މި ސަރުކާރުގެ ދައުރު ހަމަވާން ގާތް ވެފައި ވަނިކޮށް ބައެއް ގައުމުތަކަށް ސަފީރުން އައްޔަން ކުރަން މަސައްކަތްކުރާތީ އެކަން ހުއްޓާލަން އިންތިހާބީ ރައީސްގެ އޮފީހުން ގޮވާލާފައި ވަނިކޮށް ރާއްޖެ އިން ޕާކިސްތާނަށް އާ ސަފީރެއް ކަނޑައަޅަން މަޖިލީހަށް ފޮނުވައިފި އެވެ.
ރައީސް އޮފީހުން މިއަދު ފޮނުވި ނަމަކީ ހ. ސެލީނާ، ހަދީޖާ ނަޖީހާގެ ނަމެވެ. އޭނަ ޕާކިސްތާން ސަފީރަކަށް އައްޔަންކުރަން އެދިވަޑައިގެން ރައީސް އިބްރާހީމް މުހައްމަދު ސޯލިހު ފޮނުއްވި ސިޓީ މިއަދު މަޖިލީހުގައި އިއްވައި އެ މައްސަލަ ވަނީ ހާރިޖީ ގުޅުންތަކާ ބެހޭ ކޮމެޓީ އަށް ފޮނުވައިިފަ އެވެ.
ނަޖީހާ އަކީ ފޮރިން މިނިސްޓްރީގައި 1999 އިން ފެށިގެން މަސައްކަތް ކުރައްވަމުން ގެންދަވާ ބޭފުޅެކެވެ.
އެހެން ދެ ގައުމެއްގެ ސަފީރުންނަށް ކަނޑައަޅަން ރައީސް ފޮނުވި ދެ ނަމެއް ދިރާސާ ކުރަން އިއްޔެ ކޮމިޓީ އަށް ފޮނުވާފައިވެ އެވެ.
އެ ދެ ބޭފުޅުންނަކީ ޔޫއޭއީގެ ސަފީރަކަށް ކަނޑައަޅަން ފޮނުވި ފޮރިން މިނިސްޓްރީގެ ޖޮއިންޓް ސެކެޓްރީ މިދުފާ ނައީމާއި ބަންގަލަދޭޝްގެ ސަފީރަކަށް ކަނޑައަޅަން ފޮނުވި ފޮރިން މިނިސްޓްރީގެ ޖޮއިންޓް ސެކެޓްރީ ޝިއުނީން ރަޝީދުގެ ނަމެވެ. މިދުފާގެ ނަން ރައީސް މަޖިލީހަށް ފޮނުއްވީ އޮގަސްޓް މަހުގެ 27 ގަ އެވެ. އަދި ޝިއުނީންގެ ނަން ފޮނުވީ މެއި މަހުގެ 5 ގަ އެވެ.