ދުނިޔޭގެ ފުރަތަމަ ލަގްޒަރީ އެއާލައިންގެ ގޮތުގައި ވައިގެ ހިދުމަތަށް ނުކުންނަ "ބިއޯންޑް" ރަސްމީކޮށް އިފުތިހާހުކޮށްފި އެވެ.
އެ އެއާލައިން އިފުތިތާހުކުރީ ވެލާނާ އިންޓަނޭޝަނަލް އެއާޕޯޓްގައި މިއަދު ބޭއްވި ރަސްމިއްޔާތޔެއްގަ އެވެ. އެ ރަސްމިއްޔާތުގައި ދަތުރުތަކަށް ބޭނުންކުރާ ބޯޓް ދައްކާލައި، ކްރޫންގެ ޔުނިފޯމް ވެސް ދައްކާލާފައިވެ އެވެ. "ބިއޯންޑް" ގެ ދަތުރުތަކަށް ބޭނުން ކުރަނީ އެއާބަސް އޭ319 މަރުކާގެ 44 މީހުންގެ ޖާގައިގެ ބޯޓެކެވެ.
"ބިއޯންޑް" އަކީ ކުރީގެ ހެލްތު މިނިސްޓަރު ޑރ. މަރިޔަމް ޝަކީލާގެ އާއިލީ މަޝްހޫރު ވިޔަފާރި ކުންފުނި ސިމްޑީ އާއި ޔޫއޭއީގެ އަރަބެސްކް ގުޅިގެން އުފައްދާފައިވާ އެއާލައިނެކެވެ.
މި ރަސްމީކޮށް އިފުތިތާހުކުރުމާ އެކީ ފުރަަތަމަ ދަތުރު އަންނަ މަހު ސައުދީ އަރަބިއްޔާގެ ރިޔާދަށް ބާއްވަން ވަނީ ނިންމައިފަ އެވެ. އަދި އަންނަ މަހުގެ 15 ގައި ޖަރުމަންގެ މިޔުނިކަށް ދަތުރެއް ބާއްވަން ތާވަލުކޮށްފައިވާ އިރު، އަންނަ މަހުގެ 17 ގައި ސްވިޓްޒަލެންޑަށް ވެސް ދަތުރެއް އޮންނާނެ އެވެ.
"ބިއޯންޑް" އިން ބުނި ގޮތުގައި މި ދަތުރުތަކުގެ ޓިކެޓް ވެސް މިހާރު އަންނަނީ ވިއްކަމުންނެވެ. މި އެއާލައިނުން މެދުއިރުމަތީގެ ގައުމުތަކަށް ކުރާ ދަތުރުތަކުގެ އަގުތައް ފެށެނީ 2000 ޑޮލަރުންނެވެ. އަދި ޔޫރަޕުގެ ގައުމުތަކަށް އަގުތައް ފެށެނީ 3،800 ޔޫރޯއިންނެވެ.
ނޫސްވެރިންނަށް މައުލޫމާތު ދެއްވަމުން އެ އެއާލައިންގެ ސީއީއޯ ޓެރޯ ޓަސްކިލާ ވިދާޅުވީ އެއާއިނަށް މުވައްޒަފުން ނެގުމުގައި ދިވެހިންނަށް އިސްކަމް ވެސް ދެމުން އަންނަ ކަމަށެވެ. އޭނަ ވިދާޅުވި ގޮތުގައި ފްލައިޓް އޮޕަރޭޝަނަށް އެކަނިވެސް 1،600 މުވައްޒަފުން ކުރިއަށް އޮތް 5 އަހަރަށް ބޭނުންވާނެ އެވެ.
ސިމްޑީގެ ސީއީއޯ ޑރ. މަރިޔަމް ޝަކީލާ ވިދާޅުވީ އަމާޒަކީ "ބިއޯންޑް" ގެ 50 ޕަސެންޓް މުވައްޒަފުންނަކީ ދިވެހިންނަށް ހެދުން ކަމަށެވެ.
"ކުރިއަށް އޮތް ތަނުގައި ދިވެހިން ކުރިމަތިލަމުން އަންނަ ވަރަކަށް އެބޭފުޅުންގެ ގާބިލްކަން ހުރި ވަރަކުން ދިވެހިން ނަގީަމުންދާނަން." އޭނަ ވިދާޅުވި އެވެ.