ދެ ގައުމަކަށް ރާއްޖެ އިން ކަނޑައަޅާ ސަފީރުންގެ މަގާމަށް އައްޔަން ކުރަން ރައީސް ފޮނުއްވި ދެ ނަމެއް ދިރާސާކުރަން ކޮމިޓީ އަށް ފޮނުވައިފި އެވެ.
މަޖިލީހުގެ މިއަދުގެ ޖަލްސާގައި ކޮމިޓީ އަށް ފޮނުވި ދެ ނަމަކީ ޔޫއޭއީގެ ސަފީރަކަށް ކަނޑައަޅަން ފޮނުވި ފޮރިން މިނިސްޓްރީގެ ޖޮއިންޓް ސެކެޓްރީ މިދުފާ ނައީމާއި ބަންގަލަދޭޝްގެ ސަފީރަކަށް ކަނޑައަޅަން ފޮނުވި ފޮރިން މިނިސްޓްރީގެ ޖޮއިންޓް ސެކެޓްރީ ޝިއުނީން ރަޝީދުގެ ނަމެވެ.
މި ދެ ބޭފުޅުންގެ ތެރެއިން މިދުފާގެ ނަން ރައީސް އިބްރާހީމް މުހައްމަދު ސޯލިހު މަޖިލީހަށް ފޮނުއްވީ އޮގަސްޓް މަހުގެ 27 ގަ އެވެ. އަދި ޝިއުނީންގެ ނަން ފޮނުވީ މެއި މަހުގެ 5 ގަ އެވެ.
ދެ ގައުމަކަށް ސަފީރުން އައްޔަން ކުރަން ނަންތަކެއް ފޮނުވައި، އެ ނަންތައް ދިސާރާކުރަން ކޮމިޓީ އަށް މިއަދު ފޮނުވި އިންތިގާލީ މި މަރުހަލާގައި މަގާމުތަކަށް މީހުން ނުނެގުމަށް އިންތިހާބީ ރައީސް ޑރ. މުހައްމަދު މުއިއްޒުގެ އޮފީހުން ވެސް ސަރުކާރަށް އިލްތިމާސްކޮށްފައިވެ އެވެ.
މުއިއްޒު ރައީސްކަމުގެ ހުވާ ކުރައްވަން ހަމަޖެހިފައި ވަނީ އަންނަ މަހުގެ 17 ގަ އެވެ.