ކުރީގެ ޕޮލިސް ކޮމިޝަނަރު ހުސައިން ވަހީދު މާލޭގެ މޭޔަރު ކަމަށް ވާދަކުރައްވަން ނިންމަވަވައިފި އެވެ.
އޭނަ ޕޮލިސް ކޮމިޝަނަރުކަން ކުރެއްވީ ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ. އޭގެ ކުރިން ޑެޕިއުޓީ ޕޮލިސް ކޮމިޝަނަރުގެ މަގާމު ޑރ. މުހައްމަދު ވަހީދު ހަސަން މަނިކުގެ ސަރުކާރުގައި ހުސައިން ވަހީދު ކުރެއްވި އެވެ.
ސީޕީގެ މަގާމުގެ އިތުރުން އޭނަ އަކީ ހައުސިން މިނިސްޓްރީ އާއި ޔޫތު މިނިސްޓްރީގެ ސިޔާސީ މަގާމުތަކެއް ވެސް 2018 އާ ހަމައަށް އަދާކުރެއްވި ބޭފުޅެކެވެ.
ހުސައިން ވަހީދު މާލޭގެ މޭޔަރު ކަމަށް ވާދަކުރައްވަން ނިންމެވީ އެ މަގާމުގައި ހުންނެވި ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ރައީސްކަމަށް އިންތިހާބުވެވަޑައިގަތުމާ ގުޅިގެންނެވެ. މުއިއްޒު ރައީސްކަމުގެ ހުވާ ކުރައްވާނީ އަންނަ މަހުގެ 17 ގަ އެވެ.
ހުސައިން ވަހީދު މޭޔަރު ކަމަށް ވާދަކުރައްވާނީ މިހާރު މޭޔަރުގެ ޒިންމާތަކާ ހަވާލުވެވަޑައިގެންފައިވާ ޑެޕިއުޓީ މޭޔަރު އަހުމަދު ނަރީޝް ވިދާޅުވެފައި ވަނީ ހުސައިން ވަހީދަކީ އަކީ ހިންގުންތެރި ގާބިލު ގައުމީ އަދި ވަތަނީ ބޭފުޅެއް ކަމަށާއި އޭނަ އަކީ މާލެ އަށް އުފަން މާލޭގެ ރައްޔިތުންގެ ވިންދާއި އިހުސާސް ދެނެވަޑައިގަންނަވާ ބޭފުޅެއް ކަމަށެވެ.
"އެއީ މާލޭ ސިޓީ މޭޔަރަކަށް ވަރަށް އެކަށީގެންވާ ބޭފުޅެއް. ކުރިމަތިލައްވާ ނަމަ އެއީ އަޅުގަނޑު ހަމަ ޔަގީނުން ވެސް ތާއީދު ކުރާނެ ބޭފުޅެއް." އޭނަ ވިދާޅުވި އެވެ.
މާލޭގެ މޭޔަރު ކަމަށް ވާދަކުރައްވަން ނިންމެވި ބޭފުޅުންގެ ތެރޭގައި މި ސަރުކާރުގެ ޔޫތު މިނިސްޓަރު އަހުމަދު މަހުލޫފް ވެސް ހިމެނެ އެވެ.