އަންނަ އަހަރަށް ލަފާ ކުރާ ދައުލަތުގެ ބަޖެޓް އެކުލަވާލުމުގެ މަސައްކަތަށް އިންތިހާބީ ރައީސްގެ ފަރާތުން ކޮމެޓީއެއް އެކުލަވާލައިފިއެވެ.
އިންތިހާބީ ރައީސްގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި، އަންނަ އަހަރަށް ލަފާ ކުރާ ބަޖެޓުގައި އައު ސަރުކާރުން ބޭނުންވާ ކަންކަން ހިމެނުމަށް ބަޖެޓު ކޮމެޓީއެއް އިންތިހާބީ ރައީސް ޑރ. މުހައްމަދު މުޢިއްޒު އެކުލަވާލައްވާފައިވާކަން ވަނީ ހާމަކޮށްފައެވެ. އެއީ ކޮމެޓީގައި 7 މެންބަރުން ހިމެނޭއިރު، ކޮމެޓީގައި ހިމެނިވަޑައިގަންނަވާ ބޭފުޅުންގެ ތަފްސީލެއް ހާމަކޮށްފައި ނުވެއެވެ.
މިކަމާއި ގުޅޭގޮތުން އިންތިހާބީ ރައީސް އޮފީހުގެ ތަރުޖަމާނު މުހައްމަދު ފިރުޒުލް އަބްދުﷲ ހަލީލް މިއަދު ވިދާޅުވީ، ކޮމެޓީގެ މަސައްކަތަށް ބޭނުންވާ މައުލޫމާތު ހޯދުމަށް ފިނޭންސް މިނިސްޓްރީގައި މިހާރު އެދިފައިވާ ކަމަށެވެ.
"އެ މައުލޫމާތުތަކުގެ ތެރޭގައި އެދިފައިވާނެ ދިވެހި ދައުލަތުގެ މިހާރުގެ ފިސްކަލް ހާލަތާއި، އަދި އެހެންމެ 2024 ވަނަ އަހަރަށް ލަފާ ކުރާ ހާލަތާއި ގުޅޭ ތަފްސީލީ މައުލޫމާތުތަށް ހޯދުމަށް. އަދި ހަމައެހެންމެ އެ މައުލޫމާތުތަކާއި އެކު އަޅުގަނޑުމެން ވާނެ ބައްދަލުވުމަކަށް އެދިފައި " ފިރިޒުލް ވިދާޅުވިއެވެ.
އިންތިހާބީ ރައީސްގެ އޮފީހުން ވިދާޅުވީ، ދައުލަތުގެ ބަޖެޓު އެކުލަވާލުމުގައި، ރައީސުލްޖުމުހޫއްރީއްޔާ އަދި އެމްޑީޕީގެ ފަރާތުންވެސް އެއްބާރުލުން ދެއްވާނެ ކަމަށް ވިދާޅުވެފައިވާ ކަމަށެވެ. އެހެން ކަމުން އުއްމީދަކީ އެ ފަރާތުން ބޭނުންވާ ކަންކަން ހިމެނިގެން ބަޖެޓް ހުށަހެޅިގެން ދިއުން ކަމަށް ވިދާޅުވިއެވެ.
މީގެ އިތުރުން ބަޖެޓުގައި މިވަގުތު އައު ސަރުކާރުން އިސްކަން ދޭނެ ކަންކަން ވިދާޅުވަން ދަތިކަމަށް ފިރުޒުލް ވިދާޅުވިއެވެ. އެއީ މިވަގުތު އަދި ފިސްކަލް ހާލަތު ނޭންގުމާއި އަދި 100 ދުވަހުގެ ވަޢުދުނާމާ އެކުލަވާލުމުގެ މަސައްކަތް ކުރަމުންދާތީ ކަމަށް ވިދާޅުވިއެވެ.