ރައްޔިތުންގެ މަޖިލީހުގެ ރައީސްކަމުން މުހައްމަދު ނަޝީދު ވަކިކުރަން ހުށަހަޅާފައިވާ ގަރާރާ ގުޅިގެން ނަޝީދަށް މަޖިލީހުން އެކަމުގެ ނޯޓިސް މިއަދު ފޮނުވައިފި އެވެ.
މަޖިލީހުގެ އިދާރާ އިން ބުނީ މެޖޯރިޓީ ޕާޓީ، އެމްޑީޕީގެ 49 މެންބަރުން ސޮޔާ އެކީ މަޖިލީހަށް ވައްދާފައިވާ ގަރާރުގެ ނޯޓިސް، މަޖިލީހުގެ ގަވާއިދުގެ ދަށުން ނަޝީދަށާއި މެމްބަރުންނަށް ވެސް ފޮނުވާފައިވާ ކަމަށެވެ. ނޯޓިސްގެ މުއްދަތު ހަމަވާ ތާރީހުން ފެށިގެން 14 ދުވަހުގެ މުއްދަތެއް ދިނުމަށް ފަހު އެންމެ އަވަހަށް އަންނަ ރަސްމީ ދުވަހަކު ބާއްވާ ޖަލްސާ އަށް އެ ގަރާރު ހުށަހަޅަން ޖެހެ އެވެ. އަދި 14 ދުވަހުގެ މުއްދަތު ހަމަވެ، މި މަހުގެ 29 ގައި ޖަލްސާއެއް ބާއްވައި، އެ ގަރާރު އެޖެންޑާ ވެސް ކުރަން ޖެހެ އެވެ.
އެކަމަކު އޭގެ ކުރިން، މަޖިލީހުގެ އާންމު ކޮމިޓީން އެ ގަރާރުގެ ބަހުސްގެ ވަގުތާއި ދިފާއުގައި ނަޝީދަށް ވާހަކަ ދެއްކެވުމުގެ ވަގުތު ކަނޑައަޅަން ޖެހޭނެ އެވެ. އެއާ އެކީ މަޖިލީހުގެ އިތުރު އެއްވެސް މަސައްކަތެއް ކުރެވޭނީގަރާރާ މެދު ގޮތެއް ނިންމުމަށް ފަހު ކަމަށް ވެސް މަޖިލީހުގެ ގަވާއިދުގައިވެ އެވެ.
މަޖިލީހުގެ ރައީސް މަގާމުން ވަކިކުރެވޭނީ ޖަލްސާއަށް ހާޒިރުވެ، ވޯޓުގައި ބައިވެރިވެވަޑައިގަންނަވާ މެމްބަރުންގެ އަޣުލަބިއްޔަތެވެ.
އެމްޑީޕީން ބުނެފައިވާ ގޮތުގައި ނަޝީދު މަޖިލީހުންގެ ރައީސްކަމުން ވަކިކުރަން ބޭނުން ވަނީ ރައްޔިތުންނަށް ބޭނުންތެރި އެތައް ބިލްތަކެއްގެ މަސައްކަތާއި ސަރުކާރުގެ އިދާރާތަކާއި ދައުލަތުގެ މުއައްސަސާތަކަށް ފާރަވެރިވެ ޖަވާބުދާރީ ކުރުމުގެ ގޮތުން މުހިންމު މަސައްކަތްތަކެއް މަޖިލީހުގައި ނިންމުމަށް ތަރުތީބު ކޮށްފައި ވަނިކޮށް، ނަޝީދު މައްސަލަތައް އެޖެންޑާ ކުރައްވަނީ ތަކުރާރުކޮށް އަމިއްލަ މަސްލަހަތު އިސް ކުރައްވައި ވަކި ފަރާތަކަށް ބުރަވެ ހުރެ މަޖިލީހުގެ ގަވައިދާ ހިލާފަށް ކަމަށްވާތީ އެވެ. އަދި ގަވައިދާ ހިލާފަށް ޖަލްސާތައް ކުރިޔަށް ގެންދަވާތީ އާއި މުޅި މަޖިލީހުގެ ނިޒާމު ހިފެހެއްޓެވުމުގެ ބަދަލުގައި ނިޒާމު ގެއްލުވާލަން މަސައްކަތް ކުރާ ފަރާތްތަކަށް އެ މަނިކުފާނު ވާގިވެރިވާ ކަމަށް ވެސް އެމްޑީޕީގެ ގަރާރުގައި ފާހަގަކޮށްފައިވެ އެ.