މި މަހުގެ 10 ވަނަ ދުވަހުގެ ރޭ މެލޭޝިއާގެ އިމާރާތަކުން ވެއްޓި މަރުވި އުމަރު އަހުމަދު ނައީމްގެ ހަށިގަނޑު މިއަދު ހެނދުނު މާލެ ގެނެސްފިއެވެ.
އުމަރު އަހުމަދު ނައީމް މަރުވެފައި އޮތްވާ ފެނުނީ އޭނާ ދިރިއުޅެމުން ދިޔަ ޔުނިޕާކް ކޮންޑަމީނިއަމްގެ ތިރީގައި އޮތްވާ އެވެ. އޭނާ އަކީ ކުއަލަލަމްޕޫރުގައި ހުންނަ އިންފްރާސްޓަރްކްޗަރ ޔުނިވާސިޓީ ކުއަލަލަމްޕޫރުގައި ކިޔަވަމުން ދިޔަ ދަރިވަރެކެވެ.
އުމަރުގެ ހަށިގަނޑު މެލޭޝިއާ ފުލުހުން ތަހްގީގަށް ގެންދިއުމަށްފަހު އާއިލާ އާއި ހަވާލުކޮށްފައިވަނީ އިއްޔެ ހަވީރުއެވެ. މެލޭޝިއާގެ ގާނޫނުގައިވާ ގޮތުން މުސްލިމު މައްޔިތަކު އެގައުމުން ބޭރުކުރެވެނީ ހިނަވައި ކަފުންކޮށް އަދި ކަށު ނަމާދު ކުރުމަށްފަހުއެވެ.
އުމަރުގެ ކަށުނަމާދު ކުއާލަލަމްޕޫރުގައި ހުންނަ ދިވެހި އެމްބަސީގެ ބެލުމުގެ ދަށުން ކުރެވިފައިވަނީ ޕުޗުންގެ މަސްޖިދު ޖެމެކް ބަޓު 12ގައި އިއްޔެ އަސުރު ނަމާދަށް ފަހުއެވެ. ކަށުނަމާދުގައި އެމްބަސީގެ މުވައްޒަފުންގެ އިތުރުން މެލޭޝިއާގައި ކިޔަވާ ދަރިވަރުން ވަނީ ބައިވެރިވެފައެވެ.
މައުލޫމާތު ލިބޭ ގޮތުގައި އުމަރުގެ ހަށިގަނޑު އާއިލާއިން މިރޭގެ ވަގުތެއްގައި އޭނާގެ އުފަން ރަށް ހިތަދޫއަށް ގެންދިއުމަށް ވަނީ ހަމަޖެހިފައެވެ.
އުމަރުގެ މަރާއި ގުޅޭ ތަހްގީގު މެލޭޝިއާގެ ފުލުހުން ކުރަމުންދާއިރު އެކަމުގެ ތަފްސީލެއް މެލޭޝިއާގައި ހުންނަ ދިވެހި އެމްބަސީ އަދި ފުލުހުންވެސް ހާމަކޮށްފައި ނުވެއެވެ.