މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޮމްޕެނީން ފްރާންސްގެ އައިއެފްޓީއެމްގައި ޓޮޕް ރެސާ 2023 ރާއްޖެ އިސްތިހާރުކޮށްފިއެވެ.
މިމަހުގެ 3 އިން 5 އަށް ބޭއްވި ފެއާ އޮތީ ފްރާންސްގެ ވެރިރަށް ޕެރިސްގެ ޕޯޓް ޑި ވާސޭ ގައެވެ. މިފެއާރގައި ރާއްޖެ ތަމްސީލް ކުރުމަށް އެމްއެމްޕީއާރްސީގެ އިތުރުން 28 ފަރާތެއް ވަނީ ބައިވެރިވެފައެވެ. މިފަހަރުގެ ފެއަރއަށް 30،000 މީހުން ޒިޔާރަތްކޮށްފައިވާއިރު ފަތުރުވެރިކަމުގެ ދައިރާގެ ގިނަ ވިޔަފާރިތައް ވަނީ ބައިވެރިވެފައެވެ. އެގޮތުން ވިޔަފާރި، ލީޝަރ އަދި މައިސް ޓުއަރިޒަމް ޕްރޮމޯޓް ކުރުމަށް ފުރުސަތު ވަނީ ފަހިވެގެން ގޮސްފައި ކަމަށް އެމްއެމްޕީއާރްސީން ބުނެއެވެ.
މި ޓްރޭޑް ފެއަރގެ ތެރެއިން، ރާއްޖޭގެ ބްރޭންޑް ފަރަންސޭސިވިލާތުގެ މާކެޓުގައި މަޤުބޫލުކޮށް ދެމެހެއްޓުމާއި، ޕެންޑެމިކް ކުރިން މިމާކެޓުން އައި ފަތުރުވެރިންގެ އަދަދުތައް އިޔާދަ ކުރުމަށް ޕްރޮމޯޓް ކުރެވިގެން ދިޔައެވެ. މީގެ އިތުރުން ބައިވެރިވި ކުންފުނިތަކަށް އެކުންފުނިތަކުގެ ޚިދުމަތްތަކާއި އަދި ވިޔަފާރި ގުޅުން ބަދަހިކޮށް އަދި ގުޅިގެން މަސައްކަތް ކުރުމަށް ބޭނުންވާ ޕްލެޓްފޯމް ލިބިގެން ދިޔަކަން އެމްއެމްޕީއާރްސީން ފާހަގަ ކުރެއެވެ.
މި ހަރަކާތުގެ ތެރެއިން އެމްއެމްޕީއާރްސީ ސްޓޭންޑުން ރާއްޖެއާއި ގުޅޭ މައުލޫމާތު ދޭ ކިއޮސްކެއް ޤާއިމް ކުރެވި، ރާއްޖޭގެ ފަތުރުވެރިކަމުގެ ސެގްމެންޓުތަކުގެ މައުލޫމާތު ވަނީ ފޯރުކޮށްދެވިފައެވެ. އަދި ތަފާތު ސާވޭތަކާއި ތަޖުރިބާތައް ސްޓޭންޑުން ލިބޭނެ އިންތިޒާމު ވަނީ ހަމަޖެހިފައެވެ. މީގެ ތެރޭގައި ފޭލި އަދި ލިބާސް ފަދަ ދިވެހި ހެދުން ތަޖުރިބާ ކުރުމާއި ދިވެހި ކެއުންތައް ތަޖުރިބާ ކުރުމުގެ ފުރުސަތު ޒިޔާރަތް ކުރި ފަރާތްތައް ވަނީ ލިބިގެން ގޮސްފައެވެ. މީގެ އިތުރުން ރާއްޖެއާއި ގުޅޭ މައުލޫމާތު އަދި ކޯ އެގްޒިބިޓަރުންގެ މައުލޫމާތު ހިމެނޭ ޕްރެސް ޕެކްތަކެއް ވެސް ވަނީ ބަހާފައެވެ.
ފަރަންސޭސި މާކެޓުން މިދިޔަ އަހަރު ރާއްޖެ އައިސްފައިވަނީ 48،341 ފަތުރުވެރިންނެވެ. އަދި އޭރު ރާއްޖެއަށް އެންމެ ގިނައިން ފަތުރުވެރިން އަންނަ 8 ވަނަ މާކެޓުވެސް މެއެވެ. މިއަހަރުގެ ސެޕްޓެމްބަރު މަހުގެ ނިޔަލަށް މިމާކެޓުން 37،688 ފަތުރުވެރިން ވަނީ ޒިޔާރަތްކޮށްފައެވެ. އެމްއެމްޕީއާރްސީން ވަނީ މިމާކެޓުގައި ރާއްޖެ އިސްތިހާރު ކުރުމަށް މަޝްހޫރު ވޯގް އަދި ސާފް ސެޝަން އާއި އެކުވެސް ކެމްޕެއިނެއް ހިންގާފައެވެ.