އިންތިހާބީ ރައީސް ޑރ. މުޢިއްޒުގެ ނަމުގައި ފޭކް މެސެޖްތަކެއް އެކި ފަރާތްތަކަށް ފޮނުވަމުންދާ މައްސަލައެއް ފެންމަތިވެއްޖެއެވެ.
މިކަމާއި ގުޅޭގޮތުން ޕްރޮގްރެސިވް ކޯލިޝަނުން ނެރުނު ނޫސް ބަޔާނެއްގައި ބުނީ، އެމަނިކުފާނުގެ މޯބައިލް ނަންބަރުން ތަފާތު އެކި އެސްއެމްއެސްތަކާއި ހަޤީޤަތާއި ޚިލާފު ފޭކް މެސެޖުތަކެއް ފޮނުވަމުންދާ ކަމަށެވެ. އަދި މިކަން އެ ޕާޓީތަކުން ވަނީ ނާތަހުޒީބު ފިނޑި ޢަމަލެއްގެ ގޮތުގައި ކުށްވެރިކޮށްފައެވެ.
" މި ކަން ކުރަނީ ކޮންމެ ފަރާތަކުން ނަމަވެސް، މި ފަދަ ނާތަހުޒީބު ޢަމަލުތައް ނުކުރުމަށާއި، އެ ފަދަ މެސެޖެއް ލިބިވަޑައިގެންނެވި ނަމަވެސް އެއަށް ޢަމަލު ނުކުރުމަށް ނަސޭހަތްތެރިވަމެވެ. " ބަޔާނުގައިވެއެވެ.
ޕީޕީއެމް/ޕީއެންސީ ހިމެނޭ ޕްރޮގްރެސިވް ކޯލިޝަނުން ވަނީ މިމައްސަލަ އަވަސް މައްސަލައެއްގެ ގޮތުގައި ބަލައި، އެ ކަން ހުއްޓުވުމަށް އަޅަންޖެހޭ ފިޔަވަޅު އެޅުމަށް ދިވެހި ފުލުހުންނަށް ގޮވާލާފައެވެ.
މުޢިއްޒުގެ ނަމުގައި ފޭކް މެސެޖުތަކެއް ފޮނުވަމުންދާއިރު، މުޢިއްޒު އާއި ބައްދަލު ކުރުމަށާއި ވަޒީފާ ދިނުން ފަދަ ކަންކަމަށް މެސެޖުތަކެއް ދަނީ ދައުރު ކުރަމުންނެވެ.