ފަލަސްތީނަށް އެހީވާން ރެޑް ކްރެސެންޓުން ފަންޑެއް

ފަލަސްތީނަށް އެހީވާން ދިވެހި ރެޑް ކްރެސެންޓުގެ ފަރާތުން ރާއްޖޭގައި މިއަދު ފަންޑެއް ހުޅުވައިފި އެވެ.

މި ފަންޑަށް ފައިސާގެ އެހީތެރިކަން ފޯރުކޮށް ދިނުމަށް ހުޅުވާލާފައިވަނީ، މިއަދުން ފެށިގެން މި މަހުގެ 28 އާ ހަމައަށެވެ. ނިޔަލަށެވެ. ފަންޑަށް ލިބޭ ފައިސާގެ އެހީ ފޯރުކޮށް ދޭނީ، އަނިޔާވެ ޒަހަމުވެފައިވާ ފަރާތްތަކަށް ދެމުންދާ ހިދުމަތްތައް މެދުކެނޑުމެއް ނެތި ފޯރުކޮށްދިނުމަށް އެހީވުމަށް ކަމަށް ދިވެހި ރެޑް ކްރެސެންޓުން ބުންޏެވެ.

އެގޮތުން އެ ފައިސާ ބޭނުންކުރަން ކަނޑައަޅާފައިވާ ކަންކަމުގެ ތެރޭގައި ފުރަތަމަ ފަސްޓް އެއިޑްގެ ހިދުމަތްތަކަށް ބޭނުންވާ ސާމާނާއި އުޅަނދުތަކަށް ބޭނުންވާ ތަލާއި އެ ނޫން ވެސް ހަރަދުތަކާއި ހާލުގައި ޖެހިފައިވާ މީހުންނަށް ކާބޯތަކެއްޗާއި ސާފު ބޯފެން އަދި ބޯހިޔާވަހިކަން ފޯރުކޮށްދިނުން ހިމެނެ އެވެ.

ފައިސާ ޖަމާކުރާނެ އެކައުންޓުތައް:

* ބޭންކް އޮފް މޯލްޑިވްސް (ބީއެމްއެލް) ރުފިޔާ އެކައުންޓް: 7701176022001
* ބީއެމްއެލް) ޑޮލަރު އެކައުންޓް: 7701176022002
* މޯލްޑިވްސް އިސްލާމިކް ބޭންކް (އެމްއައިބީ) ރުފިޔާ އެކައުންޓް: 99010155500036100
* އެމްއައިބީ ޑޮލަރު އެކައުންޓް: 99010155500036200

އިޒްރޭލާއި ފަލަސްތީނާ ދެމެދު މިހާރު ހޫނުވެފައިވާ މައްސަލަގަނޑުގެ ތެރޭގައި ހާލުގައި ޖެހިފައިވާ ފަލަސްތީނުގެ ރައްޔިތުނަށް އެހީވުމަށް، ދިވެހި ޖަމިއްޔާއެއް ކަމަށް އިންޓަނޭޝަނަލް އެއިޑް ކެމްޕޭން (އައިއޭސީ) އިން ވެސް ވަަނީ ފަންޑެއް ހުޅުވައިފަ އެވެ.