މިއަދު މެނދުރު އައްޑޫސިޓީ ގުޅިފައިވާ ރަށްތަކުން ކަރަންޓު ކެނޑިފައިވަނި ކޭބަލަކަށް ދިމާވި މައްސަލައަކުން ކަމަށް ފެނަކައިން ބުނެފިއެވެ.
އައްޑޫގެ ގުޅިފައިވާ އަވަށްތަކުން ކަރަންޓު ކެނޑިފައިވަނީ މިއަދު މެނދުރު 12:00 ޖަހައި އެހައިކަށް ހާއިރުއެވެ. މައުލޫމާތު ލިބިފައިވާ ގޮތުގައި ކަރަންޓު ކެނޑެން މެދުވެރިވީ، ގަން ސަރަހައްދުން ކޭބަލަކަށް ދިމާވި މައްސަލައެއްގެ ސަބަބުންނެވެ.
ނަމަވެސް މިހާރު މައްސަލަ ބަލައި، ފަހަރަކު ސަރަހައްދަކުން މެނުއަލްކޮށް ކަރަންޓު ދޭން ވަނީ ފަށާފައެވެ. އެގޮތުން ކެނޑުނުތާ ދެ ގަޑިއިރު ފަހުން ހިތަދޫއަށް ކަރަންޓު ދީފައިވާއިރު، މިހާރު މަރަދޫ، މަރަދޫ-ފޭދޫ އަދި ފޭދޫގެ ސަރަހައްދުތަކަށް ކަރަންޓު ދިނުމުގެ މަސައްކަތް ދަނީ ކުރަމުންނެވެ. ފެނަކައިން ބުނިގޮތުގައި އެއްފަހަރާ ކަރަންޓު ނުދެނީ މަޑުމަޑުން ލޯޑު ހިފާ ވަރު ބަލަމުން ދާތީއެވެ.
ކަރަންޓު ކެނޑުނު ގަޑީގައި އައްޑޫ ހޮސްޕިޓަލުން ބެކަޕް ޖެނެރޭޓަރުވެސް ޓެކްނިކަލް މައްސަލައެއް ދިމާވެ ހޮސްޕިޓަލުން ކަރަންޓު ދިނުމަށް ލަސްތަކެއް ވިއެވެ. ނަމަވެސް ގިނަ އިރުތަކެއް ނުވަ އެ މައްސަލަ ހައްލުކޮށް ހޮސްޕިޓަލަށް ކަރަންޓު ދީފައިވާ ކަމަށް އޭއީއެޗްއިން ވަނީ ބުނެފައެވެ.
އައްޑޫގެ ގަން ހިމެނޭހެން ގުޅިފައިވާ ހުރިހާ ރަަށަކަށް ކަރަންޓު ދެނީ ހިތަދޫގައި ހުންނަ ސެންޓްރަލް ޕަވާ ސްޓޭޝަނުންނެވެ. އެހެން ވުމުގެ ސަބަބުން މައްސަލަ ދިމާވާ ބައެއް ފަހަރު ހުރިހާ ރަށަކުން އެއް ފަހަރާ ކަރަންޓު ކަނޑައިގެން ދެއެވެ. މިފަހަކަށް އައިސް ކަރަންޓު ކެނޑޭލޭއް މަދު ނަމަވެސް މަގު ހެދުމާއި އެހެން މަސައްކަތް ކުރަމުންދާއިރު ކޭބަލްތައް ބައެއް ފަހަރު ބުރިވެއެވެ. އެފަދަ ކަމެއް ދިމާވެއްޖެ ނަމަ އެ ސަރަހައްދަކުން ކަރަންޓު ކަނޑައިގެން ދެއެވެ.