ބައިނަލްއަޤްވާމީ ކްރެޑިޓް ރޭޓިން އޭޖެންސީ ފިޗްއިން މިއަހަރުވެސް ރާއްޖޭގެ ރޭޓިން ބީ ނެގެޓިވް ގައި ދަމަހައްޓަން ނިންމައިފިއެވެ.
ފިޗް ރޭޓިންގް ދަމަހައްޓަން ނިންމާފައިވަނީ ފަތުރުވެރިކަމާއިއެކު ރާއްޖޭގެ އިޤްތިޞާދު ކުރިއަރާނެ ކަަމަށް ލަފާކޮށްފައެވެ. ފިޗް އިން ވަނީ ރާއްޖޭގެ އިޤްތިޞާދު 7.2 އިންސައްތައިގައި ކުރިއަރާނެ ކަމަށް ލަފާކޮށްފައެވެ. އަދި ކުރިއަށް އޮތް ދެ އަހަރު 6.6 އިންސައްތައިގެ ކުރިއެރުން ހޯދާނެ ކަމަށް ލަފާ ކުރެއެވެ.
މިއާއެކުވެސް މިފަހަރު ނެގެޓިވް ރޭޓިން ދެމެހެއްޓި އިރު އެންމެ ބޮޑަށް ފާހަގަ ކުރި އެއްކަމަކީ ރާއްޖޭގެ ފޮރިން ކަރަންސީ ރިޒާވް ދަށްވުމެވެ. އެގޮތުން ރިޒާވް ދަށްވުމާއެކު އެމްއެމްއޭއިން މެދުނުކެނޑި ފައިސާ ނަގަމުންދާކަން ވަނީ ފާހަގަކޮށްފައެވެ. މިގޮތުން މިދިޔަ އަހަރު ޑިސެމްބަރު މަސް ނިމުނު އިރު، އިންޑީއާގެ ރިޒާވް ބޭންކާއި އެކު ހަދާފައިވާ 200 މިލިއަން ޑޮލަރުގެ ކަރަންސީ ސްވަޕް ލައިން ބޭނުންކޮށް 100 މިލިއަން ޑޮލަރު ނަގާފައިވާކަން ފިޗް އިން ފާހަގަކުރެއެވެ. ފިޗްއިން ބުނީ މިހާރު ފޮރިން ރިޒާވްގައި ހުރިކަމަށް ލަފާ ކުރަނީ 1.1 މަހަށް ޙަރަދުތައް ބެލެހެއްޓުމަށް ބޭނުންވާ މިންވަރު ކަމަށެވެ. މިއީ ބީ ރޭޓިންގައި ހުންނަން ޖެހޭ މިންވަރު ކަމަށްވާ 3.5 މަހަށްވާރަށް ވުރެ ދަށް އަދަދެކެވެ.
މީގެ އިތުރުން ދައުލަތުން ދައްކަން ޖެހޭ ދަރަނި ކުރިއަށް އޮތް 3 އަހަރަށްވެސް ބޮޑުވަމުން ދިއުން ފިޗް އިން ފާހަގަ ކުރެއެވެ. އެގޮތުން ބޭރުގެ ފަރާތްތަކަށް 232 މިލިއަން ޑޮލަރުގެ ލޯން އަނބުރާ ދައްކަން އޮތް އިރު 298 މިލިއަން ޑޮލަރުގެ ގެރެންޓީ ދީފައިވާ ލޯން 2024 އަށް ދައްކަން ޖެހޭ ކަމަށެވެ. ފިޗްއިން ވަނީ މިހާރަށްވުރެ ފޮރިން ރިޒާވް ދަށްވެއްޖެ ނަމަ މި ދަރަނި ދެއްކުމުގައި ރާއްޖެއަށް ބޮޑެތި ގޮންޖެހުންތަކާއި ކުރިމަތިވުން އެކަށީގެންވާ ކަމަށެވެ. މީގެ އިތުރުން 2025 ވަނަ އަހަރު 363 މިލިއަން ދައްކަން ޖެހޭއިރު 887 މިލިއަން ޑޮލަރު 2026 ދަށްކަން ޖެހިފައިވާކަން ފިޗްއިން ފާހަގަ ކުރެއެވެ.
އެ ފަރާތުގެ އެއް ކަންބޮޑުވުމަކީ މި ލޯންތައް ދައްކަން ސަރުކާރުން ޤާއިމްކޮށްފައިވާ ސޮވެރިން ޑިވެލޮޕްމެންޓް ފަންޑުގައި 474 މިލިއަން ޑޮލަރަށް ވާވަރަށް ފައިސާ ހުރިއިރު، ބޭރު ފައިސާއިން ހުރީ އެންމެ 30 މިލިއަން ޑޮލަރަށް ވުމެވެ.
މީގެ އިތުރުން ފިޗް އިން ވަނީ ސަރުކާރުގެ ޙަރަދުތައް އަންނަ އަހަރަށްވެސް އިތުރުވާނެ ކަމަށް ލަފާކޮށްފައެވެ. އެގޮތުން ލޯން އެހީގައި ކުރިއަށް ގެންދާ ތަރައްޤީގެ މަޝްރޫޢުތައް އިތުރުވުމާއި އެކު ފަތުރުވެރިކަމުން ލިބޭ އިޤްތިޞާދީ ކުރިއެރުން އަދި ޖީއެސްޓީއަށް ގެނައި ބަދަލު މިތަން ފޫބެއްދޭ މިންވަރު ކުޑަވާނެ ކަމަށް ފިޗް އިން ޤަބޫލު ކުރެއެވެ. އަދި ކަރަންޓާއި ތެލަށް ދެމުން އަންނަ ސަބްސިޑީސް އަށް ބަދަލު ގެނައުމަށް ނިންމާފައިވާ ނިންމުން އިންތިހާބީ އަހަރަކަށް ވުމުން ފަސްކޮށްފައިވާކަން އެ އޭޖެންސީން ފާހަގަ ކުރެއެވެ. މިއާކުވެސް ދައުލަތަށް ލިބޭ އާމްދަނީއާއި ބަލާ ޙަރަދުތައް ބޮޑުކަން ވަނީ ފާހަގަކޮށްފައެވެ.
ފިޗްއިން ރާއްޖޭގެ އިޤްތިޞާދީ މުސްތަޤްބަލަށް ނެގެޓިވް އައުޓްލުކްއެއް ދީފައިވާއިރު، ބީ ނެގެޓިވް ރޭޓިންގް އެއް އެންމެ ފުރަތަމަ ދީފައިވަނީ 2021 ވަނަ އަހަރު ކޯވިޑާއެކުއެވެ.