އިންތިޙާބީ ރައީސް ޑރ. މުހައްމަދު މުޢިއްޒުގެ ސަރުކާރެއްގައި ސިޔާސީ މަޤާމުތަކުގެ އަދަދު 700 އަށް ވުރެ އިތުރު ނުކުރުމަށް އިންތިޙާބީ ރައީސް ނިންމަވާފައިވާ ކަމަށް އެ އޮފީހުން ހާމަކޮށްފިއެވެ.
އިންތިހާބީ ރައީސްގެ އޮފީހުގެ ތަރުޖަމާނު މުހައްމަދު ފިރުޒުލް އަބްދުﷲ ޙަލީލް މިއަދު ބޭއްވެވި ނޫސްވެރިންގެ ބައްދަލުވުމުގައި މިކަން ހާމަކުރައްވައި ވިދާޅުވީ މި ޢަދަދަކީ މިއަދުގެ ސަރުކާރުގެ އަދި ކުރީގެ ރައީސް އަބްދުﷲ ޔާމީންގެ ސަރުކާރަށްވުރެވެސް ގިނަ އަދަދެއް ކަމަށެވެ. މިއަދަދަކީ ސަރުކާރުގެ ސިޔާސީ މަޤާމުތަކެއް ހިމަނައިގެން ކަމަށް އެއޮފީހުން ބުނެއެވެ.
" … މިއަދަދު ނިންމަވާފައި މިވަނީ ސަރުކާރުގެ ވުޒާރާތަކާއި، ރައިސުލްޖުމުހޫއްރީއްޔާގެ އޮފީހާއި، ރައިސުލްޖުމުހޫރިއްޔާގެ ގެކޮޅާއި، ނައިބް ރައީސްގެ ގެކޮޅާއި؛ މިހުރިހާ ތަންތަނެއްގައި މަސައްކަތް ކުރައްވާ އިދާރީ މުވައްޒަފުން ހިމެނޭހެން އެމަނިކުފާނު ނިންމަވާފައި ވަނީ އެމަނިކުފާނުގެ ސަރުކާރެއްގެ ސިޔާސީ މަޤާމުތައް 700 އަށް ވުރެ ގިނަ ނުކުރުމަށް " ފިރުޒުލް ވިދާޅުވިއެވެ.
މި އަދަދު ފާހަގަ ކުރައްވާ ފިރުޒުލް ވިދާޅުވީ މިއަދަދަކީ ކުރީގެ ދެ ސަރުކާރާއި އަޅައި ކިޔާއިރުވެސް ކުޑަ އަދަދެއް ކަމަށެވެ. އެގޮތުން މި ސަރުކާރުން 1063 ފަރާތެއް ސިޔާސީ މަޤާމުތަކުގައި ތިބިކަން، ދައުލަތުން މިއަހަރަށް ލަފާ ކުރާ ބަޖެޓާއި ހަވާލާދީ ފިރުޒުލް ވިދާޅުވިއެވެ. އަދި ރައީސް އަބްދުﷲ ޔަމީންގެ ވެރިކަމުގައި 808 ސިޔާސީ މަޤާމު އޮތް ކަމަށް ފިރުޒުލް މިސަރުކާރާއި ހަވާލާދީ ވިދާޅުވިއެވެ. އެހެން ކަމުން މިއީ ދެ ސަރުކާރަށް ވުރެ މަދު އަދަދެއް ކަމަށް ވިދާޅުވިއެވެ.
ސިޔާސީ މަޤާމުތައް ލިމިޓް ކުރަން ޑރ. މުޢިއްޒު ނިންމެވިއިރު، މި ސަރުކާރުގައި ހިމެނެނީ ކޮންމެ ފިކުރެއްގެ ވިއަސް ޤާބިލް ބޭފުޅުން ކަމަށް ވަނީ ވިދާޅުވެފައެވެ. އަދި "ޝާމިލް" ސަރުކާރެއްގެ ގޮތުގައި ސަރުކާރު ސިފަ ކުރައްވާ ޑރ. މުޢިއްޒު ވަނީ ސަރުކާރުގައި ތިބޭނީ ރައީސްއަށް ޖަވާބުދާރީ ވެވޭވަރުގެ ބޭފުޅުން ކަމަށް ވިދާޅުވެފައެވެ.
"