ބޭރު ޤައުމުތަކުން އައްޑޫއަށް މުދާ ގެނައުމަށް މޯލްޑިވްސް ސްޓޭޓް ޝިޕިންގް (އެމްއެސްއެސް) އިން ގަތް ބޯޓު ފުރަތަމަ ދަތުރުގައި އައްޑޫގެ ސަރަހައްދީ ބަނދަރުގައި، ބަނދަރުކޮށްފިއެވެ.
މޯލްޑިވްސް ސްޓޭޓް ޝިޕިންގް މިއަހަރު އޯގަސްޓް މަހު އެމްއެސްއެސް އޯޕަލް ނަމަކަށް ކިޔާ މި ބޯޓު ވަނީ ގަނެފައެވެ. މި ބޯޓުގެ ބޭނުމަކީ ދުނިޔޭގެ ކޮންމެ ހިސާބަކުންވެސް އައްޑޫއަށް މުދާ ގެނެވޭނެ އިންތިޒާމު ހަމަޖެއްސުމެވެ. އެގޮތުން އައްޑޫއަށް ގެންނަ މުދާ މާލޭ ބަނދަރުގައި ޓްރާންސިޓް ކުރުމަށް ފަހު އައްޑޫއަށް ގެނެވޭނެއެވެ. އަދި މާލެއިން ގަންނަ މުދާ ކޮންޓެނަރައިޒްޑް ކޮށްގެން އައްޑޫއަށް ގެނެވޭނެ ކަމަށް އެމްއެސްއެސްއިން ބުނެއެވެ.
ބޯޓުގެ ދަތުރުތައް ފެށިފައިވާއިރު، ދަތުރުތަކަށް ބުކް ކުރުމުގެ ފުރުސަތު މިހާރު އެކުންފުނިން ވަނީ ހުޅުވާލާފައެވެ. އަދި ކޮންމެ ދިހަ ދުވަހަކުން އައްޑޫ ސިޓީއަށް ދަތުރުކުރާ މި ބޯޓް ދަތުރުކުރާނީ މާލެ، ހިތަދޫ، ކޫއްޑޫ މާލެ ރޫޓުގައެވެ.
އެސްޓީއޯގެ ދަށުން ސަބްސިޑާރީއެއްގެ ގޮތުގައި ހިންގާ ޤައުމީ ޝިޕިންގް ކުންފުނިއިން ބުނީ އޯޕަލް އަކީ 105 ކޮންޓެއިނަރ އުފުލޭ، ބޯޓުގައި ކްރޭން ހަރުކުރެވިފައިވާ އުޅަނދެއް ކަމަށެވެ. އަދި މިކަމުގެ ސަބަބުން ހިތަދޫ ޕޯޓް ލިމިޓެޑުގެ ދަށުން ހިންގާ ސަރަހައްދީ ބަނދަރުގައި ކްރޭން ނެތުމުގެ ސަބަބުން މުދާ ބޭލުމުގައި ދިމާވާ ދަތިތަކަށް ވެސް ހައްލު ލިބޭނެ ކަމަށެވެ.
ބޯޓުގައި 20 ރީފަރ ކޮންޓެއިނަރ ހިމެނޭއިރު މި އޮޕަރޭޝަންގެ ސަބަބުން މުދާ އުފުލުމުގައި ހުރި ދަތިތައް ހައްލުވެ، ޤަވާއިދުން މުދާ އުފުލަދޭނެ އިތުބާރުކުރެވޭ ފަރާތެއް އުފެދި، ބާޒާރުގައި މި ޚިދުމަތުގެ އަގު ހިފެހެއްޓޭނެ ކަމަށް އެމްއެސްއެއިން ޤަބޫލު ކުރެއެވެ. މީގެ އިތުރުންވެސް މޫސުން ގޯސްވާ ދުވަސްވަރު އައްޑޫއަށް ކާޑުގެ ބާވައްތައް އުފުލުމުގައިވެސް މި ބޯޓު އެހީތެރިވެދޭނެ ކަމަށް އެސްޓީއޯއިން ބުނެއެވެ.
MSS Opal arrived @adduport on her maiden voyage, today. She will be making a regular 10-day voyage between Malé and Addu. Embracing innovation and sustainability, we're charting a course to a brighter, greener future of decentralized transportation revolution in the Maldives. pic.twitter.com/log5B8G34S
— Maldives State Shipping (MSS) (@stateshippingmv) October 14, 2023
އައްޑޫގެ ސަރަހައްދީ ބަނދަރު ބައިންލައަގްވާމީ ބަނދަރުތަކާ ގުޅުވާލެވުމުން މާލެ ފިޔަވައި އިތުރު ސަރަހައްދެއްގައި ބައިނަލްއަޤްވާމީ ބަނދަރެއް ތަރައްޤީވެ ވަޒީފާގެ ފުރުޞަތުތައްވެސް ފަހިވެގެންދާނެއެވެ. އަދި މިއީ ސަރުކާރުގެ ލާ މަރުކަޒީ ސިޔާސަތަށް ވަރުގަދަވެގެން ދާނެ ކަމެއް ކަމަށް އެސްޓީއޯއިން ބުނެއެވެ.
މި ބޯޓު ގަތުމާއެކު އެމްއެސްއެސް ކުންފުނީގެ ފްލީޓުގައި 5 ބޯޓު އޮންނާނެއެވެ. އެކުންފުންޏަކީ ރާއްޖޭގެ ޝިޕިންގް އިންޑަސްޓްރީ ކުރިއަރުވައި ކުރިން ރާއްޖޭގައި އޮތް ބައިނަލްއަޤްވާމީ ފެންވަރުގެ ޝިޕިންގް އިންޑަސްޓްރީއެއް ޤައިމް ކުރުމެވެ. އެމްއެސްއެސް މި ބޭނުމުގައި އުފައްދާފައިވަނީ 2020 ވަނަ އަހަރުއެވެ.