއެފްއެކްސް ވެސް ބޭނުންވާ ފިލްމަކަށް ވާތީ، ކުރިން ފިލްމު ރިލީޒް ކުރަން ތާވަލް ކުރި ތާރީހު ވެސް މިހާރު ވަނީ ފަސްކޮށްފަ އެވެ. ކުރިން "ފޭން" ރިލީޒް ކުރަން ހަމަޖެއްސީ އޮގަސްޓް 15 ގަ އެވެ.
އެހެން ނަމަވެސް ފިލްމަށް ކުރަން ޖެހޭ މަސައްކަތްތައް ބޮޑުވުމުން، އެހާތަނަށް މަސައްކަތް އެއްކޮށް ނިންމައި ނުލެވޭނެތީ "ފޭން" ރިލީޒް ކުރާ ތާރީހު ވަނީ ފަހުން އިއުލާން ކުރާ ގޮތަށް ނިންމައިފަ އެވެ.
އެ ފިލްމުގެ ވާހަކަ މި ހިސާބުން ނިމުނީ އެވެ. ދެން އޮތީ އަނެއްކާ ވެސް 17 ގެ ވާހަކަ އެވެ.
ސީދާ ޝާހްރުކް އާ ހަވާލާ މީޑިއާތަކުން ރިޕޯޓް ކުރި ގޮތުގައި ރޯހިތު ޝެޓީ ޑައިރެކްޓް ކުރާ އާ ފިލްމުގައި އޭނާ ފެނިގެން ދާނީ އިތުރު 17 އެކްޓަރުންނާ އެކުގަ އެވެ. އަދި އެ ތަރިން ފައިނަލް ކުރުމުގެ މަސައްކަތް މިހާރު އަންނަނީ ކުރެވެމުންނެވެ.
އެ ވާހަކަ ޝާހްރުކް ދެއްކީ މާދަމާ އެންޑް ޓީވީން ޕްރިމިއާ ކުރަން ހަމަޖެހިފައިވާ އޭނާގެ އާ ޓީވީ ޝޯ "އިންޑިއާ ޕޫޗޭގާ ސަބް ސޭ ޝާނާ ކޯން" ގެ ޕްރެސް ކޮންފަރެންސްގަ އެވެ.
ރިޕޯޓްތައް ބުނާ ގޮތުން މި ފިލްމުގައި ޝާހްރުކްގެ ބަތަލާއަކީ ކާޖޮލް އެވެ. އަދި ޒުވާން ދެ ތަރިން ކަމަށްވާ ވަރުން ދަވަން އާއި ކިރިތީ ސެނޮން ވެސް ރޯހިތުގެ ފިލްމުން ފެނިގެން ދާނެ އެވެ.
މިހާރު އަޑުތައް ފެތުރިފައިވާ ގޮތުން ވިނޯދް ކަންނާ އާއި ކަބީރު ބޭދީ ވެސް މި ފިލްމަށް ސޮއިކޮށްފި އެވެ. ވިނޯދް ކުޅެނީ ޝާހްރުކްގެ ބައްޕަގެ ރޯލެވެ. ކަބީރު ކުޅެނީ ކާޖޮލްގެ ބައްޕަގެ ރޯލެވެ.
އަނެއްކާ އެ ދަ ތަރިންނަކީ ކުރިން ބުނި 17 އެކްޓަރުންގެ ތެރެއިން ތަރިންތަކެއް ބާވަ އެވެ؟
ޝާހްރުކް ވަނީ 17 އާއި އޭނާ އާ ގުޅުވައިގެން ދައްކާ ވާހަކަތައް ދޮގުކޮށްފަ އެވެ.
އޭނާ ބުނީ "ފޭން" ގައި އޭނާއަކީ 17 އަހަރުގެ ކުއްޖެއް ނޫން ކަމަށެވެ. އަދި ރޯހިތު ޝެޓީގެ ފިލްމުގައި 17 އެކްޓަރުން ހިމެނޭ ވާހަކައަކީ ވެސް ހަގީގަތެއް ނޫން ކަަމަށް ޝާހްރުކް ބުންޏެވެ.
ކާމިޔާބު ގިނަ ފިލްމްތަކެއް ކުޅެފައިވާ ޝާހްރުކް ކުރި ޓްވީޓެއްގައި އޭނާ ބުނީ "ފޭން" އާ ބެހޭ ގޮތުން މިހާތަނަށް މާ ގިނަ ވާހަކަތަކެއް މީޑިއާތަކަށް ތިލަ ނުވާ ކަމަށެވެ.
އެހެންވެ އެ ފިލްމާ ބެހޭ ގޮތުން އެފަދަ ވާހަކަތަކެއް ފެތުރިފައި ވަނީ ކޮން ސަބަބަކާ ހުރެކަން ނޭނގޭ ކަމަށެވެ.
ރޯހިތުގެ ފިލްމުގެ މަސައްކަތް މި މަހުގެ 4 ވަނަ ދުވަހު ފަށާ ގޮތަށް ވަނީ ހަމަޖެހިފަ އެވެ. އަދި މި މަހުގެ 20 ގައި ފިލްމުގެ މުޅި ކާސްޓާއި ފިލްމުގެ ނަމާ އެކު، ފިލްމް ލޯންޗް ކުރަން ވަނީ ނިންމައިފަ އެވެ.
އެހެންވެ 17 އަށް ވާ ގޮތެއް ބަލާލަން ކުޑަކޮށް އިންތިޒާރެއްކޮށްލަމާ ހިނގާށެވެ.