އައްޑޫގައި ވޮލީ ބޯޅައަށް އޮތް ޝައުޤުވެރިކަން އިތުރުކުރުމުގެ ގޮތުން ކުޅިވަރު ޖަމީއްޔާއެއް ކަމަށްވާ ދަ ސަދަން ސްޕޯޓްސް ކްލަބްއިން އިންތިޒާމުކޮށްގެން ބާއްވާ ވޮލީ ކޭމްޕް ފަށައިފިއެވެ.
ދަ ސަދަން ސްޕޯޓްސް ކްލަބުގެ ވޮލީ ކޭމްޕަކީ އުމުރުން 12 އަހަރާއި 25 އަހަރާއި ދެމެދުގެ އުމުރު ފުރާގެ ކުދިންނާއި މީހުންނަށް ހާއްސަކޮށްގެން ބާއްވާ ކޭމްޕެކެވެ. މި ކޭމްޕް ކުރިއަށްދާނީ މިމަހުގެ 13 އިން 21 އަށެވެ. ކޭމްޕް އިންތިޒާމު ކުރާ ދަ ސަދަން ސްޕޯޓްސްއިން ބުނީ، ކޭމްޕެއް ބޭއްވުމުގެ އެންމެ ބޮޑު މަޤްޞަދަކީ އައްޑޫގައި ނެތިގެން ގޮސްފައިވާ ވޮލީގެ ރޫޙް އާލާކޮށް ދިރުވައި، ހުނަރުވެރި ކުޅުންތެރިން ތަކެއް ތަމްރީނުކޮށް އުފެއްދުން ކަމަށެވެ. ކޭމް ކުރިއަށް ދާނީ ފޭދޫ ވޮލީ ކޯޓުގައެވެ.
ހަފްތާއެއް ހާ ދުވަހުގެ މުއްދަތައް ކުރިއަށް ގެންދާ ކޭމްޕުގައި 12 އަހަރާއި 18 އަހަރާއި ދެމެދު ކުދިންނަށް ބޭސިކްސް ކިޔައި ދެވޭނެއެވެ. މި ކޭމްޕުގައި ކޯޗުކަން ކޮށްދެއްވަނީ ދުނިޔޭގެ ވޮލީ ބޯލް ފެޑެރޭޝަންގެ ލެވެލް 3 ސެޓްފިކެޓް ހާސިލްކޮށްފައިވާ ހުނަރުވެރި ކޯޗު އަހުމަދު ސުނަން އެވެ. އޭނާގެ ބެލުމުގެ ދަށުން ކުދިންނަށް ބޯޅަ ޖެއްސުމާއި، ކުޅުމުގެ ތެރެއިން ހަރަކާތްތައް ބަހައްޓަންވީ ގޮތް ކިޔައި ދެވޭނެއެވެ.
މީގެ އިތުރުން ބޮޑެތި މީހުންނަށް ކުޅުމުގެ ޤަވާއިދުތަކާއި އަދި ވޮލީބޯޅަ މެޗެއްގެ ތެރެއިން ކަންކަން ހިނގާނެ ގޮތް ކިޔައިދިނުމަށް ސެޝަންތަކެއް ވެސް ކޭމްޕް ތެރެއިން ކުރިއަށް ގެންދިއުމަށް ހަމަޖެހިފައިވާ ކަމަށް ސަދަން ސްޕޯޓްސް ކްލަބުން ބުނެއެވެ.
ރަށު ފެންވަރުގައި ވޮލީ ބޯޅަ ކުރިއެރުވުމުގެ މަޤްސަދުގައި 3 އަންހެން ކަނބަލެއްގެ އިސްނެގުމަށް އުފައްދާފައިވާ ދަ ސަދަން ސްޕޯޓްސް ކްލަބުން މިހާތަނަށް އަންހެން އަދި ފިރިހެން ވޮލީ މުބާރާތެއް މާލެއިން ރެފްރީން ގެނެސްގެން ވަނީ ބާއްވާފައެވެ. އަދި ކުޅިވަރަށް އިތުރު މީހުން ޝަޢުޤުވެރިކުރުމަށް އެ ޖަމީއްޔާއިން ދަނީ މަސައްކަތް ކުރަމުންނެވެ.