އިންތިޙާބީ ރައީސް ޑރ. މުހައްމަދު މުޢިއްޒު އާއި އެކީ މިއަންނަނީ 10 އަހަރުގެ ވެރިކަމެއް ކުރަން ކަމަށް ޕީއެންސީގެ ޗެއަރޕާސަން އަބްދުﷲ އަބްދުއް ރަހީމް ވިދާޅުވެއްޖެއެވެ.
އިންތިހާބީ ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި، ޑިރެކްޓަރ ޖެނެރަލް އޮފް ޓްރާންސިޝަންގެ މަޤާމުވެސް އަދާ ކުރައްވަމުން ގެންދަވާ އަބްދުﷲ އަބްދުލްރަހީމް ވިދާޅުވީ، ޑރ. މުޢިއްޒު ވެވަޑައިގެންފައިވަނީ އެމަނިކުފާނުގެ 5 އަހަރުގެ ދައުރު ތެރޭގައި ފުއްދޭ ވަރުގެ ވަޢުދުތަކެއް ކަމަށެވެ. އަދި އެ ވެރިކަމުގެ ވަޢުދުތައް ނުފުއްދިގެން އިތުރު ފަސް އަހަރަށް ނޭދޭނެ ކަމަށް ރައްޔިތުން ގާތު ބުނަން ނުތިބޭނެ ކަމަށް އަބްދުލްރަހީމް ވިދާޅުވިއެވެ.
" އަޅުގަނޑުމެން އިރާދަ ކުރެއްވިއްޔާ މިއަންނަނީ 10 އަހަރުގެ ވެރިކަމެއް ކުރަން ޑރ. މުޢިއްޒާއި އެކީގައި. މި ފަސް އަހަރު ނިންމާފައި ދެން އަންނަ ފަސް އަހަރަކަށް ޑރ. މުޢިއްޒު ގޮވައިގެން އަޅުގަނޑުމެން ކެމްޕެއިނަށް ދާނީ އަޅުގަނޑުމެން ވީ ވަޢުދުތައް ފުއްދާފައި. " ޑީޖީ އޮފް ޓްރާންސިޝަން ވިދާޅުވިއެވެ.
އަބްދުލްރާހީމް ވިދާޅުވީ އޭރުން ރައްޔިތުން 5 އަހަރު ފަހުން އެ ރަށަކަށްވީ ވަޢުދު ކޮބާތޯ ސުވާލު ނުކުރައްވާނެ ކަމަށެވެ. އޭގެ ބަދަލުގައި ރައްޔިތުން އަހާނީ މިއަންނަ ފަސް އަހަރަށް ކޮންކަމެއްހޭ އެރަށަށް އޮތީ، އޭނާ ވިދާޅުވިއެވެ. އަދި ވެރިކަމަށް އަންނަނީ އެވަރަށް އިތުބާރާއި ޔަޤީންކަމާއި އެކު ކަމަށް ވިދާޅުވިއެވެ.
އަބްދުލްރަހީމް ވަނީ ވަޢުދުތައް ފުއްދުމަށް ބަޖެޓަށް ބޭނުންވާ ކަންކަން ހުށަހެޅުމުގެ ފުރުސަތު ފަހިކޮށްދީފައިވާކަމަށް ވިދާޅުވެފައެވެ. އެގޮތުން މިއަހަރު ބާކީ އޮތްތަނަށް ބޭނުންވާ ސަޕްލިމެންޓަރީ ބަޖެޓަށް ކަންކަން ހުށަހެޅުމަށާއި އަންނަ އަހަރަށް ލަފާ ކުރާ ދައުލަތުގެ ބަޖެޓަށް ކަންކަން ހުށަހެޅުމުގެ ފުރުސަތުވެސް މިހާރުގެ ސަރުކާރުން ފަހިކޮށްދީފައިވާކަމަށް ވިދާޅުވިއެވެ.
މި ނޫސްވެރިންގެ ބައްދަލުވުމުގައި އަބްދުއްރަހީމް ވިދާޅުވީ، މި ސަރުކާރުގެ މަސައްކަތް ނުނިމި ފަހު ވަގުތު އަަވަސް އަރުވާލައި ކުރަން އުޅޭކަމަށް ވިދާޅުވެ އެކަމަށް ފާޑުވިދާޅުވެފައެވެ. އަދި "އަމީނީ މަގަށް ވީހެން" ރާއްޖޭގެ މަސައްކަތައް ވާކަށް ބޭނުން ނުވާ ކަމަށް ވިދާޅުވިއެވެ.