ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ދެއްވި އިންޑިއާގެ ނޫހަކަށް ދެއްވި ބަސްތީގަތުމެއްގައި، އިންޑިއާ ސިފައިން ރާއްޖޭގައި ތިބުމަށް، އިންތިހާބީ ރައީސް ޑރ. މުޢިއްޒު ރުހޭ ކަމަށް ދޭހަވާ މޭރުމަކުން ވާހަކަ ދައްކަވާފައިވާތީ އިންތިހާބީ ރައީސްގެ އޮފީހުން ކަންބޮޑުވުން ފާޅުކޮށްފިއެވެ.
އިންޑިއާގެ ދަ ހިންދޫ ނޫހަށް މީގެ ދެ ދުވަސް ކުރިން ރައީސް މުހައްމަދު ނަޝީދު ދެއްވި ބަސްތީގަތުމުގައި ވިދާޅުވީ އިންޑިއާއި ރާއްޖެއާއި ދެމެދު އޮތް ގުޅުމަށް ސަރުކާރު ބަދަލުވުމަކުން، ބަދަލު އަންނާނެ ކަމަށް ޤަބޫލު ނުކުރައްވާ ކަމަށެވެ. އެގޮތުން "އިންޑިއާ އައުޓް" ހަރަކާތް މިހާރު ވަރަށް ބޮޑަށް 'ހިނދިފައި' ވާ ކަމަށް ނަޝީދު ވަނީ ވިދާޅުވެފައެވެ.
މިގޮތުން ރާއްޖެ ސޮއިކޮށްފައިވާ އެއްބަސްވުންތަކުގައި އެއްވެސް މައްސަލައެއް އޮތް ކަމަށް ޤަބޫލު ނުކުރައްވާ ކަމަށާއި، އެކަމުގައި ތަންކޮޅެއް ހާމަކަން ބޮޑުވި ނަމަވެސް އެއްވެސް މައްސަލައެއް ނޯންނާނެ ކަމަށް ވިދާޅުވިއެވެ. އަދި އެއްބަސްވުމެއްގައި މައްސަލައެއް ޑރ. މުޢިއްޒުގެ ސަރުކާރަށް އޮންނާނެ ޤަބޫލު ނުކުރައްވާ ކަމަށް ވިދާޅުވިއެވެ. އެހެން ކަމުން ރާއްޖެއިން ގެންގުޅޭ ޙާރިޖީ ސިޔާސަތަށް ޑރ. މުޢިއްޒުގެ ސަރުކާރެއްގައި މާބޮޑު ބަދަލެއް ނާންނާނެ ކަމަށް ވިދާޅުވިއެވެ.
ނަޝީދު މިހެން ވިދާޅުވިއިރު، ޑރ. މުޢިއްޒުގެ ރިޔާސީ ވަޢުދުތަކުގެ ތެރޭގައި އެއްވެސް ޤައުމެއްގެ ސިފައިން ރާއްޖޭގައި ތިބުމާއި ދެކޮޅު ކަމަށް ވަނީ ވިދާޅުވެފައެވެ. ދަ ހިންދޫ ނޫހުން ވަނީ ނަޝީދުގެ މި ވާހަކަތަކުން ރާއްޖޭގައި ހެލިކަޕްޓަރު އަދި ޑޯނިއާ ބެލެހެއްޓުމަށް ތިބި ގާތްގަނޑަކަށް 75 ސިފައިން ރާއްޖޭގައި މަޑު ކުރުމަށް ޑރ. މުޢިއްޒު ފުރުސަތު ދެއްވާނެ ކަމަށް ދޭހަވާ ކަމަށް ރިޕޯޓްކޮށްފައެވެ.
މިކަމަށް އިޝާރާތް ކުރައްވާ މިއަދު ބޭއްވި ނޫސްވެރިންގެ ބައްދަލުވުމުގައި، އިންތިހާބީ ރައީސް އޮފީހުގެ ތަރުޖަމާނު މުހައްމަދު ފިރުޒުލް އަބްދުﷲ ހަލީލް ވިދާޅުވީ މިއިން އެއްވެސް ވާހަކައަކީ އިންތިހާބީ ރައީސް އާއި މަޝްވަރާ ކުރެވިގެން ދެއްކެވި ވާހަކަތަކެއް ނޫން ކަމަށެވެ. އެގޮތުން ޑރ. މުޢިއްޒުގެ ސްޓޭންޑަކީ އިންޑިއާނޫނަސް އެއްވެސް ޤައުމެއްގެ ސިފައިންގެ އެންމެ ބޫޓު ޖޯޑެއްވެސް ރާއްޖޭގައި ނުތިބުން ކަމަށް ތަކުރާރު ކުރެއްވިއެވެ. އަދި އެއީ ދިވެހި ރައްޔިތުންގެ ނިންމުންކަންވެސް ފިރުޒުލް ފާހަގަ ކުރެއްވިއެވެ.
" ދިވެހި ރައްޔިތުންގެ ނިންމެވުމާއި ފުށުއަރާގޮތަށް ރައްޔިތުންގެ މަޖިލީހުގެ ރައީސް، ދައްކަވާފައިވާ ވާހަކަފުޅުތަކާއި މެދު އަޅުގަނޑުމެން ހިތާމަ ކުރަން. އަދި އެހެންމެ އިންތިހާބީ ރައީސް ޑރ. މުޢިއްޒުއަށް ނިސްބަތްކޮށް އެވާހަކަ ދެއްކެވީތީ ވަކިން ބޮޑަށް ހިތާމަކުރަން. އަދި އެފަދައިން އެކަން ނުކުރުމަށް އަޅުގަނޑުމެން އިލްތިމާސް ކުރަން " ފިރުޒުލް ވިދާޅުވިއެވެ.
ނަޝީދުގެ އެ ބަސްތީގަތުމުގައި ވިދާޅުވީ އެމަނިކުފާނަކީވެސް ވެރިކަން ކުރެެއްވި ބޭފުޅެއް ކަމުން، އުތުރު ތިލަފަޅުގައި ހަދާ ބޯޓު ޔާޑުގެ މަސައްކަތުގެ މުހިންމުކަން އެނގިވަޑައިގަންނަވާ ކަމަށެވެ. އެގޮތުން އެމަނިކުފާނުގެ ވެރިކަމުގައި ދައުރުގައި ކުރެވުނު މަޝްވަރާތަކަށް ފަހު ރައީސް ޔަމީނުގެ ވެރިކަމުގައި ފްރޭމް އެގްރިމެންޓް ސޮއި ކުރެވި ރައީސް ސާލިޙް ވެރިކަމަށް އައިއިރު އެއްބަސްވުމަކާއި ހިސާބަށް ދެވުނުކަން ފާހަގަ ކުރެއްވިއެވެ.
ނަޝީދު މިފަދަ މޭރުމަކުން ވާހަކަ ދައްކަވާފައިވާއިރު، ރައީސް ނަޝީދުގެ ދަ ޑިމޮކްރެޓްސް މި ސަރުކާރުގައި ބައިވެރިވާނެ ކަމަށް އެ ޕާޓީން ދަނީ ތަކުރާރުކޮށް ބުނަމުންނެވެ. ނަމަވެސް މިކަމުގައި އިދިކޮޅު ޕީޕީއެމް އަދި ޕީއެންސީ ލީޑާޝިޕުން ބަހެއް ނުބުނާއިރު، އިންތިހާބީ ރައީސްގެ އޮފީހުންވެސް ސީދާ ވަކި ޕާޓީއަކާއި ގުޅޭނެ ކަމެއް ހާމައެއް ނުކުރެއެވެ. ހަމައެކަނި ފާހަގަ ކުރެއްވީ އަލަށް އެކުލެވޭ ސަރުކާރަކީ ޝާމިލް ސަރުކާރަކަށް ވާނެ ކަމަށެވެ.