މާލޭގެ މޭޔަރު ކަމަށް ވާދަކުރައްވާނެކަން ކުރީގެ ޕޮލިސް ކޮމިޝަނަރު ހުސައިން ވަހީދު އިއުލާންކުރައްވައިފި އެވެ.
އޭނަ މިކަން ސޯޝަލް މީޑިއާގައި ރަސްމީކޮށް އިއުލާންކުރެއްވީ މޭހަރު ކަމަށްވާ ވާދަކުރައްވަން ނިންމާފައިވާ ކަމަށް ބުނެ ވާހަކަތަކެއް ދެކެވެމުން ދަނިކޮށެވެ. އެގޮތުން މިހާރު މާލޭގެ މޭޔަރުގެ ޒިންމާތަކާ ވަގުތީ ގޮތުން ހަވާލުވެވަޑައިގެން ހުންނެވި ޑެޕިއުޠީޯ މޭޔަރު އަހުމަދު ނަރީޝް ވިދާޅުވެފައި ހުސައިން އަކީ މޭޔަރު ކަމަށް ވަރަށް ގާބިލު ބޭފުޅެއް ކަމަށާއި އޭނަގެ ތާއީދު އޮންނާނެ ކަމަށެވެ.
މޭޔަރު ކަމަށް ވާދަކުރައްވާކަން އިއުލާންކުރައްވައި ހުސައިން ވިދާޅުވީ ގިނަ ބައެއްގެ ތާއީދާއި ދުއާ ވެސް ބޭނުންވާ ކަމަށެވެ.
އޭނަ ޕޮލިސް ކޮމިޝަނަރުކަން ކުރެއްވީ ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ. އޭގެ ކުރިން ޑެޕިއުޓީ ޕޮލިސް ކޮމިޝަނަރުގެ މަގާމު ޑރ. މުހައްމަދު ވަހީދު ހަސަން މަނިކުގެ ސަރުކާރުގައި ހުސައިން ވަހީދު ކުރެއްވި އެވެ. ސީޕީގެ މަގާމުގެ އިތުރުން އޭނަ އަކީ ހައުސިން މިނިސްޓްރީ އާއި ޔޫތު މިނިސްޓްރީގެ ސިޔާސީ މަގާމުތަކެއް ވެސް 2018 އާ ހަމައަށް އަދާކުރެއްވި ބޭފުޅެކެވެ.
ހުސައިން މާލޭގެ މޭޔަރު ކަމަށް ވާދަކުރައްވަން ނިންމެވީ އެ މަގާމުގައި ހުންނެވި ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ރައީސްކަމަށް އިންތިހާބުވެވަޑައިގަތުމާ ގުޅިގެންނެވެ. މުއިއްޒު ރައީސްކަމުގެ ހުވާ ކުރައްވާނީ އަންނަ މަހުގެ 17 ގަ އެވެ.
މާލޭގެ މޭޔަރު ކަމަށް ވާދަކުރައްވަން ނިންމެވި ބޭފުޅުންގެ ތެރޭގައި މި ސަރުކާރުގެ ޔޫތު މިނިސްޓަރު އަހުމަދު މަހުލޫފް ވެސް ހިމެނެ އެވެ.