މާލެ އާއި ހުޅުމާލެ ދެމެދު ދަތުރު ކުރުމަށް އަޅާފައިވާ ސިނަމަލެ ބްރިޖް މަތިން ޤާވާއިދާއި ޚިލާފަށް ދުއްވާނަމަ، ފުލުހުންގެ ނަސޭހަތުގެ މެސެޖެއް ފޮނުވަން ފަށަން ތައްޔާރުވެފައިވާ ކަމަށް ދިވެހި ފުލުހުން ހާމަކޮށްފިއެވެ.
ފުލުހުން މި މެސެޖް ފޮނުވަން ފަށާނީ އަންނަ އާދީއްތަ ދުވަހުން ފެށިގެންނެވެ. އެގޮތުން ޤަވާއިދާއި ޚިލާފަށް ބްރިޖް މަތިން ލޭން ބަދަލު ކުރުމާއި، ކަނޑައެޅިފައިވާ ވަރަށްވުރެ ބާރަށް ދުއްވާ ފަރާތްތަކަށް މ ނަސޭހަތުގެ މެސެޖު ފޮނުވާނެއެވެ. މި މެސެޖް ފޮނުވަނީ ބްރިޖްގައި ހަރުކޮށްފައިވާ ސްޕީޑް ބަލާ ކެމޭރާތަކުން އުޅަނދު ދެނެގަނެގެންނެވެ.
އެގޮތުން މި ފުލުހުން ފޮނުވާ މެސެޖުގައި އުޅަނދު ރެޖިސްޓްރޭޝަން ނަންބަރާއި، ގަޑިއާއި ތާރީޙް އަދި ނަސޭހަތުގެ މެސެޖް ފޮނުވި ސަބަބު ބުނެދޭނެއެވެ. އަދި ބާރަށް ދުއްވާ ފަރާތްތަކުން ދުއްވި ސްޕީޑުވެސް އޮންނާނެ ކަމަށް ފުލުހުން ބުނެއެވެ. ފުލުހުން މިގޮތަށް ޢަމަލު ކުރަން ފަށާފައިވަނީ މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަށް، ކުރާ މަސައްކަތުގެ ތެރެއިން ކަމަށް ފުލުހުން ބުނެއެވެ.
ސިނަމާލެ ބްރިޖުގައި ސްޕީޑު ކެމެރާތައް ހަރުކުރެވިފައި ވީނަމަވެސް، މިހާތަނަށް މިގޮތަށް ބޭނުން ކުރަން ފަށާފައި ނުވެއެވެ. މި ބްރިޖާއި ބްރިޖަށް އަރާ ހައިވޭ އަކީ ބާރަށް ދުއްވުމާއި ޤަވާއިދާ ޚިލާފަށް ދުއްވައިގެން ގިނަ ހާދިސާތައް ހިނގާ ސަރަހައްދެކެވެ. އަދި މީގެ ކުރިން މީހުންގެ ފުރާނައަށް ނުރައްކާވާ ފަދަ ހާދިސާތައްވެސް ހިނގާފައި އެބަހުއްޓެވެ.