ވެރިކަން ބަދަލުވުމުގެ މަރުހަލާ ކުރިއަށްދާ ދަނޑިވަޅުގައި ސިވިލް ސާވިސްގެ މަޤާމުތަކަށް މީހުން ނުނެގުމަށް އެ ކޮމިޝަނުން ސަރުކާރުގެ ހުރިހާ އިދާރާތަކަށް އަންގައިފިއެވެ.
ސިވިލް ސާވިސް ކޮމިޝަނުން މިކަމާއި ގުޅިގެން ސަރުކާރުގެ އިދާރާތަކަށް ފޮނުވި ސާކިއުލާގައި، 5 މަޤާމެއް އިސްތިސްނާވެއެވެ. އެއީ ޓީޗަރުން، ޑޮކްޓަރުން، ނަރުހުން، މުދިމުން އަދި އިމާމުންނެވެ. މި ނޫން މަޤާމުތަކަށް މީހުން ނެގުމުގެ ކުރިން އެ ކޮމިޝަނުގެ ހުއްދަ ލިއުމުން ހޯދައިގެން މެނުވީ އިއުލާންކޮށް މީހުން ނުނެގުމަށް ވަނީ އަންގާފައެވެ.
މި ސާކިއުލާގައި އިތުރަށް ބުނެފައިވާ ގޮތުން މިހާތަނަށް އިއުލާންކޮށްފައިވާ މަޤާމުތަކުގެ ތެރެއިން ވަޒީފާގެ ހުށަހެޅުން ނުވަތަ އޮފަރ ލެޓަރ ދީފައި ނުވާ މަޤާމުތަކަށްވެސް މީހުން ނުނެގޭނެއެވެ. މީގެ އިތުރުން މުވައްޒަފަކު ވަކިވުމުގެ ސަބަބުން ނުވަތަ ހުހަށް ހުރި މަޤާމަކަށް ވަގުތުން މީހަކު ބޭނުންވާނަމަވެސް އެކަން ކޮމިޝަނަށް ލިޔެގެން ހުއްދަ ހޯދުމަށް ސާކިއުލާގައި ވަނީ އަންގާފައެވެ.
ސިވިލް ސާވިސް ކޮމިޝަނުގެ ޑިރެކްޓަރ ޖެނެރަލް އަބްދުﷲ ސައީދު ސޮއިކުރައްވައި އިދާރާތަކަށް ފޮނުވާފައިވާ ސާކިއުލާގައި އިދާރާތަކުގެ އިދާރީ އޮނިގަނޑަށް ބަދަލު ގެނައުމާއި އައު މަޤާމުތައް އުފެއްދުންވެސް މި މަރުހަލާތެރިން މަޑު ޖައްސާލުމަށް ވަނީ އަންގާފައެވެ. މީގެ އިތުރުން އޮފީސްތަކުގެ ތެރެއިން އިއުލާން ކުރެވިގެން ވަޒީފާ ކުރިއެރުން ދިނުންވެސް މަޑުޖައްސާލުމަށް ވަނީ އަންގާފައެވެ. ސީއެސްސީން ވަނީ މި އުސޫލު ކޮންޓްރެކްޓް ވޭޖު އަދި ކޮންސަލްޓެންސީ އުސޫލުން މަސައްކަތް ކުރާ މުވައްޒަފުންނަށްވެސް ހަމަޖައްސާފައެވެ.
ސީއެސްސީން މި ގޮތަށް އަނގާފައި މިވަނީ، އިންތިހާބީ ރައީސްގެ އޮފީހުން ސަރުކާރަށް 7 ކަމެއް މަޑު ޖައްސާލުމަށް އެދި ސިޓީއެއްވެސް ފޮނުވާފައިވާ ދަނޑިވަޅެއްގައެވެ. ނިމެމުންދާ ސަރުކާރުން ވަނީ އިންތިޤާލީ މަރުހަލާގައި އަލަށް އުފެދޭ ސަރުކާރަށް ފުރިހަމަ އެއްބާރުލުން ދޭނެ ކަމަށް ބުނެފައެވެ. އަދި މިހާތަނަށް އެ އެއްބާރުލުން ލިބެމުންދާ ކަމަށް އިންތިހާބީ ރައީސްގެ އޮފީހުން ބުނެއެވެ.